Ibriko 10 - সান্তালী বাইবেল

Mạsi do mitʼ dhaogeye dãṛẽyena.

¹ Ạn-ạrikore menakʼakʼko do darakan sanam bhageakʼko reaṅ umulkana; onare sạriyakʼ reakʼ maraṅteakʼko do bạnukʼa. Onate okoe Isor sewa lạgitʼko hijukʼkan onko do ạn-ạrikote tishõ bochor ke bochor mitʼ lekan janwar dãṛẽte ohoe sạbit oco daṛelekoa.

² Ạn-ạriteko sạbit oco daṛelen khan, enḍekhan janwar dãṛẽge cabakokʼa honaṅ, ente dewa sewayetʼko do mitʼ dhaoregeko saphalen khan kại lạgitʼ apnar do dusi mente ohoko bujhạukokʼa.

³ Menkhan noa janwar dãṛẽ do jao bochorge akoakʼ kại reakʼ kathakoe disạ ocokoa.

⁴ Ente ḍaṅgra ar meromkoakʼ mãyãmte kại do tishõ baṅ meṭao daṛeakʼa.

⁵ Onate Mạsi noa dhạrtiteye hijukʼ jokhecʼ Isore metade tahẽkana, “Janwar ar eṭakʼ dãṛẽ do bam khojlakʼa, menkhan iń lạgitʼ mitʼṭen hoṛmogem tearkeda.

⁶ Jeredokʼakʼ dãṛẽ ar kại lạgitʼ dãṛẽre am do bam kusilena.

⁷ Tayomte ińiń menkeda, ‘nõkʼõe, iń hecʼakana; sostorre ińakʼ hijukʼ reaṅ olakana. E Isor, iń do amakʼ sana purạutam lạgitʼgeń hecʼakana.’ ”

⁸ Cetan reakʼ kathakore pạhilte Mạsiye meneda, “Janwarko ar eṭakʼ dãṛẽko, jeredokʼakʼ dãṛẽko ar kại ńutumte dãṛẽko, am do bam khojlakʼa ar onare kusi hõ bam kusilena.” Noa dãṛẽko do ạn-ạri reakʼ hukum lekage hoyokʼkan tahẽkanre hõ uni do noa kathae roṛleda.

⁹ Ona tayom Mạsiye meneda, “Ńelme, iń do amakʼ sana purạutam lạgitʼgeń hecʼakana.” Dosarakʼ bondobos bahal idi lạgitʼ uni do lahateakʼ bondobose bạtilkeda.

¹⁰ Isorakʼ sana lekage Jisu Mạsiyakʼ hoṛmo mitʼ dhao samaṅente abo dobon begar ocoakana.

¹¹ Mimitʼ naekeko do dinạmge teṅgokate Isorko sewawae kana ar mitʼ talao inạ mitʼlekage dãṛẽko samaṅeda, menkhan nonkan dãṛẽte kại do tishõ ohoko ocokʼ daṛelea.

¹² Menkhan Jisu do kại ńutumte jaejug lạgitʼ eken mitʼṭen dãṛẽye samaṅketʼte Isorakʼ jojomsa aṛereye duṛupʼena.

¹³ Ar tin hạbicʼ acʼren bạiriko acʼakʼ jaṅga latarre ạuriye dohoko unhạbicʼe ńel hohorkana,

¹⁴ ente Isorakʼ monsubạ lekate okoeko begar ocoakan ona mitʼṭen dãṛẽ hotete uni do jaejug hạbicʼ onkoe sạbit ocoakatʼkoa.

¹⁵ Sonot Jiu hõ noa reaṅ gohae emabon kana. Pạhilre uniye menakada,

¹⁶ Probhu Isore meneda, “Onko tulucʼ oka bondobos iń bandhaoa ona do noage, ińakʼ ạn-ạri do onkoakʼ ontorre hõń dohoya ar onkoakʼ monre hõń ol dohokakʼa.”

¹⁷ Ona tayom sonot Jiue meneda, “Iń do onkoakʼ kại ar bedhoromakʼko tishõ baṅgeń disạ dohoytakoa.”

¹⁸ Onate Isor do tinre kại ar bedhoromakʼkoe ikạiya unre kại ńutumte dãṛẽ mente samaṅokʼ do ar cetʼge baṅ tahena.

Ṭarhao akae tahen lạgitʼ sopolha

¹⁹ Ado E boehako, Jisu Mạsiyakʼ mãyãm gunạkʼte ona sonot utạrakʼ jaegare bolokʼ reakʼ dil do menakʼ getabona.

