Hosea 7 - সান্তালী বাইবেল

¹ Ińren hoṛkoakʼ dosa tinre ạcur ruạṛtakoń mena, ar tinre Israel bogeye reakʼ iń khoja, unrege Ephrayimakʼ kại do ńelokʼkantaea ar Samariạwakʼ do behokakʼko sodorokʼkana. Onko doko ekʼṛegea, oṛakʼre kombṛo doe bolokʼkana ar ḍạkuko do bahrereko luṭjoṅ kana;

² menkhan onko do bako bujhạueda je, onkoakʼ sanamakʼ kạmi reakʼ iń disạ dohoyeda mente. Onkoakʼ kại do purạtegeye gherao esetʼ akatʼkoa; onako do jao oktege iń samaṅre menakʼa.

³ “Onkoakʼ dusṭạmi iạte onko do raj ar eṛeyakʼ kathate kạmiyạ hoṛko rạskạ ocoyetʼkoa.

⁴ Onko jotoge laṭghaṭko kanako, onko do piṭhạ rapakʼicʼakʼ jolokʼkan culhạ leka; holoṅ sipi khon ehopʼkate ona phulạu rakabokʼ hạbicʼ one ona reakʼ seṅgel do uskurakʼ baṅ jạruṛ.

⁵ Rajakʼ porob hilokʼre kạmiyạko do darkha rasa reakʼ tạpisteko ruạ utạrlena ar raj do onko landa dhudhutʼkan hoṛko sãote tiye milạuketʼtaea.

⁶ Menkhan onko do tinreko phor phundikeda unre onkoakʼ ontor do culhạ leka dugur dugur jollentakoa. Onkoren piṭhạ bekʼnaoko do goṭa ńindạko jạpitʼkeda ar setakʼ jokhecʼ ona phor phundi do bhaṭa seṅgel leka jolentakoa.

⁷ Ar jotokoge culhạ lekako dhipạuena ar akoren disạm cakʼlaoko do seṅgel lekako jeretʼ cabaketʼkoa. Onkoren rapaj do sanamgeko gocʼena; ar onko do okoege bako hohowạdińa.

⁸ “Ephrayim do eṭakʼ jạt jạtrenko sãoteye mesaokʼkana; uni do baṅ ulṭạu akatʼ piṭhạ kanae.

⁹ Bidisiạko do uniyakʼ daṛeko jom akatʼtaea, menkhan uni do ona bae bujhạu daṛeakʼkana. Uniyakʼ bohokʼ reakʼ upʼ do hanḍe nanḍe ponḍ akantaea, ar ona hõ bae kheyal akada.

¹⁰ Israelakʼ bạḍại do uni upạrte gohae emetʼkana, menkhan noako hoykate hõ uni do acʼren Probhu Isor ṭhen bae ruạṛ hijukʼkana.

¹¹ “Ephrayim do mitʼṭen bebuj parwa leka kanae; uni doe lelhagea. Uni do ghane Misore hohoaekana ar ghane do Ạsur ṭhene calakʼkana.

¹² Ar onko tinreko senokʼa unre iń do onko cetanre jhạliń capada; ar coṭren cẽṛẽko leka onkoń or pheḍkoa. Israelko ṭhen cetʼ leka roṛ hoylen onkage onko doń sạjạikoa.

¹³ Hae onko do, ente onko do iń ṭhen khon bạṛicʼ horteko calao akana. Onko do sorbonas hoyokʼtako ma, ente iń upạrteko hul akada. Onko chaḍaokoń khojkangea menkhan onko do iń upạrte eṛe kathako roṛeda.

¹⁴ Onko do akoakʼ aṭetʼreko homor halaṅeda, menkhan ontor khon iń ṭhen do bako rakʼeda. Anaj ar nãwã darkha rasa ńam lạgitʼko jarwakʼkana ar iń upạrteko hulletʼkana.

¹⁵ Iń do lạṛhại reakʼ cecetʼakʼ iń em akatʼkoa ariń daṛe ocoakatʼkoa, menkhan onko do iń upạrtege bạṛicʼakʼko soṛojontroyetʼ kana.

¹⁶ Onko do Bakʼal secʼko ạcur akana; onko do peṛta akʼ lekako hoyakana. Onkoren mukhiyạko do tarwaṛeteko gujukʼa, ar onate Israelko do Misor disạmre landa dhutʼkoko hoyokʼa.