Genesis 30 - সান্তালী বাইবেল

¹ Rahel do tinreye ńelkeda acʼ do Jakobren gidrạren eṅgat bae hoedaṛeakʼ kana unre uni do acʼren boeha kuṛi cetanre hiskạ rakapʼadea. Uni do Jakobe metadea, “Gidrạ imạńme, arbaṅ khan iń doń gujukʼa.”

² Unre Jakob do Rahel cetanre ạḍiye raṅgaoena. Uniye menkeda, “Iń doń Isor kana se cetʼ? Unige coṅe bạńjhi ocoakatʼme.”

³ Rahele menkeda, “Ińren kạ̃ṛmĩ Bilhạ hataoem. Am do uni ṭhen bolokʼme jemon uni hotete hoborre gidrạń ńame, ar nonkate iń hõ mitʼṭecʼ gharońj iń benao rakaba.”

⁴ Noa menkate Rahel do Jakob sãote acʼren kạ̃ṛmĩ Bilhae baplakadea, ar Jakob hõ uni ṭhene boloyena.

⁵ Nonkate Bilhạ doe bhạrti hoṛmoyena ar mitʼṭen koṛa gidrại janamkedea.

⁶ Unre Rahele menkeda, “Isor do hok reakʼe bicạr akada ar ińakʼ rakʼe ańjomketʼte mitʼṭen koṛa gidrại emadińa.” Ona iạte gidrạwakʼ ńutum do Dane dohoketʼtaea (metakʼme “Hok reakʼ bicạr”).

⁷ Rahelren kạ̃ṛmĩ Bilhạ do arhõe bhạrti hoṛmoyena, ar nonkate uni do dosar dhao koṛa gidrạren eṅgate hoyena.

⁸ Unre Rahele menkeda, “Isor do maraṅ lạṛhạire ińren boeha khone jitạu akadińa.” Onate uni gidrạwakʼ ńutum do Napthaliye dohoketʼtaea (metakʼme “Lạṛhại”).

⁹ Ar Lea tinreye ńelkeda acʼren cele gidrạge bako hoyokʼkana unre acʼren kạ̃ṛmĩ Silpạ do Jakob tulucʼe baplakadea.

¹⁰ Onate Learen kạ̃ṛmĩ Silpawakʼ kukhire Jakobren mitʼṭen koṛa gidrại hoyena.

¹¹ Unre Lea doe menkeda, “Ạḍi bhạg tiń!” Noa menkate uni do gidrạwakʼ ńutum Gade dohoketʼtaea (metakʼme “Bhạg”).

¹² Silpạ do Jakobren armitʼṭen koṛa gidrạren eṅgate hoyena.

¹³ Unre Lea doe menkeda, “Ạḍi suk ińakʼ do! Sanam maejiukoge iń do bhạganicʼko mitạńa.” Onate gidrạwakʼ ńutum do Asere dohoketʼtaea (metakʼme “Kusiʼ”).

¹⁴ Guhum gegetʼ jokhecʼ Ruben do ṭạnḍi secʼe senen khan jauḍicʼ Dudạ joe ńamkeda ar onako ạgukate eṅgattetʼe emadea. Unre Rahel do Leae metadea, “Amren gidrại ạguakatʼ dudạ jo khon thoṛa imạńme.”

¹⁵ Menkhan Lea do uniye metadea, “Ińren jãwãeyem hatao akadere hõ cetʼ baṅ hoyokʼkan tama? Ar ińren hopone ạguakatʼ Dudạ jo hõm khojkana?” Rahele roṛ ruạṛkeda, “Amren hopone ạguakatʼ Dudạ jo bodolte teheń ńindạ uni do am tulucʼe giticʼma.”

¹⁶ Ado ạyupʼ jokhecʼ Jakob do ṭạnḍi khon hijukʼe ńelkede khan Lea doe oḍokente uniye metadea, “Teheń do iń tulucʼem giticʼa, ente hoponińe ạguakatʼ Dudạ jote am doń bhaṛa akatʼmea.” Onate Jakob do enhilokʼ ńindạ Lea tulucʼe giticʼmitʼena.

