Ibriko 4 - সান্তালী বাইবেল

Isorren hoṛko lạgitʼ jirạu

¹ Isorakʼ jirạu joṅ jaegate bolokʼ reakʼ oka gokʼakʼ tahẽkan ona gokʼakʼ do ńit hõ abo lạgitʼ menakʼgea. Onate abo do sontorakae tahen jạruṛ tabona, jemon okoe hõ ona gokʼakʼ reakʼ bhor khon bin lek mente aloe ńamokʼ.

² Israelko ṭhen cetʼleka bhage sombat lại jạhirlen, onkage abo ṭhen hõ lại jạhir akana. Menkhan ona bhage sombatre Israelkoakʼ jãhãn porho do baṅ hoyakana, ente onko do ańjomkate onare bako pạtiạulena.

³ Menkhan abo do bon pạtiạu akana ar uniyakʼ ona gokʼakʼ reakʼ jirạukʼ jaegare bon boloakana. Ar noa jirạukʼ reaṅ do Isore menakada, “Onate iń do edrete kiriạyenteń menleda, ‘onko do ińakʼ jirạukʼ jaegate ohoko bolo daṛelena.’ ” Menkhan noare jãhãn bhul bạnukʼa je, dhạrti sirjạu tayom Isorakʼ kạmi sạten khan jirạukʼ ehopʼena mente.

⁴ Sonot sostorre mitʼ jaegare eae mãhã hilokʼ reaṅ nonka olakana, “Isor do eae mãhã hilokʼre cetʼge bae kạmileda.”

⁵ Uni do arhõe menakada, “Onko do ińakʼ jirạukʼ jaegare baṅgeko bolo ńama.”

⁶ Nitokʼ noa katha do ṭhikgea je, adom hoṛ do uniyakʼ jirạu joṅ jaegareko bolokʼa; Menkhan okoe Israelko ṭhen pạhilte bhage sombat lại jạhirlen, onko do bebatao iạte Isorakʼ jirạu joṅ jaegare bako sen daṛeatʼ tahẽkana.

⁷ Onate Isor do pạhilre Israelko ṭhen cetʼlekae menletʼ ṭhik onkage ḍher din tayom Dạud raj hotete arhõe menakada, teheń uniyakʼ aṛaṅpe ańjomle khan, uniye meneda, “Apeakʼ ontor do alope keṭejtapea.” Noa kathate uniyakʼ jirạu joṅ jaegare bolokʼ lạgitʼ Isor do ar mitʼṭecʼ okteye niṭakatʼ tahẽkana ar ona reakʼ ńutume dohoakatʼ tahẽkana Teheń.

⁸ Ente Josuạ do ona jirạu joṅ jaegare Israelkoe idileko khan honaṅ Isor do tayomte ar mitʼṭecʼ eṭakʼ din reakʼ katha ohoe roṛlea.

⁹ Enḍekhan ńelokʼkana, Isorren hoṛko lạgitʼ jirạukʼ reakʼ ạt do menakʼ hataṛgea,

¹⁰ ente Isor do cetʼleka acʼakʼ sirjạu reakʼ kạmi sạtkateye jirạulena onkage okoe Isorakʼ jirạu joṅ jaegareye calakʼ, uni hõ uniyakʼ kạmi khon jirạue ńama.

¹¹ Onate dela, ona jirạu ńam lạgitʼ bon ahkaokʼma. Okoe hõ jemon onko bebatao Israelko leka Isor bemanotete uniyakʼ jirạu khon aloko eṛanokʼ.

¹² Isorakʼ katha do jiwetʼgea ar jojaoakʼ kangea ar dene banar dharanakʼ tarwaṛe khon hõ bạ̃ṛti lasergea. Noa katha do manwa jiwi ar jiu, uṭi ar tumul hạṭiń begar hạbicʼ hõ sobokʼakʼ kana ar manwa ontor reakʼ sanam monejoṅakʼ ar hudisko biḍạu aṭkarakʼ kana.

¹³ Sirjon reakʼ okaṭakʼ hõ Isor ṭhen do okoanakʼ bạnukʼ anaṅ. Okoe ṭhen aboakʼ hisạb emokʼ hoyokʼ uni ṭhen do sanamakʼge oṭakʼgea ar sodorgea.

Jisu kangeae maraṅ naeke

¹⁴ Onate dela, abon do hamesate Isorren Hopon Jisure aboakʼ pạtiạu bon aṅgoc ma, ente uni kangeae aboren maraṅ naeke, one okoe do sermare senkate ńit Isor samaṅre menae.

¹⁵ Aboren maraṅ naeke do nonkanicʼ doe baṅkana one okoe aboakʼ ńijortetʼre abo tulucʼ duk bae ńam, ente abo leka uni hõ joto secʼ khonge kại reakʼ biḍạu samaṅreye teṅgolena menkhan bae kạileda.

¹⁶ Onate dela, dil salakʼ Isorakʼ daya reakʼ siṅghạson ṭhen bon sen sorokʼma, jemon jạruṛa bon oktere onḍe khon uniyakʼ daya ar goṛo bon ńam daṛeakʼ.