Genesis 49 - সান্তালী বাইবেল

Jakobakʼ ses katha

¹ Tayomte Jakob do acʼren hoponko hohowatʼkoteye metatʼkoa, “Jotokoge iń ṭhen hijukʼpe. Ar tayom daram dinkore apeakʼ jionre cetʼko hoyokʼ onań lạiyapea.

² “Jakobren hoponko, dela iń ṭhen hijukʼpe; aperen baba Israel cetʼe menetʼ ona ańjompe.

³ “Ruben, am do ińren maraṅicʼ hopon kanam; am do ińakʼ daṛe kanam, ińakʼ juạn daṛe reakʼ pạhil joge; man ar daṛete amren boehako cetanre menama.

⁴ Menkhan am do dakʼ lekam ikocʼ sokojokʼa, onate amakʼ cetan hudạ do ar baṅ tahentama. Ente ińren bạhu ṭhen bolokate amren apatakʼ aṭetʼem besonot akada.

⁵ “Simeon ar Lewi banar boeha; unkin do jor bojor lạgitʼge tarwaṛekin sapʼeda.

⁶ Unkinakʼ oko danaṅre ińakʼ jãhãn hĩs do bạnukʼa, ar unkinakʼ dolre iń do bạnuńa. Unkin do edrete hoṛkin khũnkoa, ar ạkinakʼ kusi sanaleka ḍaṅgrawakʼ jaṅga sirkin samakʼakada.

⁷ Unkinakʼ kurkurạukʼ edre, ar kurmutạha do sarapanakʼ baṛe hoyokʼma. Unkin gusṭirenko do Jakobakʼ bõsko talareń hạṭińkoa, ar Israelko talareń chirchạturkoa.

⁸ “E Jihudạ, amren boeha do amko sarhaomea. Amakʼ ti do amren bạirikoakʼ hoṭokʼre tahena; ar amren boeha do amko ḍobokʼama.

⁹ E Jihudạ, am dom dhạcri kul hoponkana; sendra jel jom baṛakate ińren nui hopon doe rakapʼ hijukʼa; dhạcri kul ar kul eṅga lekae burum akana. Okoe hale uni doe buskukea?

¹⁰ Ar Silote uni ạuriye hijukʼ hạbicʼ jạt jạtrenko uniyakʼ hukum ạuriko bataotae hạbicʼ, uniyakʼ raj ṭheṅga do Jihudạ bõsrege tahena; ar cakʼlao ṭheṅga do uniyakʼ gunṭhikin talare.

¹¹ Jihudạ do darkha nạ̃ṛĩre acʼren gadhae tolkaea, ar gadha hopon do soros utạrakʼ nạ̃ṛĩre. Uni do darkha rasate kicricʼkoe soboda, ar darkha joko reakʼ mãyãmte do oyonakʼkoge.

¹² Uniyakʼ mẽtʼkin do darkha rasa leka arakʼge hoyokʼa, ar ḍaṭa do toa khon hõ ponḍge hoyokʼtaea.

¹³ “Sebulon do doreão aṛereye girobasokʼa; uni do jahajko reakʼ bondorgeye hoyokʼa; ar uniyakʼ simạ do Sidon hạbicʼ hoyokʼtaea.

¹⁴ “Isakar do mitʼṭen daṛean gadha kanae. Uniyakʼ giticʼ ṭhạ̃i do bhiḍi khạṛko talare hoyokʼtaea.

¹⁵ Uni doe ńela jirạukʼ jaega do bhagegea ar disạm hõ jutgea, onate uni do bojha gog lạgitʼ taren hõe koceytaea ar golam leka khaṭaoakʼ hõe bataoa.

¹⁶ “Dan do Israelren mitʼṭen gusṭi lekate acʼren hoṛkoe bicạrkoa.

¹⁷ Uni do horten bińe hoyokʼa, mitʼṭen bisan bińge; uni do sadomakʼ jaṅgae sogaga, ar aswari do sạmbirteye ńurokʼa.

¹⁸ “E Probhu Isor, am do unim rukhiyạyea ar ona ńelhor lạgitʼge iń do minạńa.

¹⁹ “Gad do lạṛhại phạdko ṭhene cipạ ocokʼa, menkhan uni do acʼ hõ onkoe cipạkoa.

²⁰ “Aserakʼ jumire do sebel jomakʼkoge upcạukʼa; uni do rajakʼ lek leka jomakʼe emokʼa.

²¹ Naphtali do chuṭạ jel eṅga kanae; uni do mońj mońj kathakoe phuṭạueda.

²² “Joseph do jokote perecʼ dare kanae, dakʼ aṛere jo akan dare leka; uniyakʼ ḍạrko do pạcri cetante lawer akana.

²³ Dhinkiạko do sarte uniko tuńe kana, ar muhinreko paṛao edekana.

²⁴ Menkhan uniyakʼ akʼ do keṭecʼge tahẽkana ar uniyakʼ tikin reakʼ sopo hõ jojosakʼge, ente Jakobren Isorakʼ daṛeanakʼ ti do unire menakʼa. Ar uni tayomre do uni gukʼpiyicʼ menaea, Israel reakʼ ona dhirige.

²⁵ Am apatren Isor do ame goṛowama. Sanam daṛean Isor do serma khone bhorama ar ot latar khon jharna reakʼ ạsirbade emama. Ar maejiuakʼ kukhire gidrại emokʼte uniyakʼ toa reakʼ bhorte uni do ame bhorama.

²⁶ Amren babawakʼ ńamakʼ bhor do uniren hapṛamkoakʼ bhor khon phaelaogea; ona do jaejug reakʼ buru hạbicʼ seṭer akana. Ona ạsirbad do Josephakʼ bohokʼre paṛaokʼma; uniyakʼ bohokʼrege paṛaokʼma ente uni do acʼren boehako khone maraṅgea.

²⁷ “Benjạmin do mitʼṭen cikʼrạkan hunḍạr kanae; uni do setakʼre sendra jele joma ar ạyupʼ do luṭakʼ jiniskoe hạṭińa.”

²⁸ Noko joto do Israelren gelbar gusṭiren kanako. Onkoren apattetʼ do onkoe bhorako jokhecʼ noako kathae menleda. Uni do sanamkoge apan ạpin lek leka bhore ematʼko tahẽkana.

Jakobakʼ gujukʼ

²⁹ Tayomte Jakob do acʼren hoponko noae metatʼkoa, “Hapṛamko ṭhen calakʼ reakʼ okte hoyakantińạ. Hitti Ephron reakʼ jumire okaṭakʼ dander menakʼ ona danderre ińren hapṛamko ṭhen ińhõ topayińpe.

³⁰ Noage Kanan disạmre Mamre ṭhen Makpela jumi reakʼ ona dander kana. Mạ̃ṛĩ poḍa tear lạgitʼ Abraham do jumi sudhạ Hitti Ephron ṭhen khon noa dander doe kirińleda.

³¹ Abraham ar uniren bạhu Sara do onḍegekin topa ocoakana. Isahak ar uniren bạhu Rebeka hõ onḍegekin topa ocoakana. Ar Lea hõ onḍegeń topa akadea.

³² Dander sudhạ noa jumige Hittiko ṭhen khoniń kirińakada.”

³³ Jakob do acʼren hoponko galmaraoakoe sạtketʼ khan aṭetʼre acʼakʼ banar jaṅgae rakapʼketʼtaea are giticʼena. Ar ona tayom do jiwi oḍokentaete acʼren hapṛamko ṭhene calaoena.