Genesis 40 - সান্তালী বাইবেল

Kạidikinakʼ kukmũ ar ona reakʼ bhed

¹ Noako ghoṭna tayom Misor rajren barea kạmiyạ hoṛ do raj upạrtekin behokkeda. Nukin modre mitʼṭen do piṭhạ bekʼnaoicʼ sordar ar eṭakʼicʼ do darkha rasa dudulicʼe tahẽkana.

² Pharao do nukin bana hoṛ cetanre nunạkʼe ạṛisena,

³ onate uni do Josephren kisạ̃ṛakʼ kạidi oṛakʼreye bhoraokatʼkinạ. Ar Joseph hõ inạ mitʼ ṭhạ̃iregeye bondi ocoakan tahẽkana.

^4-5 Kạd oṛakʼren sordar do nukin banar kạidikinakʼ bhar do Joseph cetanregeye dohokeda, ar Joseph hõ unkin ńel todarotkine ehopʼena. Ḍher din tayom Misor rajakʼ bondire menakʼkin unkin hoṛ do ńindạ jokhecʼ bana hoṛge mimitʼ goṭecʼkin kukmũkeda. Unkin mimitʼ hoṛakʼ kukmũ reakʼ do bises mane tahẽkana.

⁶ Setakʼ jokhecʼ Joseph do unkin ṭhene calaoen khan uni do mirluṅgeye ńelketʼkinạ.

⁷ Ona ńelte Joseph do unkine kuliketʼkinạ, “Teheń do cedakʼ nunạkʼ mirluṅ ben ńelokʼkana?”

⁸ Unkin dokin roṛ ruạṛadea, “Ạliń bana hoṛge mimitʼ goṭecʼ liń kukmũ akada, menkhan ona reakʼ bhede lạiyạliń nonkan celege nonḍe do bạnukʼkoa.” Joseph doe metatʼkinạ, “Ona kukmũ reakʼ bhed lại daṛeaben reakʼ ektiạri do cetʼ Isorakʼ tire bạnukʼa? Oka kukmũ ben ńelakatʼ ona baṛe lạiyạń ben.”

⁹ Unre darkha rasa dudulicʼ sordar do acʼakʼ kukmũ reakʼ katha Josephe lạiyadea. Uni doe menkeda, “Iń do kukmũte iń samaṅre mitʼṭecʼ darkha nãṛĩń ńelkeda.

¹⁰ Ona do pea ḍạrena. Ar ona ḍạr do sagenokʼ são sãote bahayena ar thoka thoka joyente beleyena.

¹¹ Unre Pharaoakʼ darkha rasa reakʼ bạṭi do ińakʼ tire tahẽkana. Iń do ona darkha jo hataokateń roḍocʼkeda ar Pharao iń emadea.”

¹² Joseph do uniye metadea, “Amakʼ kukmũ reakʼ mane do noage. Pea ḍạr do hoyokʼ kana pe din.

¹³ Pharao do pe din khange nonḍe khone oḍokmea ar lahateakʼ kạmireye bahal ruạṛmea. Ar am do darkha rasa dudulicʼ lekate arhõ Pharaoakʼ bạṭirem dula.

¹⁴ Menkhan amakʼ bhageakʼ dinkore iń do alom hiṛińińa. Am do Pharao ṭhen ińakʼ katham lạiya, jemon amakʼ goṛote noa hajot oṛakʼ khoniń oḍok daṛeakʼ.

¹⁵ Ente, Ibrikoakʼ disạm khon jorkateń sapʼ ạgu ocoakana, ar noa disạmre hecʼkate hõ jãhãn nonkanakʼ do bạń kạmi akada one onate noa khạndṛuṅreko aṭkao dohokạń.”

¹⁶ Piṭhạ bekʼnaokoren sordar do tinreye ńelkeda, darkha rasa dudulicʼakʼ kukmũ reakʼ mane do bhagegea unre acʼ hõ Josephe metadea, “Iń hõ mitʼṭecʼ kukmũń ńel akada. Iń doń ńelkeda pe ḍạlicʼ moeda reakʼ piṭhạ do bohokʼreń dipil akada.

¹⁷ Ar cetan reakʼ ḍạlicʼre do Pharao lạgitʼ aema lekan piṭhạko tahẽkana. Menkhan cẽṛẽko do hecʼkate ińakʼ bohokʼ reakʼ ona ḍạlicʼ khon jojomko ehopʼena.”

¹⁸ Unre Joseph do roṛ ruạṛadeteye metadea, “Nõkʼõe amakʼ kukmũ reakʼ manetetʼ do. Pe ḍạlicʼ reakʼ mane do hoyokʼ kana pe din.

¹⁹ Niạ pe din bhitrire Pharao do amakʼ bohokʼ am khone ńurtama are pạsimea, ar cẽṛẽko hecʼkate amakʼ jelko ṭhokrao joma.”

²⁰ Niạ pe din hilokʼre Pharao do acʼ tabereko kạmikan hoṛko lạgitʼ mitʼṭecʼe bhojkeda. Enhilokʼ uni do acʼakʼ janam din tahẽkantaea. Pharao do acʼren darkha rasa dudulicʼ ar piṭhạ bekʼnaokoren sordare oḍokketʼkinte onko samaṅreye ạguketʼkinạ.

²¹ Ar acʼren darkha rasa dudulicʼ do lahateakʼ kạmireye bahal ruạṛkedea, ar uni do Pharaoakʼ bạṭire dudule ehopʼena.

²² Menkhan piṭhạ bekʼnaokoren sordar doe pạsikedea. Joseph cetʼleka kukmũ reakʼ manetetʼe lạiyatʼkin tahẽkan onkage unkinre hoyena.

²³ Menkhan uni darkha rasa dudulicʼ do Josephakʼ ona katha doe hiṛińkeda; ar bae disạleda.