Genesis 38 - সান্তালী বাইবেল

Jihudạ ar Tamor

¹ Niạ tayom Jihudạ do acʼren boehako bạgikate Adulam atoren mitʼṭen hoṛ sãote girobasokʼe ehopʼena. Uni hoṛakʼ ńutum do Hirạ tahẽkana.

² Onḍe tahen jokhecʼge Suạ ńutuman mitʼṭen Kanan hoṛren hoponerare uni do mẽtʼ lagaoentaea. Ar uni kuṛiye baplakedea.

³ Ar uni doe bhạrti hoṛmoyena ar mitʼṭen koṛa gidrại janamkedea. Ar Jihudạ do gidrạwakʼ ńutum Ere dohoketʼtaea.

⁴ Ona tayom uni do arhõe bhạrti hoṛmoyena ar uniren do armitʼṭen koṛa gidrại hoyentaea. Ar eṅgattetʼ do gidrạwakʼ ńutum Onane dohoketʼtaea.

⁵ Ona tayom uni do arhõe bhạrti hoṛmoyena ar uniren do arhõ mitʼṭen koṛa gidrại janamena. Ar uniyakʼ ńutum do Selae dohoketʼtaea. Nui gidrại janamokʼ jokhecʼ onko do Kesib atoreko tahẽkana.

⁶ Tayomte Jihudạ do acʼren maraṅicʼ hopon Er sãote Tamor ńutuman mitʼṭen kuṛi tulucʼe baplakadea.

⁷ Menkhan Jihudạren nui hopon do Probhu Isor nońjorre bạṛicʼgeye tahẽkante jiwetʼ bae doholedea.

⁸ Jihudạ do unre Onane metadea, “Dadamren rạnḍi bạhu do amge baplayem. Ar erweltetʼ koṛa lekate okaṭakʼ ganokʼ ona onkaeme ar Dadamren hoykate uniyakʼ bõsem rukhiyạitaea.”

⁹ Onan doe baḍaekan tahẽkana, ona bõs do acʼakʼ baṅ hoyokʼtaea mente. Onate boeha hoykate bõs rukhiyại lạgitʼ tinạkʼ dhao hilit era tulucʼe giticʼmitʼen unạkʼ dhaoge acʼakʼ herelteakʼ itạ do otreye giḍikada.

¹⁰ Menkhan uniyakʼ noa kạmi iạte Probhu Isor do bae kusilena. Onate uni hõ jiwetʼ do bae tahẽ ocowadea.

¹¹ Unre Jihudạ do acʼren kimintetʼ Tamore metadea, “Tin hạbicʼ ạlińren hopon Sela bae hara juạnokʼ unhạbicʼ aben do abenren apatakʼ oṛakʼre senkate rạnḍi hoṛ leka tahẽ hataṛokʼ ben.” Ente Jihudạwakʼ monre noa botor tahẽkana, Sela hõ acʼren boehako lekae gujukʼa. Ar Jihudạwakʼ kathate Tamor do acʼ apatakʼ oṛakʼte senkateye tahẽyena.

¹² Noa ḍher din tayom Jihudạren bạhu, metakʼme Suạren hoponera doe gocʼena. Ar uni lạgitʼ homor halaṅ reakʼ din cabayen khan Jihudạ do acʼren gate Adulamren Hirạ soṅgekate Timnạteye calaoena. Ar okoeko hoṛ do uniren bhiḍikoakʼ upʼko kạpciyetʼtako tahẽkana onko do ona atoregeko tahẽkana.

¹³ Unre mitʼṭen hoṛ do Tamor ṭhen senkateye menkeda, “Ńelme hõńharme do acʼren bhiḍikoakʼ upʼ kạpciytako lạgitʼ Timnạteye calakʼkana.”

¹⁴ Tamor doe ńelkeda, Selawakʼ umer hoyentaere hõ hońhartetʼ do acʼakʼ katha leka Sela sãote bae bapla edekana. Onate uni do rạnḍi kicricʼ bhạnduṛkate ṭuṭurikate kicricʼteye oyo potomena ar Enaim reakʼ duạr phaṭok ṭhen senkateye duṛupʼena. Ona Enaim do Timna calakʼ horrege tahẽkana.

¹⁵ Tamor do mẽtʼãhãe poṭom esetʼ akatʼ tahẽkante Jihudạ do kusmbi kuṛi menteye hudiskedea.

