Genesis 28 - সান্তালী বাইবেল

Jakob lạgitʼ Isahakakʼ hukum

¹ Rebekawakʼ katha ańjomkate Isahak do Jakob hohoadeteye bhoradea ar noa hukume emadea, “Kanan disạmren okoeṭakʼ kuṛige alom baplakoa.

² Am do Padan Aram disạmre am gogoren baba Bethuelakʼ oṛakʼte calakʼme. Ar onḍe tahẽkate am mamaren jãhãeṭakʼ kuṛige baplayem.

³ Sanam daṛean Isor do ame bhoramma ar aema hoponren apat hoyokʼ reakʼ daṛeye danama. Uni do am bõsren hoṛkoe saṅge ocokoa. Onko do aema jạtrenko hoyokʼa.

⁴ Okaṭakʼ ạsirbad Abrahame emade tahẽkan ona ạsirbadge uni do am ar am bõsren hoṛkoe emakoa. Ar okaṭakʼ disạm Abrahame emade tahẽkan, ar onḍe ńitokʼ porjạtrenko leka menakʼme, ona disạm hõ amakʼ ạidạrire hijukʼa.”

⁵ Noa menkate Isahak do Jakobe kolkadea, ar Jakob hõ Padan-Aramre Bethuelren hopon Laban ṭhene calaoena. Laban do Jakob ar Esauren eṅgattetʼ Rebekaren boehae tahẽkana.

⁶ Esaue ańjomkeda, Isahak do Jakobe bhoradea ar Padam-Aramreye kolkadea jemon uni do onḍe jãhãe kuṛiye baplaye. Arhõe ańjomkeda, bhor ńam tayom Jakob do Kananren kuṛiko hõ alo baplako reakʼe hukum ocoakana.

⁷ Ar Jakob do acʼ go-babawakʼ katha leka Padam-Aramteye calaoena.

⁸ Nonkate Esaue bujhạukeda, acʼ baba Isahak do Kananren maejiuko cetanre bae kusiya.

⁹ Onate Esao do barea bạhukin tahẽkanre hõ Abrahamren hopon Ismaelakʼ oṛakʼte senkate uniren hoponera Mahalate baplakedea. Mahalat do Nebaotren miserae tahẽkana.

Jakobakʼ kukmũ

¹⁰ Jakob do Ber-seba bạgikate Haran nagraha secʼe mohnḍayena.

¹¹ Horre mitʼ jaegare candoe hạsuren khan uni do onḍegeye aṅga hạṭińena. Onḍe do thoṛagan dhiri hõ tahẽkana. Jakob do onako dhiri reakʼ mitʼṭecʼre bohokʼ aṭhṛekateye giticʼena.

¹² Uni do mitʼṭecʼ kukmũye ńelkeda ot khon mitʼṭecʼ siṛhi dohoakana ar ona reakʼ mucạtʼ do serma hạbicʼ rakapʼ akana. Ar Isorren goḍet do acʼ ṭhen pheḍ hijukʼ ar rakapʼ calakʼkane ńelletʼkoa,

¹³ ar Probhu Isor do ona coṭre teṅgokateye menkeda, “Iń kangeạń Probhu Isor do. Am okarem giticʼ akan noa disạm do am ar amren bõskoń emakoa.

¹⁴ Amren bõsko do dhạrtiren gitil lekako saṅgekʼa. Onko do purub-pạchim ar utạr-dạkhin secʼko pasnao idikʼa. Ar dhạrtiren sanam jạtrenko do am ar amren bõsko hotete bhorko ńama.

¹⁵ Iń do am sãotege minạńa; ar jãhãtegem calakʼ iń do amiń rukhiyạmea. Noa disạmtege arhõń ruạṛ ạgumea. Ar okań galmarao akatʼme ona ạuriń purạu hạbicʼ iń do bạń bạgi giḍimea.”

¹⁶ Ar Jakob do jạpitʼ khon beretʼkateye menkeda, “Probhu Isor do khạṭige noa jaegare menaea menkhan iń do bạń bujhạu daṛeadea.”

¹⁷ Ar noa katha hudiskate uni do monre botor hecʼadea. Uniye menkeda, “Noa do ạḍi botoranakʼ jaegakana! Noa do Isorakʼ tahen ṭhạ̃i chaḍa ar cetʼge baṅkana; serma reakʼ duạr do nonḍe kangea.”

¹⁸ Jakob do ạḍi setakʼreye beretʼena ar oka dhirireye bohokʼ akatʼ tahẽkan ona do cinhạ khunṭi lekae teṅgoketʼte ona cetanre sunume dulada.

¹⁹ Ar ona jaega reakʼ ńutum do Bethele dohokeda (metakʼme, “Isorakʼ oṛakʼ ”). Noa jaega sor reakʼ nagraha do Lus ńutum tahẽkana.

²⁰ Noa tayom Jakob do kiriạkateye menkeda, “Ińakʼ noa daṛan horre ińe rukhiyạyiń, ar ińakʼ horokʼ lạgitʼ kicricʼe imạń,

²¹ ar iń babawakʼ oṛakʼte napaeteń ruạṛ daṛeakʼ, enḍekhan nui Probhu Isorge ińren Isor menteń manaoea.

²² Ar noa dhiri oka do cinhạ khunṭi lekań teṅgoketʼ nonḍege Isorakʼ oṛakʼ do hoyokʼa. E Isor, jãhãnakʼgem imạń ona reakʼ gel hĩs reakʼ mitʼ hĩs do amiń emama.”