Ibriko 3 - সান্তালী বাইবেল

Jisu do Mose khon hõe maraṅgea

¹ Onate E sonot boehako, okoe do serma rajren ạidạriko hoyokʼ lạgitʼ uniyakʼ hohoakʼren bakhradarkope hoyakan, ape do Jisu reaṅ moneyakʼpe. Ente okoere bon pạtiạu akan uni kangeae Isor ṭhen khon kol ocoyicʼ do ar maraṅ naeke hõ unige.

² Isorakʼ gharońjren hoṛko ńel todarotkore Mose cetʼleka pạtiạricʼe tahẽkan onkage Jisu okoeye bachao bahallede uni Isor ṭhen hõ uni do pạtiạrgeye tahẽkana.

³ Oṛakʼ bekʼnaokạnicʼ do cetʼleka ona oṛakʼ khon bạ̃ṛti manote ńametʼkan, onkaleka Isor do Mose khon hõ Jisuge bạ̃ṛti ṭhonok ńam lek kanae menteye hudiskedea.

⁴ Mitʼke mitʼ oṛakʼ do jãhãe baṅ jãhãe hotete benaokʼ kana, menkhan Isorge sanamakʼ doe benaoakada.

⁵ Sạrige Mose do Isorakʼ gharońjren sapʼdapʼicʼ lekate pạtiạricʼe tahẽkana, jemon uni do darakan dinkore okaṭakʼ roṛogokʼ ona reaṅ gohae emdaṛeakʼ.

⁶ Menkhan Mạsi do ona gharońj reakʼ dạyike ńamakatʼ Hopon lekate pạtiạricʼe tahẽkana. Aboakʼ sạri as iạte monre oka dil ar rạskạ hijukʼ, onare mucạtʼ hạbicʼ teṅgo ṭak akae bon tahen, enḍekhan aboge Isorakʼ gharońjren hoṛ bon hoyokʼa.

Bin pạtiạukʼre sontor reaṅ

⁷ Ona iạte sonot Jiue menleda, “Teheń ape do uniyakʼ aṛaṅpe ańjomle khan

⁸ uniye meneda, aperen hapṛamko leka apeakʼ ontor do alope keṭejtapea. Onko do hahaṅkarre iń upạrteko teṅgolente ińko biḍạuledińa.

⁹ Aperen hapṛamko do onḍeko biḍạu aṭkarledińa, ar pongel serma hạbicʼ ona okteren hoṛko do ińakʼ kạmiko ńelleda.

¹⁰ Iń do onko cetanre ạṛislenteń menleda, ‘noko hoṛakʼ ontor do bạṛicʼ secʼ ạcur baṛaekana; onko do ińakʼ hor bako baḍaelakʼa.’

¹¹ Onate iń do edrete kiriạyenteń menleda, ‘onko do ińakʼ jirạukʼ jaegare baṅgeko bolo ńama.’ ”

¹² E boehako, sontor akae tahenpe! Ape modre okoeyakʼ monrehõ bạṛicʼ ar bepạtiạu jemon alo tahen. Nonkan mon do jiwetʼ Isor khon pharakokʼa.

¹³ Ona khon tinạkʼ din sonot sostorre “Teheń” katha menogokʼkan, ona reakʼ din hilokʼge ape do apekore udgạu emokʼpe, jemon ape modre okoeyakʼ mon hõ kại reakʼ lilkạrte alo keṭejokʼtape.

¹⁴ Ente pạhilre okaṭakʼ bhorsa tahẽkan, onare mucạtʼ hạbicʼ teṅgo ṭak akan bon tahẽlen khan, abo do Mạsi tulucʼ bakhradarko bon hoyokʼa.

¹⁵ Ente ńit hõ nonka roṛogokʼ kana, teheń uniyakʼ aṛaṅpe ańjomle khan, uniye meneda, “Aperen hapṛamko leka apeakʼ ontor do alope keṭejtapea.”

¹⁶ Ar okoe baṅ Isorakʼ katha ańjomkate hõ uniko ạṛis ocolede? Onko do cetʼ noko hoṛ doko baṅkana one okoeko Mose do misor disạm khone oḍok ạguletʼko?

¹⁷ Okoe upạrte Isor do pongel bochor hạbicʼe ạṛislena? Onko do cetʼ noko hoṛ doko baṅkana one okoe doko kại akatʼ tahẽkan, ar okoe do hahaṅkarre mạ̃ṛĩ tahẽkantako?

¹⁸ Ar okoeko ṭhen baṅ Isor doe kiriyạlenteye metatʼko tahẽkan, onko do uniyakʼ jirạukʼ joṅ jaegate bako bolo ńama? Onko do cetʼ nokoko hoṛ doko baṅkana one okoe do bako pạtiạuadete uniko bemanotlede?

¹⁹ Arbon ńeleda, bepạtiạu iạte onko do Isorakʼ jirạukʼ jaegate bako bolo daṛeada.