Genesis 3 - সান্তালী বাইবেল

Manwawakʼ bebatao

¹ “Probhu Isorre benaoketʼko otren jiwiyanko modre biń do sanamko khon cạture tahẽkana. Mitʼ din biń do uni maejiue kulikedea, “Isor do cetʼ sạrige bagwanre menakʼ joto dareko reakʼ jo jom doe mana akatʼbena?”

² Maejiue roṛ ruạṛkeda, “Bagwan reakʼ jo doliń jom daṛeakʼgea.

³ Menkhan tala bagwanre oka dare menakʼ ona reakʼ jo jojom do managetalińạ. Isor doe menakada, ‘ona dare reakʼ jo do joṭetʼ hõ alo ben joṭeda, ar jom hõ aloben joma. Ar ben onkale khan khạṭige ben gujukʼa.’ ”

⁴ Unre biń do maejiue metadea, “Tis hõ baṅa, aben do baben gujukʼa.

⁵ Isor doe baḍaea, oka hilokʼ ona dare reakʼ jo ben joma enhilokʼ abenakʼ mẽtʼ do saṛokʼ tabena. Ar onate aben do ạkil ben ńama ar Isor leka ben hoyokʼa.”

⁶ Maejiu do ona dare reakʼ jo mońj ar sebelgeye ńelkeda, ona chaḍa ạkil ńam lạgitʼ laloc hõ hecʼadea, onate uni do dare reakʼ joe gotʼkeda are jomkeda. Ar acʼren jãwãe hõe emadea ar uni hõe jomkeda.

⁷ Onate bana hoṛakʼ mẽtʼ do saṛentạkina. Ar uluṅgea kin mente kin bujhạukeda. Ar loa dare reakʼ sakamko rokʼkate ạkin lạgitʼ kicricʼkin benaoana.

⁸ Ado ạyupʼ reakʼ reaṛ hoeye ehopʼ akatʼ tahẽkanre unkin do Probhu Isorakʼ aṛaṅkin ańjomketʼtaea. Ente bagwanre uni doe dãṛãbaṛae kan tahẽkana. Unre Adam ar uniren bạhu do Probhu Isor samaṅre alo paṛaokʼ lạgitʼ bagwan reakʼ dareko talarekin okoyena.

⁹ Probhu Isor do Adam hohoadeteye metadea, “Okare menama?”

¹⁰ Uni do goṅketʼteye menkeda, “Bagwanre amakʼ aṛaṅiń ańjom akatʼgea. Menkhan uluṅge minạńte, botorteń oko akana.”

¹¹ Unre Probhu Isore menkeda, “Amem uluṅge ona do okoeye lạiyakatʼmea? Am do cetʼ oneń manaletʼme dare reakʼ joyem jom akada?”

¹² Adame menkeda, “Ińren gate lekate okoe maejiuem em akawạdiń unige ona dare reakʼ joye emadińa ariń jomkeda.”

¹³ Unre Probhu Isor do uni maejiue metadea, “Noa do cetʼem ceka akada?” Maejiu do roṛ ruạṛketʼteye menkeda, “Biń do ińe bulạukedińa ar onate iń do onań jomkeda.”

Isor sạjạiye emokʼkan.

¹⁴ Unre Probhu Isor do uni bińe metadea, “Noam kạmiketʼte am do otren sanam ạsul janwar ar bir janwarko modre ḍher sarapanicʼem hoyena. Am do jion bhor lacʼtem taṛama ar dhuṛim joma.

¹⁵ Iń do am ar maejiu talare ar amren bõsko ar maejiuko hotete hijukʼkan bõsko talare bạiriń janam ocoya. Ona bõsren mitʼ hoṛ do amakʼ bohokʼe gejer tama ar am do uniyakʼ iḍim sogagtaea.”

¹⁶ Ona tayom uni maejiue metadea, “Bhạrti hoṛmom tahenre amakʼ kosṭo do arhõń ḍher ocoytama. Am do bedonte gidrạm janamea. Ar jãwãe lạgitʼem jaljalaokʼa, ar uni do am cetanre mạlike hoyokʼa.”

¹⁷ Ona tayom uni do Adame metadea, “Okaṭakʼ dare reakʼ jo jojomiń manaletʼme amren bạhuakʼ kathate onam jom akatʼte am iạte ot hõ ot sarapanakʼ hoyena. Am do goṭa jiongem khaṭaokʼa ar hasa reakʼ phosolem joma.

¹⁸ Am iạte hasare rạṅgạiniko ar jạnumko janamokʼa, menkhan amakʼ jomakʼ do jumi reakʼ phosolge hoyokʼa.

¹⁹ Ar okaṭakʼ hasatem benao ocoakan ona hasate ạurim ruạṛ calakʼ hạbicʼ bohokʼ reakʼ balbal dakʼ do jaṅgare ńurokʼtama arem joma. Amakʼ noa dhuṛi reakʼ hoṛmo do dhuṛitege ruạṛ calakʼtama.”

²⁰ Adam do acʼren bạhuakʼ ńutum Hawae, dohoketʼtaea (mane do “Jiwetʼicʼ ”), ente uni do sanam jiwetʼ hoṛkoren gogoe hoyokʼa.

²¹ Probhu Isor do Adam ar uniren bạhu lạgitʼ janwarakʼ harta reakʼ kicricʼe benaoketʼte unkine horokʼatʼkinạ.

Adam ar Hawa Eden bagwan khonkin oḍok ocokʼkan

²² Ona tayom Probhu Isore menkeda, “Ńelpe, boge bạṛicʼ dare reakʼ jo jomkate manwa do aboren mitʼṭen lekae hoyakana. Ńitokʼ manwa do jaejug tahen lạgitʼ jion dare reakʼ jo tiyokʼkate aloe jom daṛeakʼ onate jãhãnakʼ cekae jạruṛtabona.”

²³ Noa menkate Probhu Isor do hasate bekʼnaoicʼ manwa do ot cas lạgitʼ Eden bagwan khone oḍokgotʼkedea.

²⁴ Nonkate uni do unkine laga ńirketʼkinạ. Ona tayom uni do jion dare ṭhen calakʼ reakʼ horre horhoe lạgitʼ Eden bagwan purub secʼre Kerubkine dohoketʼkinạ, ar ona sãote onḍe mitʼṭecʼ jolokʼkan tarwaṛe hõe dohokeda ar ona do ạcur baṛaekan tahẽkana.