Hosea 12 - সান্তালী বাইবেল

¹ Ephrayim do hoeye jomeda; uni do goṭa din purub reakʼ hoeye khudạueda ar eṛe katha ar bedhorome ḍhereda. Uni do Ạsurrenko sãoteye bondoboseda ar Misor do jạitun reakʼ sunume kolae kana.”

² Jihudạ upạrte Probhu Isorakʼ mitʼṭecʼ mambla menakʼtaea; Jakobakʼ colon lekate uni doe sạjạiyea ar uniyakʼ kạmi lekate kuṛạiye emaea.

³ Eṅgatakʼ kukhire tahenrege Jakob do acʼren boehawakʼ iḍiye sapʼletʼtaea; ar harakate do Isor sãoteye lạṛhạiyena.

⁴ Uni do Serma goḍet sãoteye lạṛhạilena ar uniye bhagaokedea; ar daya ńam lạgitʼ uni do rakʼ rakʼteye nehõrlena. Uni do Bethelre Probhu Isore ńamledea ar onḍe do Probhu Isor sãote kathaye roṛleda.

⁵ Uni kangeae phạdkoren Probhu Isor do; ar Probhu Isor ńutumtege uni do hoṛko disạiyea.

⁶ Ńitokʼ do E Jakob bõsren hoṛko, aperen Isor ṭhen ruạṛ hijukʼpe; pạtiạranko hoyokʼpe, dhorom reakʼ bicạrpe ar sanam ghuṛi aperen Isor lạgitʼ koyokʼ horre tahenpe.

⁷ Probhu Isore meneda, “Bepari Ephrayim do ṭhok reakʼ tulạgeye beoharetʼkana; uni do julumgeye kusiyakʼkana.

⁸ Uniye mena, ‘iń do ạḍiń kisạ̃ṛ akana, ḍher dhon duribgeń jogaṛ akada. Ińakʼ sanam kạmiko talare hoṛko do ińakʼ dos se kại do bako sendra ńamtińạ.’

⁹ Menkhan E Ephrayim, ińge amren Probhu Isor do; ińge Misor khoniń oḍok ạguakatʼmea. Amakʼ niṭakatʼ porobko reakʼ okte leka arhõ am do tạmbureń tahẽocomea.

¹⁰ Iń do nạbiko ṭhen kathań roṛ akada, onko do ḍher dorsoniń emakatʼkoa ar onko hotete aema kathageń roṛakada.”

¹¹ Gilead do bedhoromteye perecʼgea; uniren hoṛ doko ạuṛiyakʼgea. Onko do Gilgolre ḍher ḍaṅgrako samaṅketʼkoa. Onkoakʼ pinḍko do casetʼkan jumire dhiri ḍạṅko leka ḍhergea.

¹² Jakob do Aram disạmteye dạṛleda; ar Israel do bạhu ńame lạgitʼ din mạjur reakʼe kạmileda ar bhiḍi gupi kạmi hõe kạmileda.

¹³ Probhu Isor do Misor khon Israel ạguiye lạgitʼ mitʼṭen nạbiye beoharledea; uni hotete uniye ńel todarot ledea.

¹⁴ Menkhan Ephrayim do Probhu Isore edre ocokedea; ona iạte uniren Probhu Isor do uniyakʼ bạṛicʼ kạmi lạgitʼ unigeye dạyireye paṛaoea ar uniyakʼ henosta do uniregeye paṛao ocoya.