Genesis 50 - সান্তালী বাইবেল

Jakob topaye lạgitʼko sapṛaoede

¹ Unre Joseph do acʼ babawakʼ mẽtʼãhãre giḍiyente rarakʼe dhurạuena are cokʼadea.

² Tayomte uni do acʼ taberen rarankoe hukumatʼkoa jemon apatakʼ hoṛmore mosolako ojokʼae. Ar onko do onkageko kạmikeda.

³ Nonkate pongel din paromena. Ente noa kạmi do pongel din hạbicʼge lagaokʼkan tahẽkana. Ar Misorren hoṛ do Israel lạgitʼ eae gel din hạbicʼko homor halaṅkeda.

⁴ Noa homor halaṅ din paromen khan Joseph do Pharaoren kạmiyạkoe metatʼkoa, “Ape nońjorre dayań ńamakatʼ khan enḍekhan Pharao ṭhen senkate noa katha baḍae ocoyepe,

⁵ ạpuń gujukʼ oktere noae kiriạ ocoakadińa, Kanan disạmre acʼe ṭhik dohoakatʼ jaegare jemoniń topakae. Onate nehõraepe ona kạmi lạgitʼ jemone sen ocoạń. Ar lạiyaepe onań sạt lekhange arhõń ruạṛ hijukʼa.”

⁶ Pharaoe roṛgotʼkada, “Uni okaṭakʼe kiriạ ocoakatʼme onkage senkate topayeme.”

⁷ Unre Joseph do acʼren apat topaye lạgitʼe senena. Ar Pharaoren kạmiyạko hõ, metakʼme uniyakʼ bicạr duṛupʼakʼren ar Misorren sanam manotanko do Joseph sãoteko calaoena.

⁸ Ona chaḍa Josephren ar acʼ babawakʼ gharońjren ar uniren boehako hõ uni sãoteko calaoena. Gosenre onko do eken akoren hopon ar hoponerako ar mĩhũ-meromko ar bhiḍikoko bạgi oṭowatʼkoa.

⁹ Ạḍi utạr rãt gạḍiko ar aswarikoante onko do mitʼṭecʼ maraṅ phạdge Joseph sãoteko calaoena.

¹⁰ Onko do jordan gaḍa aṛe reakʼ Atadkoakʼ khạrại hạbicʼko senena ar Joseph do apattetʼ lạgitʼ eae din hạbicʼe homor halaṅkeda. Ar uni sãote hoṛko hõko homor halaṅkeda.

¹¹ Atadkoakʼ khạrạire nonka rakʼ hokʼmorko ńelketʼ khan ona disạmren hoṛ do, metatʼme Kananren hoṛko menkeda, “Noa do Misorrenkoakʼ ãṭ homorkangea.” Onate jordan gaḍa eṭakʼ aṛe reakʼ noa jaega do Abel Misrayim ńutumko dohokeda (Metakʼme, “Misorrenkoakʼ rakʼ homor”).

¹² Israel do acʼren hoponko okaṭakʼe metatʼko tahẽkan onko do onageko kạmikeda.

¹³ Onko do uniyakʼ mạ̃ṛĩ Kanan disạmteko idikeda ar Mamre ṭhenakʼ Makpela reakʼ dander ṭhen uniko topakadea. Topa ṭạnḍi benao iạte jumi sudhạ noa danderge Abraham do Hitti Ephron ṭhen khone kirińleda.

¹⁴ Apattetʼe topakede khan Joseph, uniren boehako ar tinạkʼ do uni topaye lạgitʼko senlen onko sanamkoge Misorteko ruạṛ calaoena.

Joseph do boehako jiwi raṛecʼe emakokan

¹⁵ Babae gocʼen khan Josephren boehako do ako akoreko mepenena, “Josephre oka bon cekaletʼ ar ona reakʼe hala ruạṛ abon khan unre cetʼ bon cekaea?”

^16-17 Onko do Joseph ṭhen katha roṛgotʼkateko menkeda, “Gujukʼ lahare babae menleda, amre okaṭakʼle behok akatʼ ona aleakʼ kại baṛe ikạitaleme. Onate aleakʼ nehõr do amren golamkoakʼ behokakʼ baṛe ikạitaleme.” Ar Joseph do onkoakʼ katha ańjomkateye rakʼkeda.

¹⁸ Inạ tayom uniren dadattetʼtako do uni samaṅre hecʼkate unire giḍiyenteko menkeda, “Ale do amren golam kanale.”

¹⁹ Menkhan Josephe menkeda, “Alope botorokʼa. Isorakʼ ṭhạ̃ire teṅgon lạgitʼ iń doń cele kana?

²⁰ Ape do ińre bạṛicʼpe hudisleda, menkhan Isor do ona talate bhạlại reakʼe monsubạ akada jemon ḍher hoṛakʼ jiwi rukhyiạkʼtako; ar teheń do onage hoyakana.

²¹ Onate ape do alope botorokʼa. Iń do ape ar aperen hopon ar hoponerako lạgitʼ jomakʼ iń jogaoapea.” Noako as reakʼ kathate uni do jiwi raṛecʼe ematʼkoa.

Josephakʼ gujukʼ

²² Joseph ar acʼ apatakʼ gharońjren hoṛ do Misorrege girobas akanko tahẽyena. Joseph do mitʼsae gel bochor hạbicʼ jiwetʼe tahẽkana.

²³ Uni do Ephrayemren hoponko pe piṛhi hạbicʼe ńel oṭokatʼkoa. Ona chaḍa Makirren hoponko hõ janam tayom Josephakʼ hoborreko doho ocolena. Makir do Manaseren hopone tahẽkana.

²⁴ Joseph do acʼren boehakoe metatʼkoa, “Ińakʼ gujukʼ okte do seṭer akana, ar noa do khạṭi kana je, Isor do apeye ạsulpea. Uni do Abraham, Isahak ar Jakob okaṭakʼ disạm emako lạgitʼe gokʼatʼko tahẽkan ona disạmge nonḍe khone idipea.”

²⁵ Ona tayom Joseph do Israelkoe kiriạ ocoketʼkoteye metatʼkoa, “Isor do khạṭige apeye jotonpea. Nonḍe khonpe calakʼre ińakʼ jaṅko hõ iditoraetińpe.”

²⁶ Ar Joseph do mitʼsae gel bochor umer tahẽkanreye gocʼena. Ar uniyakʼ mạ̃ṛĩre jokʼgao mosolako ojokʼakʼte mitʼṭecʼ baksare dohokate Misorreko baekadea.