Genesis 5 - সান্তালী বাইবেল

Adomren bõskoakʼ katha

¹ Noa do hoyokʼ kana Adam bõsrenkoakʼ katha. Isor do acʼleka, acʼakʼ muṭhạn lekage manwae sirjạukedea;

² Uni do herel ar maejiukategeye sirjạuketʼkinạ are bhoratʼkinạ. Ar unkin do manwae ńutumketʼkinạ.

³ Adamakʼ mitʼsae pegel bochor umer tahẽkanre uniren do mitʼṭen koṛa hopone hoyena. Uni hopon do acʼlekageye hoyena. Adam do uniyakʼ ńutum Sethe dohoketʼtaea.

⁴ Seth janam tayom Adam do irạl sae bochor jiwetʼe tahẽkana. Ar onako dinre uniren do ạḍi utạr hopon ar hoponerako hoyena.

⁵ Adam do jotote are sae pegel bochor jiwetʼe tahẽkana ar ona tayom doe gocʼena.

⁶ Seth do mitʼ sae mõṛẽ bochor umer tahẽkanre uniren hopon Enose janamena.

⁷ Enos janam tayom Seth do irạl sae eae bochor jiwetʼe tahẽkana. Onako dinre uniren do ạḍi utạr hopon ar hoponerako janamena.

⁸ Seth do aresae gelbar bochor jiwetʼe tahẽkana ar ona tayom doe gocʼena.

⁹ Enosakʼ aregel bochor umer tahẽkanre uniren hopon Kaine janamena.

¹⁰ Kain janam tayom Enos do irạlsae gelmõṛẽ bochor jiwetʼe tahẽkana. Onako dinre uniren do arhõ hopon ar hoponerako janamlena.

¹¹ Enos do jotote aresae mõṛẽ bochor jiwetʼe tahẽkana ar ona tayom doe gocʼena.

¹² Kainakʼ eaegel bochor umer tahẽkanre uniren hopon Mahalalelakʼ janam do janamena.

¹³ Mahalalelakʼ janam tayom Kain do arhõ irạlsae pongel bochor jiwetʼe tahẽkana. Inạko dinre uniren do arhõ hopon ar hoponerako hoylentaea.

¹⁴ Kain do jotote aresae gel bochor jiwetʼe tahẽkana ar ona tayom doe gocʼena.

¹⁵ Mahalalelakʼ turuigel mõṛẽ bochor umer tahẽkanre uniren hopon Jared doe janamena.

¹⁶ Jared janam tayom Mahalalel do arhõ irạlsae pegel bochor jiwetʼe tahẽkana. Inạko bhitrire uniren do arhõ hopon ar hoponerako hoylentaea.

¹⁷ Mahalalel do jotote irạlsae aregel mõṛẽ bochor jiwetʼe tahẽkana ar ona tayom doe gocʼena.

¹⁸ Jaredakʼ mitʼsae turuigel bar bochor umer tahẽkanre uniren hopon Enok doe janamena.

¹⁹ Enokakʼ janam tayom Jared do arhõ irạlsae bochor jiwetʼe tahẽkana. Inạko dinre uniren do arhõ hopon ar hoponerako hoylentaea.

²⁰ Jared do jotote aresae turuigel bar bochor jiwetʼe tahẽkana ar ona tayom doe gocʼena.

²¹ Enokakʼ turuigel mõṛẽ bochor umer tahẽkanre uniren hopon Mathusala doe janamena.

²² Mathusalawakʼ janam tayom pesae bochor hạbicʼ Enok do Isor sãote jopoṛao tahẽkantaea. Onako dinre uniren do arhõ hopon ar hoponerako hoylentaea.

²³ Enok do jotote pesae turuigel mõṛẽ bochor noa dhạrtire jiwetʼe tahẽkana.

²⁴ Inạ tayom uni do okare hõ ar bae ńellena. Isor sãote uniyakʼ jopoṛao tahẽkante Isor do acʼ ṭhene idikedea.

²⁵ Mathusalawakʼ mitʼsae irạlgel eae bochor umer tahẽkanre uniren hopon Lameke janamena.

²⁶ Lamekakʼ janam tayom Mathusala do arhõ eaesae irạl gel bar bochor jiwetʼe tahẽkana. Onako dinre uniren do arhõ hopon ar hoponerako hoylena.

²⁷ Mathusala do jotote aresae turuigel are bochor jiwetʼe tahẽkana ar ona tayom doe gocʼena.

²⁸ Lamek do mitʼsae irạlgel bar bochor umer tahẽkanre uniren do mitʼṭen hopone hoyena.

²⁹ Uni doe menkeda, “Aboakʼ khaṭaoakʼko modre, bạ̃ṛtikaete Probhu Isor do ote sarapatʼ tayom aboakʼ oka khaṭao hoyokʼkan onate nui gidrạge abo do jiwiye raṛejtabona.” Noa menkate uni do Noha ńutume dohoketʼtaea.

³⁰ Nohawakʼ janam tayom Lamek do arhõ mõṛẽsae aregel mõṛẽ bochor jiwetʼe tahẽkana. Noako dinre uniren do arhõ hopon ar hoponerako hoylena.

³¹ Lamek do jotote eaesae eaegel eae bochor jiwetʼ tahẽkana ar ona tayom doe gocʼena.

³² Nohawakʼ umer mõṛẽsae bochor paromen khan uniren hopon Sem, Ham ar Japhet tekoko janamena.