Genesis 7 - সান্তালী বাইবেল

Ḍubạ dakʼ reakʼ katha

¹ Noa tayom Probhu Isor do Noha arhõe metadea, “Am ar am gharońjrenko ape do jahajte bolokʼpe. Ente ińiń ńeleda, hoṛko modre eken amgem dhoromgea.

² Am do sapha jiwiyan mimitʼ jạtrenko khon eae joṛkate eṅga ar ạnḍiạ, ar be sapha jiwiyanko khon do mitʼ joṛakate eṅga ar ạnḍiạm hataokoa.

³ Coṭre uḍạukʼ sapha cẽṛẽko khon hõ eae joṛkate eṅga ar ạnḍiạm hataokoa. Dhạrtire onkoren bõsko jiwetʼ dohoko lạgitʼge am do onam onkaea.

⁴ Iń do eae din khange dhạrtire dakʼ iń ạguya. Onate pongel siń ar pongel ńindại daga. Ar otre okoeko jiwiyankoń sirjạu akatʼko onko joto do dhạrti khoniń marao giḍikakoa.”

⁵ Probhu Isorakʼ hukum lekage Noha do jotowakʼe kạmikeda.

⁶ Dhạrtire ḍubạ dakʼ ehobokʼ jokhecʼ Nohawakʼ umer do turuisae bochor tahẽkana.

⁷ Ḍubạ dakʼ khon rukhiyạkʼ lạgitʼ Noha do, acʼren bạhu, ar uniren hoponko ar onkoren bạhuko tulucʼ ona jahajteye boloyena.

^8-9 Isor do Noha oka lekae hukumade tahẽkana onkage sapha ar besapha jiwiyanko ar cẽṛẽko ar leńokʼ ṭunḍạṅko do eṅga ar ạnḍiạ joṛa joṛa Nohawakʼ jahajteko rakapʼena.

¹⁰ Ar ona eae din paromen khan dhạrtire ḍubạ dakʼ do hecʼena.

¹¹ Nohawakʼ umer tinre turuisae bochor tahẽkana, ar ona bochor reakʼ dosar cando reakʼ gel eaeakʼ dinre ot latar reakʼ dakʼ do oḍokokʼ ehopʼena ar serma hõ paṛakʼena.

¹² Ar pongel siń ar pongel ńindạ dhạrtire dakʼ ńurena.

¹³ Oka hilokʼ dadakʼe ehopʼketʼ enhilokʼ Noha do, acʼren bạhu, acʼren hopon Shem, Ham ar Japhet ar onkoren bạhuko salakʼ jahajteye boloyena.

¹⁴ Onko sãote mimitʼ jạtren mimitʼ joṛkate bir ar ạsul janwarko, leńokʼ ṭunḍạṅko ar joto lekan cẽṛẽko hõko boloyena.

¹⁵ Sahẽtʼetʼkan jiwetʼ sanam jiwiyankoge joṛ joṛ Nohawakʼ jahajteko rakapʼena.

¹⁶ Isor do Noha okalekae hukumade tahekan onkage onko do eṅga ạnḍiạ jahajteko rakapʼena. Ar ona tayom Probhu Isor do jahaj reakʼ duạre sińkeda.

¹⁷ Ar dakʼ do pon gel siń hạbicʼ dhạrtire ḍher idikʼtege tahẽyena. Dakʼ ḍher idiyen khan jahaj do ot khon cetante cape rakabokʼ ehopʼena.

¹⁸ Ar dakʼ do ot cetanre arhõ ḍher idiyen khan jahaj do dakʼ cetanre ḍombolena.

¹⁹ Otre dakʼ do ḍher idikʼtege tahẽyena; ar tinạkʼ maraṅ maraṅ buruko tahẽkana onako joto do unum cabayena.

²⁰ Ar buruko unum cabayen khan dakʼ do arhõ mõṛẽ gel moka rakapʼena.

²¹ Ona iạte otren sanam jiwiyanko, cẽṛẽko, ạsul ar bir janwarko, kạṭicʼ ar lạṭu jiwiyanko ar sanam manwako unum gocʼena.

²² Ar ot cetanre tinạkʼ jiwiyanko tahẽkan, metakʼme sahẽtʼetʼ tahẽkan sanam jiwiyanko doko gocʼ cabayena.

²³ Isor do otren sanam jiwiyanko dhạrti khone ḍahao marao cabaketʼkoa. Onate manwako, janwarko, leńokʼ ṭunḍạṅko ar coṭren cẽṛẽko do dhạrti khonko marao cabayena. Eken Noha ar uni sãote tinạkʼ do jahajreko tahẽkan onkoge jiwetʼko tahẽyena.

²⁴ Ar dhạrti do mitʼsae mõṛẽgel din hạbicʼ dakʼre unmge tahẽyena.