Genesis 46 - সান্তালী বাইবেল

Jakob Misorteye mohnḍayen

¹ Israel do acʼakʼ sanamakʼ hataokateye oḍokena. Ar Ber-sebare hecʼkate uni do acʼ apat Isạhakren Isor ńutumte dãṛẽye samaṅkeda.

² Isor do ńindạ jokhecʼ Israel tulucʼ kukmũ talate kathae roṛkeda. Uni doe hohokeda, “E Jakob, E Jakob.” Jakobe roṛ ruạṛkeda, “Minạńgea.”

³ Isore menkeda, “Iń Isor do, am babaren Isor kạnạń. Misor disạmte calakʼ do alom botorokʼa, ente iń do onḍe am khon mitʼṭecʼ maraṅ utạr jạtrenkoń sirjạukoa.

⁴ Iń do am são sãote Misorteń calakʼa ar khạṭige arhõń ruạṛ ạgumea. Ar gujukʼre Joseph do acʼakʼ tite amakʼ mẽtʼkine hạrubtama.”

⁵ Inạ tayom Joseph do Ber-seba bạgikateye mohnḍayena. Ar onko idiko lạgitʼ Pharao okako gạḍiye kolletʼ tahẽkan Israelren hoponko do onatege akoren apat ar bạhuko ar gidrạkoko idiketʼkoa.

⁶ Ar okoe mĩhũ-meromko ar dhon-duribko Kanan disạmreko hameṭan tahẽkan onako joto soṅgekate Jakob ar uni gharońjren sanamko do Misorteko calaoena.

⁷ Jakob do acʼren hoponko ar goṛom gidrạko, metakʼme acʼ bõsren jotoko soṅgekate Misorteye calaoena.

Jakobak bõs tạlika

⁸ Israelko, metakʼme Jakob ar acʼ bõsren hoṛko okoe do Misorteko senlen onkoakʼ tạlika do nonka leka. Jakobren maraṅicʼ hopon do Ruben.

⁹ Rubenren hoponko do Hanok, Palu, Hesron ar Karmi.

¹⁰ Simeonren hoponko do Jemuel, Jamin, Ohad, Jakin, Sohar ar Sạul. Sạul do Kanan maejiuren hopone tahẽkana.

¹¹ Lewiren hoponko do Gerson, Kohat ar Merari.

¹² Jihudạren hoponko do Er, Onan, Selah, Peres ar Serah. Er ar Onan do Kanan disạmregekin gocʼena. Peresren hoponkin do Hesron ar Hamul.

¹³ Isakarren hoponko do Tola, Puah, Job ar Simron.

¹⁴ Sebulonren hoponko do Sered, Elon ar Jahleyel.

¹⁵ Ar hoponera Dina sudhạ noko do Lea secʼte Jakobren bõsko. Noko do Padan-Aramreko janamlena. Jakobren noko bõsko do jotote pegel pe hoṛko tahẽkana.

¹⁶ Gadren hoponko do Siphon, Hagi, Suni, Esbon, Eri, Arodi ar Areli.

¹⁷ Aserren hoponko do Jimna, Jiswa, Jiswi, Beria, ar onkoren misera Sarah. Beriaren hoponkin do Heber ar Malkieb.

¹⁸ Laban do acʼren hoponera Leae emade tahẽkan Silpạ noko do jotoge uni hotete Jakobren bõs kanako. Silpa ar Jakobren noko bõsko do jotote gel turui hoṛko tahẽkana.

¹⁹ Jakobren bạhu Rahelren hoponkin do Joseph ar Benjạmin.

²⁰ Josephren hopon Manase ar Ephrayim do Misor disạmrekin janamlena. Nukinre eṅgat do On nagraharen naeke Poṭipheraren hoponera Asnate tahẽkana.

²¹ Benjạminren hoponko do Bela, Beker, Asbel, Gera, Naman, Ehi, Ros, Mupim, Hupim ar Ard.

²² Onko do Rahelren hoponko tahẽkana. Noko do jotote pongel hoṛko tahẽkana.

²³ Danren hopon do Husim.

²⁴ Napthaliren hoponko do Jahseyel, Guni, Jeser, ar Silem.

²⁵ Laban do acʼren hoponera Rahele emade tahẽkan kạ̃ṛmĩ Bilharen hoponko tahẽkana noko do Jakob ar Bilharen jotote eae goṭenko tahẽkana.

²⁶ Jakob sãote okoe do Misor disạmteko calaoen, metakʼme acʼ apnar bõsren jotote turuigel turui hoṛko tahẽkana; noa lekhare uniren hoponkoren bạhuko do bako sapʼakana.

²⁷ Misor disạmre Josephren okoekin hoponkin janamlen ar Jakobakʼ gharońjren okoe do Misorteko calaolen onko do jotote eaegel hoṛko tahẽkana.

Jakob do Gosenreye tahẽyena

²⁸ Jakob do Joseph ṭhen Jihudạgeye kol lahakedea jemon Joseph do Jihudạge Gosen calakʼ reakʼ hore udukʼae. Ar mucạtʼre onko do jotoge onḍeko seṭerena.

²⁹ Joseph do acʼren apat Israel tulucʼ ńapamokʼ lạgitʼ acʼakʼ rãt gạḍiye sapṛaoketʼte Gosenteye calaoena. Ar apattetʼ sãote ńapam torage uni do hoṭokʼre hạṛupʼkedete ạḍi ghạṛicʼe rakʼkeda.

³⁰ Tayomte Israel do Josephe metadea, “Ńit hõ jiwetʼ menam ona do nij mẽtʼteń ńelkeda. Ar ńit do gujukʼ hõń sapṛaogea.”

³¹ Noa tayom Joseph ar acʼren boehako ar acʼ apat gharońjren eṭakʼkoe metatʼkoa, “Iń do Pharao ṭhen senkateń mena, ‘ińren boehako ar iń babawakʼ bõsrenko do Kanan disạm khon iń ṭhenko hecʼakana.

³² Onkoakʼ kạmi do gukʼpi kạmikana; onko do bhiḍi-merom gukʼpi hoṛ kanako, onate onko do soṅgete bhiḍi, merom, ḍaṅgra ar sanamakʼ jinisko ạgudara akada.’

³³ Ar Pharao tinre ape hohoapeteye kulipea, ‘ape do cetʼkope kạmiya?’

³⁴ Unre unipe metaea, ‘amren golamko ar onkoren hapṛamko do huḍiń khon ńit hạbicʼ mĩhũ-meromkogele gupi ạguyetʼkoa.’ Onate ape do Gosenre girobasokʼ lạgitʼ hukumpe ńama. Ente Misriko ṭhen bhiḍi-merom gukʼpi do hirkhạwakʼ kạmikana”