Ibriko 5 - সান্তালী বাইবেল

¹ Hoṛko secʼ khon Isorakʼ dewa sewae lạgitʼ mimitʼ maraṅ naekeko do manwako tala khon bachaokateye bahalokʼ kana, jemon manwakoakʼ kại iạte janware dãṛẽye ar eṭakʼ danko hõe samaṅ daṛeakʼ.

² Okoe begor baḍaeteko kạiyetʼkan ar bạṛicʼ horteko calakʼkan onko sãote uni do mạ̃hirteye beohara, ente unire hõ nijortetʼ do menakʼgea.

³ Uni do cetʼleka eṭakʼ hoṛkoakʼ kại lạgitʼ janware dãṛẽyedekan onkage acʼ apnartetʼ hõe nijorgete apnar lạgitʼ hõ ona dãṛẽ samaṅ hoyokʼtaea.

⁴ Maraṅ naeke hoyokʼ reakʼ man do okoe hõ apnarte bae hatao daṛeakʼa, menkhan Isor okoeye hohowae unige ona reakʼ man doe ńama, cetʼleka Isor do Aron maraṅ naeke hoyokʼ lạgitʼe hohowade tahẽkan.

⁵ Katha do Mạsire hõ khaṭaokʼgea. Mạsi do apnarakʼ sanate maraṅ naeke hoyokʼ lạgitʼ apnarte do bae usullena, Isorge noa mente ona manote dan akawade tahẽkana. Am do ińren Hopon kanam, teheńge amren apatiń hoyena.

⁶ Onkage Isor do ar mitʼ jaegareye menakada, am do jaejug hạbicʼ naeke kanam, Melkisedek reakʼ dhara lekate.

⁷ Okoe gocʼko khone rukhiyạ daṛeae uni Isor ṭhen Jisu do noa dhạrtire tahen jokhecʼ ãṭ aṛaṅte rakʼateye nehõrade tahẽkana are koeleda. Ar bhokti sãote batao tahẽkantaete Isor do uniyakʼ koejoṅe ańjomletʼtaea.

⁸ Menkhan Isorren Hopon hoykatere hõ uni do duk saset talate batao reakʼe cetʼleda.

⁹ Nonkate tinreye sạbit ocoyena unre acʼakʼko bataotae sanamko lạgitʼ jaejug bańcaokʼ reakʼ hore hoyena.

¹⁰ Isor do Melkisedek leka maraṅ naeke menteye ńumkedea.

Biswạs khon alo pạcokʼ reaṅ cehaona

¹¹ Noa reaṅ ạḍi utạr katha mementeakʼ menakʼ talea, menkhan ona reakʼ bhed bhaṅgao do muskilgea, ente Jiu reakʼ sạritetʼ ape do algate bape bujhạu daṛeakʼkana.

¹² Nunạkʼ dinte ape do guru hoyokʼ lek tahẽkantapea, menkhan ona bodolte Isorakʼ katha reakʼ arhõ gonḍa khon sikhnạt emape lạgitʼ cecetʼicʼakʼ jạruṛ paṛao akana. Keṭecʼ jomakʼ bodolte kạṭicʼ gidrạko leka arhõ ape do toa ńũũ reakʼ jạruṛ paṛao akatʼpea.

¹³ Okoe toa ńũnũteye ạsulokʼkan uni ma ńit hõe balege, ar dhorom jion reaṅ oka sikhnạt menakʼtae onate hõe balegea.

¹⁴ Okoekoakʼ umer hoyakan eken onkoge keṭecʼ jomakʼko jom daṛeakʼa, metakʼme Isorakʼ katha reakʼ keṭecʼ sikhnạtko bujhạu daṛeakʼa. Ar ạḍi dhao hewakʼte onko do bhage bạṛicʼko bichnạu daṛeakʼa.