¹⁷ Isor do Leawakʼ koejoṅe ańjomketʼtaea ar uni doe bhạrti hoṛmoyente mõṛẽ dhao Jakobren gidrạren eṅgate hoyena.

¹⁸ Unre Lea doe menkeda, “Ińren jãwãe do kạ̃ṛmĩń emadete Isor do kuṛạiye emadińạ.” Ar onate uni gidrạwakʼ ńutum do Isakare dohoketʼtaea (metakʼme “Kuṛại”).

¹⁹ Noa tayom Lea do arhõe bhạrti hoṛmoyente turui dhao Jakobren gidrạren eṅgate hoyena.

²⁰ Unre Lea doe menkeda, “Isor do mitʼṭecʼ mońj dane emakawạdińa. Ńit khon ińren jãwãe doe manotińạ, ente ińakʼ kukhire uniren turui goṭen gidrạń janam akatʼkoa.” Noa menkate uni do gidrạwakʼ ńutum do Sebulone dohoketʼa (metakʼme “Manot”).

²¹ Ona tayom Learen do armitʼṭen kuṛiye hoyena. Uniyakʼ ńutum do Dinae dohoketʼtaea.

²² Inạ tayom Isor do Rahel secʼe beṅgetʼkeda. Uni do Rahelakʼ koejoṅe ańjomkeda ar bhạrti hoṛmo reakʼ daṛeye emadea.

²³ Onate Rahel doe bhạrti hoṛmoyena ar mitʼṭen koṛa gidrại janamkedea. Unre uniye menkeda, “Isor do ińakʼ henostae ocokʼketʼtińạ.”

²⁴ Ar uni koṛa gidrạwakʼ ńutum do Josephe dohoketʼtaea (Metakʼme “Uni do arhõ jemone emokʼ ”), ente uni doe menleda, “Probhu Isor do jemon ar mitʼṭen gidrại danạń.”

Jakobakʼ beton ṭhik dohokʼkan

²⁵ Rahelakʼ kukhire Josephe janamen khan Jakob do Labane metadea, “Ńitokʼ do bidạ kạliń ben jemon ạlińakʼ disạm ar apnar oṛakʼ teliń ruạṛ calao daṛeakʼ.

²⁶ Ạlińren hopon ar hoponerako ar ạlińren bạhu iạtege abenakʼ liń kạmi akada. Ar ńitokʼ baṛe onko seletʼ calao ocowạliń ben. Ar aben doben baḍaegea abenakʼ cetʼleka liń kạmi akada mente.”

²⁷ Menkhan Laban do uniye metadea, “Ạliń cetanre abenakʼ jãhãn bekusiyakʼ menakʼ khan enḍekhan alo ben calakʼa. Ạliń liń bujhạu daṛeakʼ kana, Probhu Isor do aben iạtege ạliń doe bhor akawatʼlińa.”

²⁸ Uni do arhõe menkeda, “Abenakʼ beton do abenge ṭhik joṅ ben. Ạliń do onage liń em katabena.”

²⁹ Menkhan Jakob doe menkeda, “Abenakʼ cetʼleka liń kạmi akatʼ ar ạlińakʼ tite cetʼleka abenren palko bạḍ akan, ona do abenge ben baḍaea.

³⁰ Ạliń hijukʼ lahare abenren mĩhũ-merom palko nunạkʼ ḍher do bako tahẽkana, menkhan ńitokʼ do ḍherko bạḍ akana. Ar ạliń jãhãrege liń dãṛã akatʼ onḍege Probhu Isor do abene bhor akatʼbena. Menkhan ńitokʼ do ạlińakʼ gharońj reakʼ katha hudis reakʼ okte hoyakan tạlińa.”

