Hosea 13 - সান্তালী বাইবেল

Israelko upạrte Probhu Isorakʼ edre

¹ Ephrayim kathae roṛlere hoṛko doko thar tharaokan tahẽkana; Israel gusṭirenko modre uni do maraṅ utạrice hoylena. Menkhan Bakʼal debota sewawae iạte dusiyente uni doe gocʼena.

² Ńitokʼ uniren hoṛko do arhõ ḍherko kại akada; akoakʼ rupạte onko do ako lạgitʼ dul boṅga muṭhạn, metakʼme gạkhuṛ tite boṅgako benao akadea; ar onako do jotoge kạrigolkoakʼ kạmikana. Nui boṅga reaṅ onkoko mena, “Okoe dãṛẽko samaṅetʼkan onko do mĩhũren boṅgako cokʼae ma.”

³ Ona iạte onko do setakʼ reakʼ kuṛhạ ar chanokʼkan sisir dakʼ leka kanako, onko do khạrại khon hoete oṭaṅ calakʼkan bhusạ leka, ar jalna secʼte oḍok calakʼkan dhũạ leka kanako.

⁴ Probhu Isore meneda, “Misor khoniń oḍok ạgu akatʼme khon ińkangeạń amren Probhu Isor do. Iń chaḍa ar eṭakʼ Isor do bạnukʼkoa; iń chaḍa ar cele babańcaoko hõ bạnukʼkoa.

⁵ Hahaṅkarre, ona rohoṛ disạmre iń do amiń ńel jutletʼmea.

⁶ Ar amren hoṛiń jom ocoletʼko tayom onko doko tirpitlena; ar tirpitente onko do bạḍạiteko perecʼena, ar ona tayom do ińko hiṛińkedińa.

⁷ Onatege iń do dhạcri kul leka onko cetanreń hijukʼa, ar hunḍạr leka hor aṛereń tãṛãkʼ tahena.

⁸ Hoponko recʼakade bana eṅga leka iń do onko cetanre jhãpiń ema ar koṛamiń or cirạitakoa. Kul eṅga lekań utʼgotʼkakoa; ar bir janwarko lekań khanḍa khunḍi cabakoa.

⁹ “E Israel, am do iń secʼren dom baṅkana, metakʼme amren gokʼṛoyicʼ secʼrenem baṅkante iń do amiń marao giḍikama.

¹⁰ Amren raj doe okayena one uni amakʼ sanam nagrahakoe rukhiyạ daṛeatam? Amren disạm cakʼlaoicʼ doe okayena one onko reaṅem menetʼ tahẽkan, ‘iń do raj ar disạm cakʼlaoko imạńme?’

¹¹ Onate iń do edrete mitʼṭen rajiń ematʼme tahẽkana ar raṅgaote uni doń uṭhạukedea.

¹² Ephrayimakʼ dosko, metakʼme uniyakʼ sanam kạiko do ol dohoakana.

¹³ Maejiukoakʼ bedonokʼ reakʼ haso lekage uni do bedon rakapʼ akawadea, menkhan uni do bebuj gidrạ leka; okte hoylen khan hõ kukhi reakʼ duạrre bae hijukʼ kana.

¹⁴ “Seoul reakʼ daṛe khon ińge damte uniń chaḍao ạguiyea. Ar gocʼko khon hõń bańcaoea. E gujukʼ, okortam hul? E Seoul, okortam amakʼ moron do? Iń do bạń mãyãkʼa.

¹⁵ Ephrayim do acʼren boehako talareye jo bahakʼre hõ enhõ Probhu Isor ṭhen khon purub reakʼ mitʼṭecʼ hoe do hahaṅkar khoniń rakapʼ ạguiya; ona reakʼ jharna dakʼ do baṅ tahena ar uniyakʼ kũńko hõ rohoṛ cabakʼtaea. Ar uniyakʼ khajańci reakʼ sanam damanakʼ jinisko do luṭ idikʼa.

¹⁶ Samariạren hoṛko do akoren Isor upạrteko hul akatʼte onko do akoakʼ ghạṭko goga. Onko do lạṛhạireko gujukʼa; onkoren huḍiń gidrạko do otreko tawakʼ gejer ocokʼa ar onkoren bhạrti hoṛmo maejiuko do lacʼko getʼ cirạ ocokʼa.”