Hosea 4 - সান্তালী বাইবেল

Probhu Isor do Israelkoe dusiyetʼkoa

¹ E Israelko, ape do Probhu Isorakʼ katha ańjomtaepe, ente okoe disạmreko tahenkan onko upạrte Probhu Isor do mitʼṭecʼ mambla menakʼtaea. Ona do hoyokʼkana, disạmre pạtiạr ar asambheṛ dulạṛ do bạnukʼa ar Isor do okoehõ sạriyakʼ lekate bako baḍaeyede kana;

² eken eṛe kiriạ, eṛe katha, khũn, kombṛo ar laṭghaṭ menakʼtakoa. Onko do ạn bako manaoeda ar mãyãm cetan mãyãmko joro ocoyetʼkana.

³ Ona iạte disạm doe homor halaṅeda ar okoe uni talareko tahen kan onko doko marao utạrokʼ kana ar janwarko, cẽṛẽko ar hako hõko gocʼ cabakʼ kana.

Probhu Isor do naekekoe dusiyetʼkoa

⁴ Probhu Isore meneda, “Okoe hõ onko upạrte do aloko mamblae ma, okoehõ eṭakʼko aloko dusiko ma, ente ape do onko hoṛ lekape hoyakana okoe do naekeko upạrte mamblako ạguiyetʼkan.

⁵ E naekeko, ape do siń ar ńindạpe tohodokʼkana ar ape sãote nạbiko hõko tohodokʼkana. Onatege iń do aperen gogo Israel doń marao utạrea.

⁶ Isor reaṅ ạkil begorte ińren hoṛko doko maraokʼkana. Ona ạkil bape moneyakʼkante iń hõ ińren naeke menkate bạń moneyape kana. Ape do aperen Isorakʼ ạn-ạrikope hiṛińakada, onate ińhõ aperen hopon ar hoponera koń hiṛińkotapea.

⁷ “Naekeko tinạkʼko saṅge idikʼkan unạkʼge onko do iń upạrteko kạiyeda, ona iạte onko do manot bodolteń bemanotkoa.

⁸ Ińren hoṛkoakʼ kại gunạkʼte onkoakʼ do lab hoyokʼ kana ar ińren hoṛko kại lạgitʼko udgạuetʼkoa.

⁹ Hoṛko cetʼlekań sạjạiko onkage naekeko hõko sạjại ocokʼa; onkoakʼ colon iạte onko jotogeń sạjạikoa ar onkoakʼ kạmi lekate kuṛạiyiń emakoa.

¹⁰ Onko doko jomgea menkhan bako tirpitokʼa; onko doko laṭghaṭa menkhan lekhare bako ḍherokʼa, ente onko do boṅgako iạte Probhu Isorko bạgi giḍi akadea.

¹¹ “Loṭghuṭi ar nãwã ar mare darkha rasage ińren hoṛkoakʼ bud doe nosṭo akatʼtakoa.

¹² Onko do kaṭren boṅgako ṭhen sopolhako hataoeda ar kaṭ reakʼ ṭheṅga do onkoe hukumakoa, ente loṭghuṭi reakʼ mon do bạṛicʼ horteye idi akatʼkoa; onko do akoren Isor ṭhen bepạtiạranko hoyakana.

¹³ Buru reakʼ cuṛạkore onko do janwar dãṛẽko samaṅetʼkoa ar buru cetan reakʼ Elon, Libni ar Ela dare buṭạko reakʼ umulre dhupko jeretʼeda. Ona iạte aperen hoponerako do kusumbiko hoyokʼtapea ar hoponkoren bạhuko doko loṭghuṭiya.

¹⁴ Aperen hoponerako do kusumbiko hoylenre ar aperen hoponkoren bạhukoko loṭghuṭilere hõ onko do bạń sạjạikoa, ente herelko do apnarge kusumbiko ṭhenko senokʼkana ar mundil kusumbiko sãote janwar dãṛẽko samaṅetʼkoa. Noko bebuj jạtrenko doko marao utạrokʼa.

¹⁵ “E Israel, am dom laṭghaṭ akatʼre hõ Jihudạ do inạ dusire alo jemone paṛaokʼ. Ape do Gilgolte alope senokʼa; Beth-Abentehõ alope calakʼa; Ar ‘jiwetʼ Probhu Isor ńutumteń kiriạkʼ kana’ mente do alope kiriạkʼa.

¹⁶ Israelko do keṭecʼ hoṭokʼan gại leka kanako. Onate ṭạnḍiren bhiḍi hoponko leka Probhu Isor do cekateye gupikoa?

¹⁷ Ephrayim do boṅgako sãoteye mitʼakana; uni do onage onka ocowaeme.

¹⁸ Onko do bubulakʼko tinreko ńũ sạta unre onko do loṭghuṭiko ehoba; onkoren disạm cakʼlaoko do lajao paṛaoakʼ colongeko kusiyakʼa.

¹⁹ Sạjại do hoe leka onkoe oṭaṅ idikoa; onkoakʼ samaṅokʼakʼ porob iạte onko doko lajao ocokʼa.”