Genesis 8 - সান্তালী বাইবেল

Ḍubạ dakʼ tayom

¹ Jahajre Noha ar uni sãote tinạkʼ ạsul ar bir janwarko tahẽkan Isor do onkoakʼ katha bae hiṛińleda. Uni do dhạrti cetanre hoeye ạgukeda, ar onate dakʼ do ańjedokʼ ehopʼen.

² Unre ot latar khon dakʼ oḍokokʼ ar serma reakʼ paṛakʼ hõ bondena ar dakʼ ńurokʼ hõ thirena.

³ Ar ot cetan reakʼ dakʼ do ańjedokʼ ehopʼena, ar ḍubạ ehobokʼ mitʼsae mõṛẽgel din tayom dakʼ do ḍher ańjetʼena.

⁴ Onate eae cando reakʼ gel eaeakʼ dinre jahaj do Ararat burure ḍhaṅena.

⁵ Noa tayom hõ dakʼ do ańjedokʼtege tahẽyena, ar gel cando reakʼ pạhilakʼ dinre buruko reakʼ cuṛạ ńelena.

⁶ Noa pongel din tayom Noha do jahaj reakʼ khiṛkiye jhicʼkeda,

⁷ ar mitʼṭen bhonḍa kạhũi aṛakʼkedea. Uni kạhũ do ot cetan khon dakʼ ạuri ańjetʼ cabakʼ hạbicʼ hante nate manḍrao baṛaye ehopʼena.

⁸ Noha do ot khon dakʼ ańjetʼena se baṅ ona baḍae lạgitʼ ar mitʼṭen potame aṛakʼkedea.

⁹ Menkhan unrehõ otre dakʼ do tahẽkana, onate okarehõ abokʼ jaega bae ńamletʼte Noha ṭhengeye ruạṛ hecʼena. Ar Noha do ti tiạrkate uni potame ataṅ daramkedea.

¹⁰ Ona eae din tayom uni do arhõ uni potame aṛakʼkedea.

¹¹ Ar ạyubokʼ jokhecʼ potam do jahajre Noha ṭhene ruạṛ hecʼena ar ṭhonṭate jạitun dare reakʼ mitʼṭecʼ sakame ger ạgukeda. Onate Noha doe bujhạukeda ot khon dakʼ do ańjetʼ akana.

¹² Uni do eae din tayom arhõ uni potame aṛakʼkedea, menkhan niạ dhao uni do ar bae ruạṛ hecʼlena.

¹³ Nohawakʼ umer do unre turuisae mitʼ bochor hoyakan tahẽkana. Ar ona bochor reakʼ pạhil cando reakʼ pạhil hilokʼ ot khon dakʼ do ocokʼena. Unre Noha do jahaj reakʼ chat ocokʼ kateye ńelkeda, ot do hawedokʼ ehopʼena.

¹⁴ Ado dosar cando reakʼ bargel eaeyakʼ dinre ot do rohoṛ utạrena.

¹⁵ Unre Isor do Nohae metadea,

¹⁶ “Am do amren bạhu ar amren hoponko ar onkoren bạhuko soṅgekate jahaj khon oḍok hijukʼme,

¹⁷ Ar ona sãote janwarko cẽṛẽko ar leńokʼ ṭunḍạṅko, metakʼme tinạkʼ jiwiyanko menakʼko onko sanamko hõm oḍok ạgukoa. Ińakʼ khojogokʼakʼ do dhạrtire onkoren bõsko bạḍokʼma arko saṅge idikʼte lekhareko ḍherokʼma.”

¹⁸ Unre Noha do acʼren bạhu ar hoponko ar onkoren bạhuko soṅgekate jahaj khone oḍok hecʼena.

¹⁹ Onko sãote joto janwar ar cẽṛẽko ar lacʼte taṛam jiwiyanko, metakʼme ot cetanre ạcur baṛae sanam jiwiyanko akoakʼ jạtko lekako oḍok hecʼena.

Noha dãṛẽye samaṅetʼ

²⁰ Ona tayom Noha do Probhu Isor ńutumte mitʼṭecʼ pinḍe benaokeda ar mimitʼ jạtren sapha janwarko ar cẽṛẽko khon hataokate pinḍ cetanreye dãṛẽketʼkoa.

²¹ Probhu Isor do ona dãṛẽ reakʼ jut so iạteye kusiyena ar mon monteye menkeda, “Manwa iạte ar tishõ ot do ar bạń sarapakʼa, ente cetʼleka sanam jiwiyankoń marao cabaketʼko onka do ar tishõ bạń onkaea.

²² Tinạkʼ din noa dhạrti tahen unạkʼ din niạm lekate itạ do er ar irokʼa, rabaṅ din ar lolo din, siń ar ńindạ hoyokʼtege tahena.”