²⁰ Mạsi do abo lạgitʼ mitʼṭecʼ nãwã ar jiwetʼ hore jhicʼ akada, jemon abo do orwal bhitrite, metakʼme uniyakʼ hoṛmo talate Isor samaṅre bon seṭer daṛeakʼ.

²¹ Ona chaḍa aboren do mitʼṭen maraṅ naeke hõ menae tabona, one okoere Isorakʼ gharońjren hoṛkoakʼ dạyike emakan.

²² Onate pạtiạu talate oka khạṭitetʼ hijukʼkan, ona sạbit utạrakʼ khạṭi ontorte Isor samaṅre bon calakʼma; ente dusi bibek reakʼ ti khon aboakʼ ontor do mãyãm chiṭiạukate sapha ocoakana ar phạriạ dakʼte hoṛmo do um sapha akan tabona.

²³ Biswạs lekate aboakʼ oka as menakʼ, onate dela, kajakte uniyakʼ katha bon aṅgoc ma, ente okoeye gokʼ akatʼ uni doe pạtiạrgea.

²⁴ Dela, mimitʼko reaṅ bon dạndikʼma jemon dulạṛ ar bhage kạmi lạgitʼ mimitʼko uskur bon emako.

²⁵ Adom adom hoṛakʼ mitʼ ṭhecʼ jarwakʼ reakʼ cetʼleka hewa menakʼtako, onka leka jarwakʼ do alo bon bạgi ma, bickom Mạsiyakʼ hijukʼ din hạbicʼ mimitʼko jemon arhõ bon udgạuko.

²⁶ Isorakʼ sạriyakʼtetʼ baḍaekate hõ dikhitege bon kại khan, enḍekhan kại ńutumte ar jãhãn dãṛẽ do bạnukʼ anaṅ;

²⁷ bickom eken bicạr reakʼ botoranakʼ ghuṛi ar Isorren bạiriko lo torocʼko leka jolokʼkan edrege ńelhor akae tahen hoyokʼa.

²⁸ Jãhãe Moseyakʼ ạn-ạri bae aṅgoc khan uni do jãhãn daya baṅkate bar se pe hoṛakʼ goha iạteye gocʼ ocokʼa.

²⁹ Enḍekhan Isorren Hopon okoeye kurud akawade, oka mãyãmte uniye sapha akan Isorakʼ ona bondobos reakʼ mãyãm okoe be sonotakʼ menteye bujhạuetʼ ar okoe dayae emokʼkan uni sonot Jiu okoeye bemanot akade, enḍekhan hudispe, uni do tinạkʼ artetʼ sạjạiyokʼ lek kanae!

³⁰ Ale do unile baḍae akadea one okoeye menetʼkan, “Hala hạli do ińakʼge, ińgeń hala ruạṛa; okoe okaṭakʼ ńam lek kane uni do onageń emaea.” Uni do arhõ mitʼ jaegareye meneda, “Probhu Isorge acʼren hoṛko lạgitʼ hok reakʼe bicạra.”

³¹ Jiwetʼ Isorakʼ tire paṛaokʼ do ạḍi botoranakʼ kangea.

³² Laha dinko reakʼ katha disạipe. Unre marsal ńamkate ape do duk jom talate hõ teṅgo ṭak akaepe tahẽkana.

³³ Oka oka okte do sanamko samaṅre tamasakope hoyocolente opoman ar santao sahaokate dukpe jomleda; ar okoeko cetanre onkan beohar hoylen onko tulucʼ hõ ape do dukpe sahaokeda;

³⁴ ar okoeko hajot ocoakan tahẽkan onkoakʼ duktepe duklena. Apeakʼ jinisko luṭlenre rạskạ salakʼpe manaoleda, entepe baḍaekan tahẽkana, arhõ bhage ar jaejug dhon menakʼtapea mente.

³⁵ Onate ape do dil alope aṛakʼ giḍitapea, ente noa reakʼ kuṛại do maraṅgea.

³⁶ Ape do sombhuri reakʼ jạruṛ menakʼtapea, jemon Isorakʼ sana leka kạmi purạukate okae gokʼ akawatʼpe ona jemonpe ńam;

³⁷ ente Isorakʼ katha leka, “Okoeyakʼ hijukʼ reakʼ katha menakʼtae uni do ar thoṛa din khangeye hijukʼa, ar bae biloma.

³⁸ Okoe hoṛ dhorom menteń ataṅ akade uni do pạtiạu hotetege jione ńama; menkhan jãhãegeye ruạṛ calakʼ enḍekhan unire do kusi bạń tahena.”

³⁹ Okoe ruạṛ senkateko maraokʼkan onko dolren dobon baṅkana; menkhan pạtiạukʼte okoe bańcaoko ńam onko dolren kangea bon.