Hosea 8 - সান্তালী বাইবেল

Probhu Isor do Israel murhutʼ sewa iạteye dusiyedea

¹ “Am do siṅgạ oroṅme. Probhu Isorren hoṛko upạrte bạiri do pajhaṛ cẽṛẽ lekae hijukʼkana, ente hoṛko do iń emakʼ bondobos reakʼko bebatao akada ar ińakʼ ạn-ạri upạrteko hul akada.

² Israel do iń ṭhen rakʼ rakʼteye menetʼkana, ‘E ińren Isor, ale do amle aṅgocetʼmea.’

³ Menkhan okaṭakʼ bhageakʼ kan Israel do onae nihạ̃t giḍi akada, onate bạiri do uniko khudạu baṛayea.

⁴ Ińakʼ hukum chaḍage onko do rapajko bahal akatʼkoa; ińakʼ hukum chaḍage onko do mukhiyạko bachao akawana. Onko do sona ar rupạren boṅgako benaoetʼkote sorbonasreko paṛaokʼkana.

⁵ E Samariạ, amren mĩhũ-boṅga doń nihạ̃t giḍi akadea. Ar onako upạrtege ińakʼ edre seṅgel do jolokʼkana. Bogekʼ lạgitʼ amren hoṛ do ar tinạkʼ din lagaoakoa?

⁶ Israelren hoṛge uni mĩhũ doko benao akadea. Mitʼṭen kạrigolge uni doe benao akadea; onate uni do Isor doe baṅkana. Samariạren uni mĩhũ hopon doe rạputʼ gejer ocokʼa.

⁷ “Onko do hoegeko era ar sesre do hoe bharḍoko irạ. Phosol reakʼ gelere do jãhãn danage bạnukʼa; ona khon holoṅ do ohoge ńamlena. Ar onare jãhãnakʼge hoyokʼ ona do bidisiạ hoṛgeko jom cabaea.

⁸ Israel doko utʼ ocoakana; bạṛicʼakʼ jinis leka onko do ńitokʼ eṭakʼ jạtrenko talare menakʼkoa.

⁹ Onko do eskar eskar ạcur baṛaekan bir gadha leka Ạsur hạbicʼko sen akana. Ar Ephrayim do ṭakate dulạṛiạkoe ạgu akawana.

¹⁰ Onko do eṭakʼ jạtrenko sãote ṭakateko gate akanre hõ iń do mitʼ domte jarwakateń sạjạikoa. Onko do disạm cakʼlaokoren rapajkoakʼ santao iạteko caba utạrokʼa.

¹¹ “Ephrayim do acʼakʼ ghạṭko sạṅgińtae lạgitʼ aema pinḍkoe benao akawana, menkhan onako do kạkại reakʼ pinḍkantaea.

¹² Ińakʼ ạn-ạri reakʼ ḍher kathage onko lạgitʼ iń olleda, menkhan onko do bidisiạ hoṛkoakʼ jãhãnakʼ jinis menteko hudisleda.

¹³ Iń ńutumte janwar samaṅkate onko do ona reakʼ jelko jojomkana menkhan iń Probhu Isor do onkore kusi bạnuńa. Ńitokʼ iń do onkoakʼ dusṭạmi reakʼ kathań disạite kại reakʼ sạjạiyiń emakoa; ar onko do Misorteko ruạṛ calakʼa.

¹⁴ Israelren hoṛ do akoren sisirjạuicʼ hiṛińkate maraṅ maraṅ oṛakʼko benaojoṅ kana; Ar Jihudạren hoṛko hõ pạcrite nagrahako esetʼ ạcurakada. Menkhan Iń do onkoakʼ nagrahako cetanre seṅgeliń kola ar ona do onkoakʼ sanam gaṛkoe jarkhartakoa.”