³¹ Unre Labane menkeda, “Ạliń do cetʼ liń emabena?” Jakobe menkeda, “Aben do cetʼge emokʼ baṅ hoyokʼtabena. Menkhan eken mitʼṭecʼ katha ben doholekhan enḍekhan ạliń do arhõ abenren palkoliń gupikoa arliń jotonkoa.

³² Ạliń do teheńge abenren mĩhũ-merom palko tala khon huḍiń ar maraṅ kabra chapan merom ar bhiḍiko ar bhiḍi hoponko liń begarkoa. Ar onkoge ạlińren beton lekako hoyokʼa.

³³ Ar tayom daram jãhãtinrege ạlińakʼ beton reakʼ ben hudis unre noko khonge sạbudokʼa, cetʼge bạliń behok akada mente. Huḍiń ar maraṅ kabra chap bạnukʼ nonkan merom se bhiḍi hopon ạlińakʼ palreko ńamlen khan onko do kombṛo akanko menteko hudisokʼa.”

³⁴ Labane menkeda, “Hẽ, bhagegea. Aben okaben hudisetʼ onage hoyokʼma.”

³⁵ Ar Laban do enhilokʼge acʼren mĩhũ-merom palko khon Jakob lạgitʼ lạṭu ar kạṭicʼ kabra chapan merom eṅga, metakʼme okoekoakʼ hoṛmore jaega jaegare ponḍ upʼ tahẽkan onko ar bhiḍikoren hõ hende hende hoponkoe begarketʼkoa. Onko ńel todarotko reakʼ bhar do acʼren hoponkoe ematʼkoa.

³⁶ Ona tayom uni do Jakob ṭhen khon pe din reakʼ hor sạṅgińe senena, ar Jakob do Labanren sarecʼ palko ńel todarotkoe ehopʼena.

³⁷ Tayomte Jakob do pea eṭakʼ eṭakʼ dare reakʼ berel ḍạre hataokeda ar ona ḍạr reakʼ chal jaega jaegareye chaḍaokeda. Onate ona do ponḍge ńelena.

³⁸ Ar Palren mĩhũ-meromko tinre dakʼ ńũko hijukʼa unre uni do ona ḍạrko dakʼ reakʼ gamlareye topokakʼkan tahẽkana. Ar nonḍe dakʼ ńũ lạgitʼko jarwakʼkan tahẽkanre onko doko (otoṅokʼ) milạukʼkan tahẽkana.

³⁹ Nonkate ona ḍạrko samaṅreko milạukʼkan tahẽkante onkoren okoeko hoponko janamokʼkan tahẽkan onko do lạṭu lạṭu ar kạṭicʼ kạṭicʼ kabra kabra chapanko hoyokʼkan tahẽkana.

⁴⁰ Jakob do merom hopon ar bhiḍi hoponkoe begaretʼko tahẽkana, ar merom pạṭhi ar bhiḍi pạṭhiko do Labanren kabra ar hende merom ar hende bhiḍi palko talareye dohoyetʼko tahẽkana. Nonkate uni do acʼ lạgitʼ judạ mitʼṭen mĩhũ-meromkoakʼ pale tearkeda ar onko palrenko do Labanren palko sãote bae mesao ocowatʼkoa.

⁴¹ Ona chaḍa ḍher daṛean bhiḍi-meromkoko midokʼre uni do dakʼ reakʼ gamlare onko samaṅre ona ḍạrkoe topo dohokakʼkan tahẽkana jemon ona ḍạr samaṅre onkoko midokʼ (otoṅokʼ).

⁴² Menkhan nijor bhiḍi ar meromko samaṅre ona ḍạrko do bae dohoyetʼ tahẽkana. Onate Labanren bhiḍi-meromko do nijorkoge ar Jakobren do daṛe daṛeko hoyena.

⁴³ Ar Jakob do nonkate ạḍiye kisạ̃ṛena. Uniren mĩhũ-merom, ũṭ, gadha ar guti kạ̃ṛmĩko hõ ḍherko saṅge idiyena.