¹⁶ Onate uni do Tamor ṭhen senkateye menkeda, “Dela, am sãoteń giticʼmitʼlenge.” Menkhan uni do acʼren kimintetʼ bae oromledea. Tamore menkeda, “Noa iạte am do cetʼem imạńa?”

¹⁷ Jihudại menkeda, “Ińakʼ pal khon mitʼṭen merom hoponiń kolama.” Tamore menkeda, “Ona ạurim kolạń hạbicʼ iń ṭhen jãhãnakʼ bondhok doho oṭokakʼme?”

¹⁸ Jihudại menkeda, “Cetʼ iń doho oṭokakʼa?” Uniye menkeda, “Baber sudhạ amakʼ mohor chap akatʼ amakʼ ti reakʼ ṭheṅga.” Unre Jihudạ do onako uni ṭhene doho oṭokatʼte uni tulucʼe giticʼmitʼena, ar onate Tamor doe bhạrti hoṛmoyena.

¹⁹ Niạ tayom Tamor doe calaoena ar bohokʼ reakʼ kicricʼ giḍikate arhõ rạnḍi maejiuakʼ kicricʼe bandekeda.

²⁰ Jihudạ do uni maejiu ṭhen khon ona bondhok dohoakan jinis ạguy lạgitʼ acʼren gate Adulam tite mitʼṭen merom hopone kolkedea. Menkhan uni do bae sendra ńam daṛeadea.

²¹ Unre uni do onḍenko hoṛkoe kuliketʼkoa, “Enaim reakʼ hor aṛere okoeṭakʼ kusumbi kuṛiye tahẽkan uni do okare menaea?” Onkoko menkeda, “Nonḍe do cele kusumbi kuṛige bạnukʼkoa.”

²² Unre uni do Jihudạ ṭhen ruạṛ senkateye menkeda, “Iń do bạń sendra ńam daṛeadea. Ona chaḍa onḍenko hoṛko meneda, onḍe jãhãn mundil-kusumbige bạnukʼkoa.”

²³ Jihudại menkeda, “Enḍekhan ona jinisko do uni ṭhenge tahẽocoge, ar baṅ khan hoṛko do alaṅko landa dhutʼalaṅa. Ona chaḍa merom hopon mań kolledege, menkhan bam sendra ńam daṛeadea.”

²⁴ Noa pe cando tayom Jihudạ doe ańjom ńamkeda, kimintetʼ doe laṭghaṭ akada ar onateye bhạrti hoṛmo akana. Noa katha ańjomkate Jihudạ doe menkeda, “Uni do oḍokete seṅgelreye khadle ocokʼma.”

²⁵ Tamor do tinreye oḍok giḍi ocokʼkan tahẽkana unre acʼren hońhartetʼ ṭhene roṛgotʼkada, “Ạlińakʼ kukhire okoeren gidrạ menae noako do uniyakʼ jiniskana.” Ona tayom uniye menkeda, “Dayakate mitʼ dhao biḍạulegae ben noa baber sudhạ mohor chapakatʼ ar ṭheṅga do okoeyakʼ kana mente?”

²⁶ Jihudạ do onakoe ńel oromketʼteye menkeda, “Uni do iń khon ḍhere bhagegea, ente ińren hopon Sela sãote bạń bapla akadea.” Noa tayom uni do ar tishõ Tamor sãote bae giticʼ mitʼlena.

²⁷ Ado gidrạ hoyokʼ jokhecʼ Tamorakʼ kukhire jawa gidrạ menakʼ kinạ mente ńelena.

²⁸ Janamokʼ jokhecʼ mitʼṭen gidrạ do ti oḍok lahayentaea. Unre dhạ̃i buḍhi do mitʼṭecʼ arakʼ sutạm uniyakʼ tire tolketʼteye menkeda, “Nui do lahareye janamena.”

²⁹ Menkhan hahaṛa do noage ńelena, nui gidrạ do tinre acʼakʼ ti bhitriteye or aderkeda ar unrege uniren eṭakʼ boeha doe oḍokena. Unre dhạ̃i buḍhi doe menkeda, “Am do cekate tạkicʼakʼ dom parom ạgukeda?” Ar ona iạte uniyakʼ ńutum do Peres dohoyena (metakʼme “Tạkʼkicʼ rạputʼakʼ”).

³⁰ Ona tayom acʼren boeha do arakʼ sutạmte tolgeye oḍok hecʼena. Ar uniyakʼ ńutum do Sereho dohoyentaea.