Genesis 29 - সান্তালী বাইবেল

Labanakʼ oṛakʼre Jakob

¹ Jakob do calakʼ calakʼte purub disạmren hoṛkoakʼ ṭoṭhateye seṭerena.

² Onḍe uni doe beṅgetʼ ạcurketʼ khan mitʼṭecʼ kuńe ńel ńamkeda. Unre ona kuń aṛere pe pal bhiḍi meromko aḍa akan tahẽkana. Gupiko do onḍe khonge akoren palko dakʼko ńũakokan tahẽkana. Ar kuń mocare do maraṅ okocʼ mitʼṭecʼ dhiri doho akan tahẽkana.

³ Gukʼpiko do tinre sanam bhiḍi palko jarwayetʼko tahẽkana unre kuń reakʼ moca khon dhiri ocokʼkate onko do bhiḍiko dakʼko ńũ akokan tahẽkana. Ar ona tayom do arhõ dhiriteko esetʼkakʼ kan tahẽkana.

⁴ Jakob do gupikoe kuliketʼkoa, “E boehako, ape do okaren hoṛ kanape?” Onkoko menkeda, “Haran nagraharen hoṛ kanale.”

⁵ Jakob do onkoe kuliketʼkoa, “Ape do cetʼ Nahorren goṛomtetʼ koṛa Labanpe oromakadea?” Onkoko menkeda, “Hẽ, orom akadegeale.”

⁶ Jakob do onkoe kuliketʼkoa, “Uni do cetʼ besge menaea?” Metadeako, “Hẽ, uni doe besgea. Uniren kuṛi Rahel do bhiḍi palkowante nonḍeye hijukʼkana.”

⁷ Jakobe menkeda, “Ńelpe, siń cando hạsurokʼ do ńit hõ dirigea. Sanam janwarko mitʼ ṭhen jarwako reakʼ okte hõ baṅ hoyakana. Ape do aperen bhiḍiko dakʼ ńũ akote arhõ ạtiń idikope.”

⁸ Menkhan onkoko menkeda, “Baṅ, ale lạgitʼ ona do baṅ hoedaṛeakʼa. Joto janwar mitʼ ṭhenko jarwalen khan kuń khon dhirile ocoga, ar unre ale do bhiḍiko dakʼle ńũ ocoakoa.”

⁹ Jakob do unhõ onko sãoteye galmaraokan tahẽkana unre Rahel do acʼ apatren bhiḍikoe ạguketʼkoa, ente uni do onkoe gupiyetʼko tahẽkana.

¹⁰ Jakob do acʼ mama Labanren hoponera ar uniren bhiḍi palko ńelte kuń ṭhene sorena ar kuń khon dhiri ocokʼkate bhiḍiko dakʼe ńũwatʼkoa.

¹¹ Ona tayom do Rahele cokʼadete ãṭ aṛaṅte rarakʼe ehopʼena.

¹² Uni do Rahele metadea, acʼ do apattetʼren peṛa, Rebekaren hopon kanae. Noa katha ańjomkate Rahel doe ńir senente acʼren apattetʼ ona khobore lạiyadea.

¹³ Laban do acʼ misratren hopon Jakobakʼ hijukʼ reakʼ khobore ńamketʼ khan ńir oḍokente uni sãote ńapamokʼe calaoena. Ar hạṛupʼkedeteye cokʼ adea ar acʼakʼ oṛakʼteye ạgukedea. Unre Jakob do acʼakʼ joto katha Labane lạiyadea.

¹⁴ Laban do uniye metadea, “Aleakʼ hoṛmore hõ inạ mãyãmge menakʼa.” Ona tayom Jakob do Labanakʼ oṛakʼre mitʼ candoe tahẽyena.

Lea ar Rahel lạgitʼ Jakobakʼ khaṭao

¹⁵ Mitʼ din Labane menkeda, “Bhạgnạńkantem cetʼ begor beton tem khaṭaokʼa? Lạiạńme cetʼ iń emama.”

¹⁶ Labanren do barea hoponerakin tahẽkana. Maraṅicʼakʼ ńutum do Lea ar huḍińicʼakʼ ńutum do Rahel.

¹⁷ Lea do eken mẽtʼ motoge ńelokʼte mońj tahẽkantaea, menkhan Rahel do rupte cehrate jotoge ạḍi napaye tahẽkana.

¹⁸ Jakob do Rahele dulạṛedekan tahẽkanteye menkeda, “Amren huḍińicʼ kuṛi Rahel lạgitʼ eae bochor gutiń khaṭaokʼa.”

