Genesis 39 - সান্তালী বাইবেল

Joseph ar Poṭiphar rinicʼ

¹ Ar Joseph do Misor disạmteye idi ocoyena. Ismaelrenkoge uni do onḍeko idikedea. Ar Poṭiphar ńutuman Pharaoren mitʼṭen misri kạmiyạ hoṛ do onko ṭhen khon Josephe kirińkedea. Uni do Pharaoren rurukhiyạ dolkoren sordare tahẽkana.

² Probhu Isor do Joseph sãoteye tahẽkante joto lekan kạmireye jo baha ocoyede tahẽkana. Onate uni do Misriạ kisạ̃ṛakʼ oṛakʼreye doho ocoyena.

³ Ar uniren kisạ̃ṛ doe ńelkeda Probhu Isor do Joseph sãore menaete uniyakʼ joto lekan kạmireye jo baha ocoyedekana.

⁴ Onate Joseph do kisạ̃ṛakʼ nońjorreye paṛaoena ar uniren sapʼdapʼicʼe doho ocoyena. Ar kisạ̃ṛ do acʼakʼ gharońj ar dhon-duribko ńel todarot reakʼ bhar hõ Joseph cetanreye dohokeda.

⁵ Joseph noako bhare em ocoyen tayom Joseph iạte Probhu Isor do uni Misri kisạ̃ṛakʼ jotowakʼe bhoratʼtaea. Probhu Isor do Poṭiphorakʼ oṛakʼ-duạr, ot-baṛge ar ona reakʼ jotowakʼgeye bhorada.

⁶ Noa ńelte Poṭiphor do acʼakʼ joto reakʼ bhar Josephe aṛakʼadea. Joseph cetanre jotowakʼ reakʼ bhar tahẽkante Poṭiphor do eken acʼakʼ jomakʼ chaḍa ar cetʼ reakʼ hõ bae dạndikʼkan tahẽkana. Joseph do rupte ar ńelokʼte ạḍi napaegeye tahẽkana.

⁷ Onate uni do thoṛa dinrege acʼ kisạ̃ṛren bạhuttetʼakʼ nońjorreye paṛaoena. Mitʼ din uni do Josephe metadea, “Dela ińakʼ aṭetʼte hijukʼme ar iń tulucʼ giticʼmidokʼme.”

⁸ Menkhan Joseph do bae rebenlena. Uni doe menkeda, “Ńelme, noa oṛakʼre minạńte ińren kisạ̃ṛ do jãhãnakʼ reakʼ bae dạndikʼ kana. Uni do acʼakʼ jotowakʼko cetanre ińe dohoakadińa.

⁹ Noa oṛakʼre iń cetante ar celege bạnukʼkoa. Ar am do uniren bạhu kanam, onate eken am chaḍa ar sanamkoge iń tabereye dohoakatʼkoa. Ar iń do cekate nonkan bạṛicʼ kạmiń kạmite Isor upạrteń kại daṛekea?”

¹⁰ Poṭiphorren bạhu do dinke din ona kathage hudisokʼe ehopʼena. Menkhan Joseph do uni tulucʼ tahen ar giticʼmidokʼ hõ bae rạjilena.

¹¹ Mitʼ din Joseph do acʼakʼ kạmi lạgitʼ oṛakʼteye bolo akan tahẽkana. Ar unre oṛakʼre do celege bako tahẽkana.

¹² Unre Poṭiphorren bạhu do Josephakʼ kicricʼ sapʼkateye menkeda, “Dela aṭetʼre iń tulucʼ giticʼmidokʼme.” Unre Joseph do acʼakʼ kicricʼ giḍikate bahreteye ńir oḍokena.

^13-14 Phoṭiphorren bạhu do Joseph acʼakʼ tire kicricʼ giḍikate bahrete ńir oḍokokʼe ńelkede khan uni do acʼren gutiko hohoatʼkoteye metatʼkoa, “Ńelpe, uni do abo opoman bon lạgitʼ nui Ibri hoṛe ạgu akadea. Uni do iń nosṭoyiń lạgitʼ iń ṭhene bololena. Ar iń do kajakteń kạumạukeda.

¹⁵ Ar ińakʼ kạumạu ańjomte uni do acʼakʼ kicricʼ iń ṭhen bhạnduṛ oṭokate bahreteye ńir oḍokena.”

¹⁶ Ar Josephren kisạ̃ṛ oṛakʼte ạuriye ruạṛ hijukʼ hạbicʼ kicricʼ do acʼ ṭhengeye dohokada.

¹⁷ Uni do Poṭiphor noa katha baḍae ocokedeteye metadea, “Okoeṭakʼ Ibri guti abo ṭhenem ạgu akade uni do nosṭoyiń lạgitʼ ińakʼ oṛakʼteye bololena.

¹⁸ Menkhan ińakʼ kạumạu ar hoho iạte uni do acʼakʼ kicricʼ giḍikateye ńir oḍokena.”

¹⁹ Erattetʼakʼ noa katha ańjomkate kisạ̃ṛ do ạḍiye edreyena, ente acʼren bạhui metade tahẽkana, “Amren guti doe nonka kedińa.”

^20-21 Unre Poṭiphor do hajotre Josephe bhoraokadea one oka ṭhạ̃ire raj bondiko dohoyetʼko tahẽkan. Menkhan Probhu Isor do hajotre hõ Joseph sãoteye tahẽkana. Uni do Probhu Isorre pạtiạugeye tahẽyena ar Probhu Isor do uniye dayawadete hajot khanaren sordarakʼ nońjorreye paṛao ocokedea.

²² Hajotren sordar do sanam kạidiko cetanre Joseph bhare emadea jemon onḍenakʼ sanam kạmiko Josephakʼ sanaleka hoyokʼ.

²³ Joseph cetanre okako kạmi reakʼ bhar tahẽkan hajot khanaren sordar do ona bae ńel todarotetʼ tahẽkana, ente Probhu Isor do Joseph sãoreye tahẽkana, ar Joseph do jotowakʼ kạmiregeye jo baha ocokedea.