Genesis 43 - সান্তালী বাইবেল

Benjạmin Misorteye senokʼkan

¹ Kanan disạm reakʼ akal do arhõ ḍher idiyena.

² Misor disạm khon Israelren, metakʼme Jakobren hoponko okaṭakʼ anajko ạguletʼ ona cabayentako khan onkoren apat doe menkeda, “Ape do arhõ senokʼte anaj kiriń ạgui tabonpe.”

³ Unre Jihudạ do uniye metadea, “Menkhan uni hoṛ do kajakteye menakatʼlea, ‘aperen boeha ape sãote bape ạgule khan iń samaṅre alope hijukʼa.’

⁴ Aleren boeha ale sãotem sen ocoae khan enḍekhan ale do arhõ senkate anajle kiriń ạguiya.

⁵ Ar uni bam sen ocoae khan alehõ bale calakʼa. Ente uni hoṛ doe metatʼle tahẽkana, ‘aperen boeha ape sãote bape ạgu lekhan apehõ iń samaṅre alope hijukʼa.’ ”

⁶ Unre Israele menkeda, “Iń sãote nonka bạṛicʼ do cedakʼpe beoharkeda? Aperen armitʼṭen boeha menae ona do cedakʼpe lạikeda?”

⁷ Onkoko menkeda, “Menkhan uni hoṛ do abo ar aboakʼ gharońj reaṅ ạḍiye kuliketʼlea, ‘Aperen baba do cetʼ ńitʼhõ jiwetʼ menaegea? Aperen do cetʼ arhõ boeha menakʼkotapea?’ Onatege ale do unile roṛ ruạṛade tahẽkana. Unre ale do cekatele baḍaea, uniye metalea, ‘aperen boeha ạguyepe’?”

⁸ Unre Jihudạ do acʼ babae metadea, “Uni do ale sãote sen ocoaeme baṛe. Ale do usạrate senkatele ruạṛ hijukʼa jemon am ar ale aleren gidrạko jiwetʼko tahen ar alo bon gujukʼ.

⁹ Ińge uni lạgitʼ jạmin iń teṅgoyena. Uni lạgitʼ ińge dạyiń tahena. Am ṭhen baṅ ruạṛ ạgu daṛeae khan jaejug hạbicʼ am ṭhen dusi akaniń tahenma.

¹⁰ Ale nunạkʼ bale bilomle khan khạṭige nunạkʼ dinte babar dhao senkatele ruạṛ hecʼ daṛekokʼa.”

¹¹ Unre onkoren apate metatʼkoa, “Onkage hoyokʼ khan, enḍekhan mitʼṭecʼ kạmipe. Uni hoṛ lạgitʼ dan lekate noa disạm reakʼ bhage bhage jinisko reakʼ thoṛa thoṛa idi torawaepe, ona do noakoge, ran sunum, dumur rasa, jut so mosola, gondhoros, pesta jo ar badam.

¹² Ar soṅgete ṭaka hõ dobṛa idi toraepe, ente bostare oka ṭakae ruạṛatʼpe tahẽkan ona hõ ruạṛkatae hoyokʼa. Hoedaṛeakʼa hiṛińte onko do onako emlen tahẽkana.

¹³ Aperen boeha soṅgete idiyepe ar usạra uni hoṛ ṭhen ruạṛ calakʼpe.

¹⁴ Sanam daṛean Isorakʼ dayate jemon uniye dayawape, ar aperen uni boeha ar Benjạmin jemon apeakʼ tireye aṛakʼkin; ar nirbõsokʼ khaniń nirbosokʼa.”

¹⁵ Unre onko do ona dan, ar dobṛa ṭaka ar Benjạmin soṅgekate Misor disạmteko mohnḍayena. Ar onḍe seṭerkate Joseph samaṅreko hạjirena.

¹⁶ Onko sãote Benjạmine ńelkede khan Joseph do acʼ oṛakʼren ńel todaroticʼe metadea, “Oṛakʼ bhitrite aderkom ar jel isin aroytabonme. Noko hoṛ do iń sãote mańjanko joma.”

¹⁷ Joseph okae menketʼ onkage uni todaroticʼ doe kạmikeda. Uni do Josephakʼ oṛakʼteye aderketʼkoa.