¹⁹ Labane menkeda, “Rahel eṭakʼ jãhãe hoṛ ṭheniń goṅae khon amakʼ tire emokʼge bhagekʼ hoyokʼtińa. Am do iń ṭhenge tahenme.”

²⁰ Niạ tayom Jakob do Rahel lạgitʼ eae bochore kạmikeda. Jakob do Rahele dulạṛede tahẽkante unạkʼ bochor hõ thoṛa din lekae bujhạukeda.

²¹ Ona tayom Jakob do Labane metadea, “Ińakʼ kạmi reakʼ din do purạuena. Okoe lạgitʼ iń kạmiketʼ ńitokʼ uni emaliń ben jemon uni tulucʼ liń giticʼmitʼ daṛeakʼ.”

²² Unre Laban do ona ṭhạ̃iren sanam hoṛkoe hohoatʼkote mitʼṭecʼe bhojkeda.

²³ Ado ńindạyen khan acʼren kuṛi Lea do Jakob ṭhene kolkedea, ar Jakob hõ uni sãoteye tahẽyena.

²⁴ Laban do acʼren kạ̃ṛmĩ Silpạ hõ Learen kạ̃ṛmĩ lekateye emadea.

²⁵ Ado setakʼen khan Jakob do hahaṛakʼ tulucʼe ńelkedea uni doe Lea kana. Onate uni do Labane metadea, “Aben do ạliń tulucʼ cedakʼ nonka doben beoharkeda? Nunạkʼ din do cetʼ Rahel lạgitʼ bạliń khaṭao akana? Enḍekhan cedakʼben eṛe ketʼlińa?”

²⁶ Labane menkeda, “Maraṅicʼ tahen tulucʼ huḍińicʼ bapla maṛaṅe do aleakʼ niạmre bạnukʼa.

²⁷ Noate niạ bapla hapta parom ocoakʼ ben. Ona tayom do eṭakʼicʼ hoponera liń emabena. Menkhan uni lạgitʼ aben do arhõ eae bochor khaṭaokʼ hoyokʼtabena.”

²⁸ Jakob do uniyakʼ kathae manaoketʼte ona bapla haptae purạukeda. Ar ona tayom Laban do acʼren hoponera Rahel hõ Jakob sãoteye baplakadea,

²⁹ ar acʼren kạ̃ṛmĩ Bilhạ do Rahele emadea.

³⁰ Jakob do Rahel ṭhen hõe boloyena. Menkhan uni do Lea khon Rahelge bạ̃ṛtiye dulạṛede tahẽkana. Ona tayom uni do arhõ eae bochor Laban tabereye tahẽyena.

Jakobren hoponko

³¹ Probhu Isor do Lea khijlạu ocokʼkane ńelkede khan uni do bhạrti hoṛmo reakʼ daṛeye emadea, menkhan Rahel do bạńjhigeye tahẽyena.

³² Lea doe bhạrti hoṛmoyena ar mitʼṭen koṛa gidrại janamkedea. Ar uni gidrạwakʼ ńutum do Rubene dohoketʼtaea (metakʼme “Hạni ńeleme, mitʼṭen hopon”), Ente uniye menleda, “Probhu Isor do ińakʼ duke ńelketʼtińạ, ar ńitokʼ do khạṭige ińren jãwãe doe dulạṛińạ.”

³³ Noa tayom Lea do arhõe bhạrti hoṛmoyena armitʼṭen koṛa gidrại janamkedea. Ar uni gidrạwakʼ ńutum do Simeone dohoketʼtaea (metakʼme “Ańjom”), ente uniye menkeda, “Ińe hirkhạwạń reakʼ katha Probhu Isor doe ańjomakada, ar onate uni do armitʼṭen hopone emadińạ.”

³⁴ Ona tayom uni do arhõe bhạrti hoṛmoyena ar uni do armitʼṭen hopone janamkedea. Uni doe menkeda, “Niạ dhao ińren jãwãe do iń sãoteye midokʼa, ente iń do uniren pea gidrạń janam akatʼkoa.” Ar noa menkate gidrạwakʼ ńutum do Lewiye dohoketʼtaea (metakʼme “Jopoṛao”).

³⁵ Tayomte uni do arhõe bhạrti hoṛmoyena ar uniren do armitʼṭen hopone hoyentaea. Uniye menkeda, “Niạ dhao do Probhu Isoriń sarhaoea.” Onate uni do gidrạwakʼ ńutum Jihudại dohoketʼtaea (metakʼme “Sarhaoicʼ ”). Ona tayom thoṛa okte lạgitʼ uni do hoborjoṅe thirena.