Genesis 32 - সান্তালী বাইবেল

Jakob do Esau ṭhene calakʼkan

¹ Jakob hõ acʼakʼ horteye calao idiyena. Ar hor reakʼ mitʼ jaegare uni do Isorren goḍetkoe ńelketʼkoa.

² Onko ńelte uni doe menkeda, “Noa do Isorakʼ ḍera kana.” Ar onate ona jaega reakʼ ńutum do Mahanayime dohokeda (metakʼme, “Barea ḍera”).

³ Jakob do acʼ lahate Seyirte, metakʼme Edom disạmte acʼren boeha Esau ṭhen thoṛa hoṛe kolketʼkoa.

⁴ Uni doe roṛ gotʼkada acʼren kisạ̃ṛ Esau jemonko baḍae ocoye, uniren guti Jakob doe meneda, “Iń do Laban ṭheniń tahẽkana.

⁵ Ińren do ḍaṅgrako, gadhako, bhiḍiko, meromko ar guti-kạ̃ṛmĩ sanamkoge menakʼkotińa. Ar ińren kisạ̃ṛ ṭhen dayań ńama aste laha khongeń baḍae ocoyetʼmea.”

⁶ Onko hoṛ do ruạṛ hecʼkate Jakobko metadea, “Ale do amren boeha Esau ṭhenle senlena. Uni do ńitokʼ ponsae hoṛkoante am sãote ńapamokʼ lạgitʼe hijukʼkana.”

⁷ Noa katha ańjomkate Jakob do monre botor caṛhaoadea are dhak dhakaoena. Uni do acʼ soṅgeten hoṛko, bhiḍi-meromko, ḍaṅgrako, gadhako ar ũṭko bar ṭhene begarketʼkoa.

⁸ Uni doe hudiskeda, Esau hecʼkate mitʼ dolrenkoe ńẽtʼlekore eṭakʼ dolrenko doko dạṛ pạnḍucʼ daṛeakʼa.

⁹ Jakob do Isor ṭhen noa menkate koejoṅe ehopʼena, “E Probhu, ińren hapṛam Abrahamren Isor, ińren ạpuń Isahakren Isor, amge coṅ ińakʼ disạmte, ińren hoṛko ṭhen ruạṛ calakʼem menakadińạ ar onḍe am dom bhạlạiyińạ.

¹⁰ Amren nui guti oka daya ar pạtiạrem udukʼ akawade onaren lek doń baṅkana. Eken mitʼṭecʼ ṭheṅga tire sapʼkate noa Jordan gaḍań paromlena, menkhan ńitokʼ iń soṅgere barea maraṅ dolrenko menakʼkoa.

¹¹ Nehõram kạnạń, ińren boeha Esauakʼ ti khon rukhiyạyińme. Enteń botorokʼ kana uni do hecʼkate aleye gocʼlea, gidrạ ar onkoren eṅgatko celege sarecʼ do bae doholeya.

¹² Menkhan am dom metadiń tahẽkana, ‘khạṭige amiń bhạlạiymea ar am bõsren hoṛ do jalapuri reakʼ gitil lekań saṅge ocokoa ar onko do okoehõ bako lekha caba daṛeakoa.’ ”

¹³ Jakob do ona ńindạ onḍegeye tahẽ aṅgayena. Ar acʼakʼ okako tahẽkantae onako khon uni do acʼren boeha Esau lạgitʼ mitʼṭecʼ dane ṭhik dohokeda.

^14-15 Ona do hoyokʼ kana, barsae merom pạṭhi ar bargel merom eṅga, barsae bhiḍi ar bargel bheḍa, hopon sudhạ toa emokʼ pegel ũṭko, pongel gại ar gel goṭecʼ ḍaṅgra, bargel gadha eṅga ar gel goṭecʼ gadha.

¹⁶ Onko do eṭakʼ eṭakʼ dolreye hạṭińketʼkote gutikoakʼ tire jimạkateye metatʼkoa, “Mimitʼ dolko tayomre thoṛa jaega dohokate iń laha lahate calakʼpe.”