¹⁸ Ado Josephakʼ oṛakʼteko idi ocokʼkana menteko ńelketʼ khan onko do botorte roroṛko ehopʼena, “Laha dhao aboakʼ bostare oka ṭaka senlen ona lạgitʼge nonḍe bon ạgu ocoakana. Niạ dhao do aboakʼ doskoe udukʼ abonteye sapʼ idibona, ar aboren gadhakoe recʼ bona ar golame khaṭao bona.”

¹⁹ Onate onko do Josephakʼ oṛakʼ reakʼ duạr samaṅreko hecʼen khan ńel todaroticʼko metadea,

²⁰ “Hujur, ale do noa laharehõ mitʼ dhao anaj kirińle hecʼlena.

²¹ Menkhan ḍerate seṭerkate aleakʼ bostale raṛaketʼ khan joto ṭakage apan ạpinakʼ bostarele ńelkeda. Ar ńitokʼ do ona ṭaka hõle ruạṛ ạguakada.

²² Ona chaḍa anaj kiriń lạgitʼ arhõ ṭakale ạguakada. Menkhan ona ṭaka aleakʼ bostare okoeye doholeda ona do bale baḍaea.”

²³ Uni ńel todaroticʼ doe menkeda, “Jotoge ṭhikgea, alope botorokʼa. Ape ar aperen babaren Isorge ona dan do apeakʼ bostareye doholeda. Apeakʼ ṭaka doń ńam akada.” Ar noa menkate Simeon do onko ṭhene oḍok ạgukedea.

²⁴ Ona tayom uni do sanamko Josephakʼ oṛakʼ bhitriteye aderketʼkote ạbukokʼ lạgitʼ dakʼe ematʼkoa ar onko do jaṅgako ạbukena. Uni do onkoren gadhako hõe jom ocoketʼkoa.

²⁵ Ar tikin jokhecʼ Josephakʼ hijukʼ iạte onko do akoakʼ danko dohokeda. Enteko ańjomakatʼ tahẽkana onko do onḍegeko jom-ńũiya mente.

²⁶ Ado Joseph oṛakʼteye hecʼena khan onko do akoakʼ ona dan oṛakʼ bhitriteko ạgukeda ar uniko emadete ombakʼkateko ḍobokʼadea.

²⁷ Ar uni do boge judại kuliketʼkoa, “Aperen baba uni haṛam hoṛ do cetʼ bogege menaea? Uni do cetʼ ńitʼhõe jiwetʼgea?”

²⁸ Onkoko roṛ ruạṛkeda, “Amren golam aleren baba do ńit hõe jiwetʼgea ar bogege menaea.” Ar noa menkate ombakʼkateko ḍobokʼadea.

²⁹ Joseph do beṛhaete beṅgetʼkate acʼren boeha Benjạmine ńelkedeteye menkeda, “Nui do cetʼ aperen huḍiń utạricʼ boeha kanae one okoe reakʼ kathape metadiń tahẽkan?” Ona tayom uni do Benjạmine metadea, “Isore dayawam ma!”

³⁰ Boehae ńelkede khan Josephakʼ ontor do bhak bhakaoentaea. Uni do usạrate onḍe khone oḍokena ar acʼakʼ kandhare bolokate rarakʼe dhurạuena.

³¹ Tayomte mẽtʼãhãe apʼente onḍe khone oḍok hecʼena ar apnare sambṛaoente jomakʼ emokʼ lạgitʼe hukumkeda.

³² Emokʼicʼ do Joseph, ar uniren boehako mitʼ ṭhene jom ocoketʼkoa ar Josephakʼ oṛakʼre okoe Misrikoko jom ńũiyetʼ tahẽkan onko do eṭakʼ jaegareye jom ocoketʼkoa. Ente misriko do Ibriko sãote bako jom ńũiyetʼ tahẽkana, ente onko ṭhen do hirkhạwakʼge tahẽkana.

³³ Joseph samaṅre uniren boehako do umer lekateko duṛupʼ ocoakan tahẽkana. Noate onko doko hahaṛayena ar apan ạpinko beṅgetʼ baṛawana.

³⁴ Joseph do acʼakʼ ṭebil khon thoṛa jomakʼ boehako emako lạgitʼe kolkeda. Ar eṭakʼ boehako khon Benjạmin do mõṛẽ doboṛ bạ̃ṛtiye emocoyena. Nonkate onko do Joseph sãoteko jom ńũkeda. Arko jom-ńũketʼte uni tulucʼko rạskạyena.