Habakkuk 3 - সান্তালী বাইবেল

Habakukakʼ koejoṅ

¹ Habakuk nạbiyakʼ koejoṅ

² E Probhu Isor, iń do amakʼ kạmi reakʼ katha ańjomteń botorena. E Probhu Isor, ale okterege onako do arhõ onkaeme; aleakʼ okterege am do onako udukʼaleme. Edrekʼ jokhecʼ mãyãkʼ reakʼ katha do alom hiṛińa.

³ Isor do Teman khone hijukʼkana, uni sonoticʼ do Paran buru khone hijukʼkana. [Sela] Uniyakʼ ṭhonok do sermae tiyokʼakada; dhạrti do uniyakʼ sarhaote perecʼ akana.

⁴ Siń cando lekage uni doe jhak jhakaokʼkana; uniyakʼ ti khon marsal do oḍok hijukʼkana, onḍe uniyakʼ daṛe do danaṅre menakʼtaea.

⁵ Uni laha lahate do mahamạrige calakʼkana; ar uni tayom tayomte do ruạ ar hasoge.

⁶ Uni do teṅgokate dhạrtiye daldalaoeda; ar beṅgetʼte jạt jạtrenkoe thar tharao ocoyetʼkoa. Sedae reakʼ buru-ḍuṅgriko do rạpudokʼkana ar sedae jug reakʼ buruko do rạputʼ ńurokʼkana. Jug hilokʼ khon uniyakʼ hor reakʼ jãhãn bodolge bạnukʼtaea.

⁷ Kusanren hoṛ do nindhạn dosareń ńelketʼkoa, ar Midiạnren hoṛ doko thar tharaokʼkana.

⁸ E Probhu Isor, gaḍako cetanre amakʼ edre do cetʼ caṛhao akana? Amakʼ edre do cetʼ gaḍako cetanrege paṛao akana? Am do cetʼ jalapuri cetanrem ạṛis akana? Ona iạte cetʼ am do amren sadomko ar amakʼ jit reakʼ rãt gạḍikorem decʼ baṛaekana?

⁹ Amakʼ akʼ dom halaṅ rakapʼkeda ar sar do ghũṛạ̃rem lagao akada. (Sela) Ar gaḍakote dhạrti dom hạṭiń akada.

¹⁰ Buru-ḍuṅgriko do am ńelteko dal dalaokʼkana. Ar dakʼ do botorge ạtukʼkana; athantar dakʼ do acʼakʼ aṛaṅe ańjom ocoyeda, ar ḍheoko do cetanreye rakapʼ ocoyeda.

¹¹ Amakʼ ạphir calakʼkan sar reakʼ jhalkaote ar bijli leka amakʼ borlom reakʼ jhak jhakte sermare siń cando ar ńindạ cando dokin teṅgo hapeyena.

¹² Am do edrete dhạrti talatem laha idiyena ar jạt jạtrenkom lebetʼ gańjaoketʼkoa.

¹³ Amren hoṛko bańcaoko lạgitʼ ar amren ojokʼicʼ hoṛ rukhiyạye lạgitʼ am dom oḍok hecʼena. Am do dusṭạmi disạmren mukhiyạm ghạlkedea, ar uniyakʼ disạm do purạtem marao utạrketʼtaea. [Sela]

¹⁴ Am do amakʼ ṭheṅgate uniren lạṛhại hoṛkoren matham sobokʼedea. One onko do chirchạtur cabale lạgitʼ hoe bharḍo lekako hijukʼkan, one onko nandanicʼ oko okote jome lekako rạskạkʼkan.

¹⁵ Amakʼ ạyurte sadom do doreãoko lebḍakeda ar athantar dakʼ doko haḍak ḍabak ocokeda.

¹⁶ Ona ańjomkate iń do botorokʼ iń ehopʼena, ińakʼ luṭikin hõ thar tharaoentinạ; iń doń nijor idiyena ar ińakʼ jaṅgakin do lakaṛ lukuṛokʼ ehopʼena. Enhõ iń do ona din lạgitʼ jiwi hataṛkate koyokʼ hor akaegeń tahena one oka hilokʼ ale khekhedko do muhinreko paṛaokʼ.

¹⁷ Loa darere baṅ bahakʼre hõ ar darkha nạ̃ṛĩre darkha jo baṅ jolenre hõ, jạitun darere jãhãn jo baṅ saplenre hõ ar khetre jãhãn phosol baṅ hoylenre hõ, bhiḍikoakʼ khạṛre bhiḍiko bako tahẽlenre hõ ar goṛare kaḍa bitkil bako tahẽlenre hõ,

¹⁸ enhõ iń do Probhu Isor iạteń rạskạkʼa; ar ińren babańcaoicʼ Isor iạtegeń hulạsokʼa.

¹⁹ Probhu Isorge ińren daṛe do; uni do jel eṅgawakʼ jaṅga leka ińakʼ jaṅgae hoyocoketʼtińạ ar usul usul ṭhạ̃ite calakʼ reakʼ daṛegeye emạńkana. Sereń cakʼlaoko lạgitʼ tumạlakʼ. Ińakʼ hukum lekate taranakʼ bajnako sãote sereń hoyokʼa.