¹⁷ Uni do pạhil dolren gutiye hukumadea, “Ińren boeha Esau tulucʼem ńapamlenre uni tinreye kulimea, ‘okatem calakʼkana? Ar okoeren hoṛ kanam? Am samaṅren mĩhũ-merom pal doko okoeren kana?’

¹⁸ Unrem mena, ‘noko do amren guti Jakobren kanako. Uni do acʼren kisạ̃ṛ Esau lạgitʼ noa dane kol akada, ar uni do ale tayomre menaea.’ ”

¹⁹ Nonkage uni do dosar, tesar ar eṭakʼ gutiko okoe do palrenko idiyetʼko tahẽkan onko sanamkoe hukumatʼkoa, “Esau tulucʼpe ńapamlen khan apehõ inạ kathagepe mena.

²⁰ Ar mucạtʼrepe mena, ‘amren guti Jakob do ale tayomrege menaea.’ ” Jakob do mone monte noae hudiskeda, “Iń laha lahate okaṭakʼ dan calakʼkan onatege uni doń hape ocoyea. Ona tayom tinre uni tulucʼ iń ńapama hoedaṛeakʼa unre uni doe ataṅińa.”

²¹ Dan reakʼ jinisko acʼ lahate calaoenre hõ ona ńindạ hõ onḍegeye tahẽyena.

Penuel ṭhen Jakobakʼ lạṛhại

²² Ona ńindạge Jakob do beretʼkate taṛamate paromokʼ nonkan mitʼṭecʼ jaegate acʼren banar bạhu, banar kạ̃ṛmĩ ar gelmitʼ hoponko do gaḍae paromketʼkoa.

²³ Ar cetʼko tahẽkantae onako joto do onko sãoteye kolgotʼkada.

²⁴ Onate Jakob do eskargeye tahẽyena. Unre mitʼṭecʼ hoṛ do hecʼkate ạuri aṅgakʼ hạbicʼ uni tulucʼe lạṛhạiyena.

²⁵ Uni hoṛ do tinreye ńelkeda, Jakob bae bhagao daṛeae kana unre uni do Jakobakʼ ḍubhi jaṅe joṭetʼketʼtaea. Onate uniyakʼ bulu reakʼ jaṅ do ṭhik jaega khon ocokʼentaea.

²⁶ Unre uni hoṛe menkeda, “Aṅga hijukʼ kana, ńitokʼ do aṛakʼkạńme.” Jakobe menkeda, “Ạurim bhorạń hạbicʼ bạń aṛakʼmea.”

²⁷ Uni hoṛe menkeda, “Cetʼtam ńutum do?” Khane roṛ ruạṛadea, “Iń doń Jakob kana.”

²⁸ Uni hoṛe menkeda, “Isor ar manwa sãote lạṛhạikatem jitạu akante amakʼ ńutum Jakob do baṅ tahena, amakʼ ńutum do hoyokʼa Israel (metakʼme ‘Isor tulucʼ lạṛhạiyicʼ ’).”

²⁹ Jakob do uniye metadea, “Nehõram kạnạń, amakʼ ńutum baṛe lạiyạńme?” Uniye menkeda, “Ińakʼ ńutum do cedakʼem kuliyedińkana?” Ar noa katha menkate uni do Jakobe bhoradea.

³⁰ Unre Jakob do ona jaega reakʼ ńutum Penuele dohokeda (metakʼme “Isorakʼ mẽtʼãhã”). Uniye menkeda, “Iń do samna sạmni Isoriń ńelkedere hõ jiwetʼge minạńa.”

³¹ Jakob do tinre Peniel khone mohnḍayena unre siń cando doe rakapʼena. Ar acʼakʼ bulu iạte kheṛdokʼ kheṛdokʼe taṛam idikeda.

³² Onate Israelko do bulu joṛao cetan reakʼ jel teheń hạbicʼ bako joma, ente bulu reakʼ joṛao ṭhenge Jakob doe joṭetʼ ocolena.