Ibriko 2 - সান্তালী বাইবেল

Kại khon bańcaokʼ reaṅ

¹ Onate oka bon ańjomakatʼ ona manao lạgitʼ arhõ moneyakʼ lek tabona, jemon ona khon alo bon pharakokʼ.

² Serma goḍet hotete okaṭakʼ katha lại jạhirlen ona ma bacoṅ hante natelen; ona chaḍa jãhãege Isorakʼ hukume bebatao akatʼ ar uniyakʼ katha bae ańjometʼkan uni do acʼakʼ hok reakʼ kuṛạiye ńamakada.

³ Enḍekhan kại khon bańcaokʼ lạgitʼ Isor okaṭakʼ maraṅ bondobose dohoakatʼ ar ona babon bạsutakʼ khan enḍekhan cekate bańcao dobon ńama? Kại khon bańcao ńam reakʼ katha do pạhilre Probhu Jisugeye menleda ar okoe onako ańjomletʼ onko do ona bańcaokʼ reakʼ sạriạkʼtetʼ abo ṭhenko sạbud akada.

⁴ Ona salakʼ Isor hõ ạḍi utạr cinhạko ar hahaṛawakʼko ar daṛe kạmiko ar acʼakʼ monejoṅ leka sonot Jiuakʼ daya dankote ona reaṅ gohae emakada.

Kại khon babańcaoicʼ do Jisuge

⁵ Darakan okaṭakʼ puri reakʼ kathale roṛetʼkan, Isor do ona serma goḍetkoakʼ gobolre bae dohoakada.

⁶ Sonot sostorre mitʼ hoṛ do noa gohae emakada; Manwa doe celekante, uni reakʼem dạndikʼkana? Ar manwa Hopon baṅe celekante, uniyakʼ kom moneyakʼkana?

⁷ Manwa do serma goḍetko khon thoṛaganem huḍiń akadea. Ar uni do ṭhonok ar manot reakʼ mukuṭem horokʼ akawadea.

⁸ Sanamakʼge uniyakʼ jaṅga latarrem gobol akada. Isor do sanamakʼge tinre manwa gobolreye dohokeda unre ona khon do cetʼge bae sarecʼlakʼa. Menkhan ńitokʼ sanamakʼge manwa gobolre bon ńeletʼ kana ona do baṅ,

⁹ menkhan abo do Jisu bon ńelńame kana. Uni do serma goḍetko khon thoṛa ghạṛicʼe huḍiń ocolena, jemon Isorakʼ dayate mimitʼ manwako lạgitʼ jiwiye em daṛeakʼ. Uni do duk sahaokateye gocʼlente man ar ṭhonok reakʼ raj mukuṭe dan akawadea.

¹⁰ Sanamakʼ do Isor lạgitʼ kangea ar uni hotetege sanamakʼ do hoyakana. Onate ạḍi utạr hoponko acʼakʼ mạhimaren bhạgiyạdarko hoyocoko lạgitʼ Jisu do duk jom talate sạbit ocoye reakʼ lek tahẽkantaea.

¹¹ Ente sonot ocoyicʼ hõ ar sonot ocokʼko hõ mitʼṭecʼ khon kangeako. Onate Jisu do onko hoṛko boeha mente hohowako do bae lajaokʼ kana.

¹² Sonot sostorre uni do Isore metaekana, “Boehako ṭhen iń do am reaṅgeń lại jạhira, ar kạlisiạre amiń gun manao joharama.”

¹³ Jisu do arhõe meneda, “Iń do Isor cetanre bhorsa akaniń tahena.” Ar mitʼ jaegare uni doe meneda, “Nokʼõe ńelme, iń ar onko hoponko one okoeko do Isore emakawạdiń.”

¹⁴ Onko gidrạko doko hoyokʼ kana mãyãm ar jelren manwage. Onate Jisu acʼtetʼ hõ jel ar mãyãmren manwae hoyena, jemon gujukʼ reakʼ daṛe okoeyakʼ tire menakʼ uni Soetan do acʼakʼ gujukʼ hoteteye bhagaoe.

¹⁵ Ar gujukʼ botorte okoe jiwetʼ jonom golamko tahẽkan onko jemone chaḍaoko.

¹⁶ Jisu do serma goḍetko bae goṛowakoa, menkhan Abraham bõsrenkoge uni doe goṛowakoa.

¹⁷ Onate Jisu do sanam secʼte acʼren boehako leka hoyokʼ hoylentaea, jemon uni do mãyãwan ar pạtiạranicʼ maraṅ naeke lekate Isorakʼkoe sapʼsor daṛeakʼ. Ar noa reakʼ monsubạ do hoyokʼ kana, jemon acʼakʼ gujukʼte manwakoakʼ kạiye ocogte Isore kusi ocoye.

¹⁸ Ar acʼge biḍạu sahaokate sasete jomletʼte uni do biḍạu ocokʼkankoe goṛo daṛeakoa.