Genesis 35 - সান্তালী বাইবেল

Isor do Bethel ṭhen Jakobe bhoraekan

¹ Niạ tayom Isor do Jakobe metadea, “Am do ńitokʼ Bethelre senkate tahenme. Ar amren boeha Esau ṭhen khonem ńir pharakokʼ jokhecʼ okoe do am ṭhene ńel ocolen uni Isor lạgitʼ onḍe mitʼṭecʼ pinḍ benaome.”

² Unre Jakob do acʼren hoṛko ar sãoten eṭakʼ hoṛkoe metatʼkoa, “Ape ṭhen tinạkʼ boṅga murhutʼko menakʼko onko joto do giḍikakope ar apnar baṛe saphakʼpe ar apeakʼ kicricʼko bodoltape.

³ Ona tayom do dela, Bethelte bon calakʼa. Iń do onḍe Isor lạgitʼ mitʼṭecʼ pinḍ iń benaoa ente uni do muhinreye goṛowạdiń tahẽkana ar joto jaegarege iń sãoteye tahẽkana.”

⁴ Unre onko ṭhen tinạkʼ boṅga murhutʼko tahẽkan onko do Jakobakʼ tireko jimạketʼkoa. Ona sãote lutur reakʼ pagrako hõ uniko emadea. Ar Jakob do onako hataokate Sikem nagraha ṭhenakʼ maraṅ dare buṭạreye topakada.

⁵ Ona tayom onko doko mohnḍayena. Onkoakʼ calakʼ horre Isor do aḍe pase nagraharen hoṛko talare nonkan mitʼṭecʼ botore rakapʼ ocokeda ar onate Jakobren hoṛ do celege bako khudạuletʼkoa.

⁶ Jakob ar uni soṅgeten sanamkoge Kanan disạm reakʼ Lus nagrahate, metakʼme Bethelreko seṭerena.

⁷ Onḍe uni do mitʼṭecʼ pinḍe benaokeda. Ar ona jaega reakʼ ńutum do El-Bethele dohokeda (metakʼme “Bethelren Isor”), ente boeha ṭhen khone dạṛletʼ jokhecʼ Isor do onḍege uni ṭhene sodorlena.

⁸ Niạko dinre Rebekaren dhạ̃i buḍhi Dabora doe gocʼena. Uni do Bethel ṭhenakʼ mitʼṭecʼ maraṅ dare buṭareko topakedea. Ona iạte ona jaega reakʼ ńutum do Alon-Bakotko dohokeda (metakʼme “Rakʼjoṅ dare”).

^9-10 Jakob do Padam-Aram khone hecʼen khan Isor do arhõ uni ṭhene ńel ocoyena ar bhoradeteye metadea, “Amakʼ ńutum do Jakob tahẽkana, menkhan Jakob mente do arbam hoho ocokʼa; amakʼ ńutum do hoyokʼa Israel.” Ar noa menkate uniyakʼ ńutum do Israele dohoketʼtaea.

¹¹ Isor do arhõe metadea, “Iń do phạdkoren Isor kạnạń. Am do ạḍi utạr hoponkoren apatem hoyokʼa arpe saṅgekʼa. Iń do am khonge mitʼṭecʼ jạtrenkoń rakapʼkoa, ar mitʼṭecʼ ḍher bõsrenko benao rakabokʼa. Ar amakʼ bõsre aema rapajko janamokʼa.

¹² Okaṭakʼ disạm do Abraham ar Ishạhakiń ematʼkin tahẽkan ona disạmge iń do amiń emama. Ar am tayom do amren bõskoń emakoa.”

¹³ Isor do Jakob tulucʼ katha galmarao tayom onḍe khon coṭteye rakapʼ calaoena.

¹⁴ Ar Jakob do ṭhik ona jaegare dhiri reakʼ cinhạ khunṭiye teṅgokeda ar ona cetanre coḍor samaṅokʼakʼe samaṅkeda. Ar ona tayom do ona cetanre sunume dulada.

¹⁵ Isor okare uni sãoteye galmaraoletʼ Jakob do ona jaega reakʼ ńutum Bethele dohokeda.

Rahelakʼ gujukʼ

¹⁶ Ona tayom Jakob ar uniyakʼ gharońjrenko do Bethel khonko mohnḍayena. Ar Ephrat reakʼ horte thoṛa sạṅgińko senen khan Rahel do bedon rakapʼadea ar ạḍi kosṭokʼe ehopʼena.

¹⁷ Ar gidrạ janame reakʼ haso ḍherentae khan dhạ̃i buḍhiye menkeda, “Alom botorokʼa, niạ dhao hõ koṛa gidrại hoyokʼtama.”

¹⁸ Menkhan Rahel doe gocʼena. Gujukʼ jokhecʼ gidrạwakʼ ńutum do Benoniye dohoketʼtaea (Metakʼme “Ińakʼ dukren hopon”). Menkhan uniren apat do uniyakʼ ńutum Benjạmine dohoketʼtaea (metakʼme “Bhạganren hopon”).

¹⁹ Ar Rahel do Ephrat, metakʼme Bethlehem calakʼ horreko topakadea.

²⁰ Jakob do uniyakʼ topa cetanre cinhạ khunṭi leka mitʼṭecʼ dhiriye condokeda. Ona do teheń hõ Rahelakʼ topa reakʼ cinhạ lekage menakʼa.

²¹ Inạ tayom Israel, metakʼme Jakob do arhõ sen idikʼe ehopʼena. Uni do Megdol-Eder ńutumanakʼ buru hanasare acʼakʼ tạmbui ṭaṅgaoketʼte onḍeye ḍerayena.

Jakobren hoponko

²² Israel do tinre ona ṭoṭhareye girobasokʼkan tahẽkana unre Ruben do acʼ apatren bạhu Bilha sãoteye laṭghaṭkeda. Ar ona do Israel hõe ańjomkeda. Jakobren do gelbar goṭen hoponko tahẽkantaea.

²³ Leawakʼ kukhire Jakobren hoponko modre pạhil hopon do Rubene janamlena. Ona tayom do Simeon, Liwi, Jihudạ, Isakar ar Sebulon.

²⁴ Ar Rahelakʼ kukhire do Joseph ar Benjạmin tạkinkin janamlena.

²⁵ Rahelren kạ̃ṛmĩ era Bilhawakʼ kukhire do Dan ar Napthtali.

²⁶ Learen kạ̃ṛmĩ era Silpạwakʼ kukhire do Gad ar Aser. Jakobren noko hoponko do Padam Aramreko janamlena.

Isahakakʼ gujukʼ

²⁷ Mucạtʼre Jakob do Kiriat-Arab, metakʼme Hebron ṭhenakʼ Mamre nagrahare acʼ apat Isạhak ṭhene hecʼena. Noa ṭoṭharege Abraham ar Isạhak dokin girobasokʼkan tahẽkana.

²⁸ Isạhak do Mitʼsae irạlgel bochor jiwetʼe tahẽkana.

²⁹ Ar purạ jion khemaokate uni doe haṛamena are gocʼente acʼren hapṛamko ṭhene calaoena. Uniren hopon Esau ar Jakob do unikin topakadea.