Genesis 48 - সান্তালী বাইবেল

Jakob do Manase ar Ephrayeme bhorakin kan

¹ Niạ thoṛa din tayom Joseph do khobore ńamkeda, acʼ baba doe ruạkʼkana. Unre uni do acʼren banar hopon Manase ar Ephrayem soṅgekate onḍeye calaoena.

² Ar Jakob do tinreye baḍaekeda, acʼren hoponkin tulucʼ Joseph do acʼ ṭhene hecʼakana, unre acʼakʼ sanam daṛeteye beretʼena ar aṭetʼreye duṛupʼena.

³ Ona tayom Jakob do Josephe metadea, “Sanam daṛean Isor do Kanan disạmre Lus nagrahare iń ṭhene ńel ocoyena are ạsirbad ạdiń tahekana.

⁴ Uni doe metadiń tahẽkana, ‘ạḍi utạr hoponkoren baba hoyokʼ reakʼ daṛeń ematʼmea ar am bõsren hoṛkoakʼ lekha doń saṅge ocoya. Iń do am khon aema jạtrenkoń sirjạukoa, ar am tayom noa disạm do jaejug reakʼ sompotti lekate amren bõskoń emakoa.’

⁵ Am ṭheniń hijukʼ lahare amren okoekin hoponkin janamlen unkin hõ ińren hoponko talarekin lekhakʼa. Ruben ar Simeon cetʼleka ińren kanakin onkage Ephrayem ar Manase hõ ińren kanakin.

⁶ Menkhan nukin tayom amren okoeko hoponko hoyokʼ onko do amren mentegeko lekhakʼa. Sompotti ạidạri jokhecʼ Manase se Ephrayem ńutumte onko doko ạidạrijoṅa.

⁷ Padam-Aram khon oḍokkate Kanan disạm reakʼ Ephrat khon thoṛa sạṅgiń tahenrege Rahel doe gocʼena, onate iń do ạḍi dukiń ńamkeda. Ephrat reakʼ horre, metakʼme Bethlehem calakʼ horre uniń topakadea.”

⁸ Niạ tayom Josephren hoponkin secʼ beṅgetʼkate Israel doe kuliyana, “Unkin dokin okoe kana?”

⁹ Joseph do acʼ babae roṛ ruạṛadea, “Unkin do ińren hopon kanakin. Isor do noa disạmre unkine emakawạdińa.” Israele menkeda, “Iń ṭhen ạgukinme. Iń do unkin hõń ạsirbad ạkina.”

¹⁰ Haṛam umerre mẽtʼte ńel reakʼ daṛe komao idiyente Israel do mońjte bae ńeńelkan tahẽkana. Onate Joseph do acʼren banar koṛa acʼ baba ṭhene ạguketʼkinạ. Unre Israel do unkin hạṛupʼkateye cokʼatʼkinạ.

¹¹ Uni do Josephe metadea, “Iń do amakʼ mẽtʼãhãń ńelńama mente do bạń hudis akatʼ tahẽkana, menkhan Isor do eken am do baṅ, amren gidrạkin hõe ńel ocokedińa.”

¹² Unre Joseph do acʼren apatakʼ gunṭhikin aṛe khon acʼren hoponkine ocokʼketʼkinte otre ombakʼkate apattetʼe ḍobokʼadea.

¹³ Ona tayom Joseph do acʼren banar hopon arhõ Israel ṭhene ạguketʼkinạ. Ephrayem do jojomtite sapʼkate Israelakʼ leṅgati secʼ ar Manase do leṅgatite sapʼkate uniyakʼ jojom ti secʼe dohokedea.

¹⁴ Menkhan Israel do tiye tiyạrketʼte jojom tite Josephren huḍińicʼ hopon Ephrayeme capokedea; ar Manase do Josephren maraṅicʼ hoponkanre hõ uni do leṅga titeye capokedea.

¹⁵ Ona tayom Uni do Joseph bhoradeteye menkeda, “Uni Isor, one ińren hapṛam Abraham ar Isahak do uniyakʼ sanaleka kin calakʼkan tahẽkan, unige ińakʼ jionre pạhil khon teheń hạbicʼ gupiyicʼ lekae ạyur ạguyedeń kana,

¹⁶ uni serma Goḍet, okoe do sanam muhin reakʼ ti khone rukhiyạ akadiń, unige nukin gidrại bhorakinma. Nukin hotetege iń ar ińren hapṛam Abraham ar Isahakakʼ ńutum do jiwetʼ tahenma. Ar aboakʼ disạmre nukin bõsren hoṛ do lekhare ḍherko hoyokʼma.”

^17-18 Apattetʼ do acʼakʼ jojom ti Ephrayemakʼ bohokʼreye dohoketʼte Joseph do bae kusilena. Uni do Ephrayemakʼ bohokʼ khon ocokʼkate Manaseakʼ bohokʼre dohoy lạgitʼ apatakʼ ti sapʼkateye menkeda, “E baba, nonka do baṅ. Nui do ińren maraṅicʼ koṛa kanae. Amakʼ jojom ti nui cetanre dohoyme.”

¹⁹ Menkhan apattetʼ doe menkeda, “Iń doń baḍaegea. Uni hõ maraṅe hoyokʼa ar uni bõsren hoṛ do mitʼ jạtrenko hoyokʼa. Menkhan huḍińicʼ boeha do uni khon hõ maraṅe hoyokʼa ar uni bõsren hoṛko khon ạḍi utạr jạtrenko hoyokʼa.”

²⁰ Ona tayom Israel do unkin banar hopone bhoratʼkinạ are menkeda, “Israelko jãhãegeko bhorako jokhecʼ abenakʼ ńutum ńumkateko mena, ‘Isor do Ephrayem ar Manase lekae hoyocomema.’ ” Noa menkate uni do Manase khon Ephrayemge lahareye dohokedea.

²¹ Ona tayom Israel do Josephe metadea, “Ńelme, ińakʼ gujukʼ okte do sorakana. Menkhan Isor do ape sãoreye tahena, ar aperen hapṛamkoakʼ disạmteye ruạṛ idipea.

²² Amren boehako khon thoṛa ḍher ńokʼ sompottiń ematʼmea. One okaṭakʼ jaega do tarwaṛe ar akʼsarte lạṛhạikate Amorikoakʼ ti khoniń hatletʼ ona jaegage am doń ematʼmea.”