Genesis 4 - সান্তালী বাইবেল

Kain ar Habel

¹ Adam do acʼren bạhu Hawa tulucʼe giticʼmitʼen khan Hawa doe bhạrti hoṛmoyena, ar Kain ńutuman mitʼṭen koṛa hopone janamkedea. Unre Hawae menkeda, “Probhu Isor do mitʼṭen koṛa hopone emakawạdińa.”

² Tayomte uniyakʼ kukhire Kainren boeha Habele janamena. Habel do bhiḍi gupikoe ehopʼena ar Kain do jumi cacasicʼe hoyena.

³ Mitʼdin Kain do Probhu Isor ṭhen acʼakʼ jumi reakʼ phosol ạgukateye samaṅkeda.

⁴ Ar Habel hõ acʼren bhiḍi palko khon pạhil janam akan bheḍako ạgukate onkoakʼ itil reakʼ hĩskoe samaṅkeda. Probhu Isor do Habelakʼ samaṅokʼakʼe ataṅkeda,

⁵ menkhan Kainakʼ dãṛẽ do bae ataṅleda. Onate Kain do raṅgaote mẽtʼãhãe dhundketʼtaea.

⁶ Noa ńelte Probhu Isor do Kaine kulikedea, “Am do cedakʼem raṅgao akana ar cedakʼ mẽtʼãhã dom dhund akatʼtama?

⁷ Bhageakʼem kạmi akatʼ khan enḍekhan amakʼ mẽtʼãhã do cedakʼ kharsala baṅ ńelokʼkantama? Am do bhageakʼ bam kạmi akatʼte kại doe khudạu baṛamea ar ona do amakʼ duạrre hecʼkate duṛupʼkokʼa; menkhan uni bhagaoe hoyokʼtama.”

⁸ Mitʼ din ṭạnḍirekin tahẽkanre Kain do Habel sãote kathae roroṛkan tahẽkanre uni do acʼren boeha Habel cetanre tiye tulketʼte uniye gocʼkedea.

⁹ Unre Probhu Isor do Kaine kulikedea, “Amren boeha Habel do okare menaea?” Kaine menkeda, “Bạń baḍaea. Ińren boeha ńel todarote reakʼ bhar do cetʼ iń cetanre menakʼa?”

¹⁰ Unre Probhu Isore menkeda, “Cetʼem ceka akada? Ńelme, ot khon amren boehawakʼ mãyãm do iń ṭhene rakʼeda.

¹¹ Ar ot hõ amren boehawakʼ mãyãm ataṅ lạgitʼ moca bae jhicʼetʼte jumi reakʼ sarap do amrege paṛaoena.

¹² Jumi dom casgea menkhan ḍher phosol do baṅ hoyokʼtama. Ar uḍạcal hoṛ leka dhạrtirem ạcur baṛaea.”

¹³ Unre Kain do Probhu Isore metadea, “Noa sạjại do ohoń sahao daṛelea.

¹⁴ Teheń am do jumi khonem lagayediń kana, ar amakʼ mẽtʼãhã samaṅ khoniń danaṅokʼa. Ar dhạrtireń ạcur baṛaere jãhãe samaṅregeń paṛaokʼ unige iń doe gojeńa.”

¹⁵ Unre Probhu Isor do uniye metadea, “Enḍekhan, okoe ame khũnme uni cetanre iń do eae doboṛiń hala ruạṛa.” Noa menkate Probhu Isor do Kain lạgitʼ nonkan mitʼṭecʼ cinhại bondoboskeda jemon jãhãege samaṅre ńamkate hõ aloko goje.

Kainren bõsko reakʼ katha

¹⁶ Noa tayom Kain do Probhu Isor samaṅ khone calaoente Eden reakʼ purub secʼ Nod ńutumanakʼ mitʼṭecʼ disạmre girobasokʼe ehopʼena.

¹⁷ Ar Kain do acʼren bạhu tulucʼe giticʼmitʼen khan uni doe bhạrti hoṛmoyena ar Hanoke janamkedea. Ar Kain do mitʼṭecʼ nagrahae benaokeda. Uni do acʼren gidrạwakʼ ńutum lekate Hanok nagrahae dohokeda.

¹⁸ Hanokren gidrạwakʼ ńutum do Irad tahẽkana; ar Iradren hoponakʼ ńutum do Methusael; ar Methusaelren hoponakʼ ńutum do Lamek tahẽkana.

¹⁹ Lamekren do barea bạhukin tahẽkantaea. Unkin modre mitʼ hoṛakʼ ńutum do Ada, ar eṭagicʼakʼ ńutum do Silạ tahẽkana.

²⁰ Adawakʼ kukhire do Jabale janamena. Nui Jabalge tạmbure tahẽkate okoe do mĩhũ meromko ạsuletʼko tahẽkan onkoren hapṛame tahẽkana.

²¹ Jabalren boehawakʼ ńutum do Jubạl tahẽkana. Uni do banam ar tirioko oroṅetʼ tahẽkan hoṛkoren hapṛame tahẽkana.

²² Silạwakʼ kukhire do Tubạle janamena. Uni do tamba ar mẽṛhẽtʼ reakʼ joto lekan laser jinisko benao reakʼe kạmikan tahẽkana. Tubạl-Kainren miseratakʼ ńutum do Nayma tahẽkana.

²³ Mitʼdin Lamek do acʼren banar bạhui metatʼkinạ, “Ada ar Silạ, ińakʼ katha ańjom ben; Lamekren bạhukin, ińakʼ katha luturakʼ ben. Okoeṭakʼ hoṛ ińe hạnledeń, metakʼme okoeṭakʼ koṛa do ińe joṭetʼledeń, uni doń khũn akadea.

²⁴ Kạin khũn reakʼ hala ruạṛ eae doboṛ hoyokʼ khan, Lamek khũn reakʼ hala do eae gel doboṛ hoyokʼa.”

Seth ar Enos

²⁵ Tayomte Adam do arhõ acʼren bạhu tulucʼe giticʼmitʼena ar Hawa do ar mitʼṭen koṛa hopone janamkedea. Ar uniyakʼ ńutum do Sethe dohoketʼtaea. Hawae menkeda, “Kain do Habele khũnkedete Isor do Habel bodolte armitʼṭen hopone emadińa.”

²⁶ Ar Sethren do mitʼṭen koṛa hopone janamena. Uniyakʼ ńutum do Enose dohoketʼtaea. Ar unkhon hoṛko do Probhu Isorakʼ ńutum manotko ehopʼkeda.