Genesis 27 - সান্তালী বাইবেল

Isahak do Jakobe bhoraekan

¹ Haṛam umerre Isahak do mẽtʼ reakʼ ńeńel daṛe nunạkʼ kom idiyentaea, uni do ar bae ńeńelkan tahẽkana. Uni do mitʼ din acʼren maraṅicʼ hopon Esau hohoadeteye metadea, “E beṭa.” Esaue roṛ ruạṛkeda, “Hẽ baba.”

² Isahake menkeda, “Ńelme, iń doń haṛamena; ar tisiń gujukʼa ona do bạń baḍaea.

³ Onate am do, amakʼ akʼ-sarante sendra calakʼme ar iń lạgitʼ sendra jel ạguiyme.

⁴ Ar ona tayom do ińiń kusiyakʼ leka sebel jomakʼ tearme ar ạguạńme, jemon gujukʼ lahare ona jomkateń bhor oṭowam.”

⁵ Isahak do acʼren dulạṛiạ hopon Esau sãote tinre kathae roroṛkan tahẽkana unre Rebeka do onae ańjom tiyokʼkeda. Ar Esau sendrae calao akan tahẽkanre,

⁶ Rebeka do acʼren dulạṛiạ hopon Jakobe metadea, “Ńelme, ańjomkedạń, am baba do amren dadame men akawadea,

⁷ ‘sendra jel ạgukate mońjte jemone isin aroeate onae jom daṛeakʼ. Ar ona jomkate ạuriye gujukʼre Probhu Isor samaṅreye bhor oṭoae.’

⁸ Onate beṭa, ńitokʼ okaṭakʼ iń metam ona leka kạmime.

⁹ Am do ńitge bhiḍi meromkoakʼ palte calakʼme ar moṭa soṭa barea merom hopon ạguwạńme. Iń do unkinte am babae kusikʼ leka jomakʼiń teara.

¹⁰ Ar am baba ṭhen onam idiya ar ona jomkate uni do gujukʼ lahareye bhorama.”

¹¹ Unre Jakob do eṅgattetʼe metadea, “Menkhan iń dada Esau ma goṭa hoṛmore hodo hodo upʼ menakʼtae, ar ińakʼ ma bạnukʼtiń.

¹² Iń baba do tinre tite hoṛmoreye capoyińạ ar unreye hudisa uni doń ṭhoka akadea. Unre uni do bhor bodolteye sarapạńa.”

¹³ Menkhan acʼren eṅgat do uniye metadea, “E beṭa, amakʼ ona sarap do ińre paṛaokʼma. Am do eken ińakʼ katha ańjomme ar senkate barea merom hopon ạguwạńme.”

¹⁴ Jakob do senkate merom hopone ạguketʼkinte acʼ gogoe emadea, ar Rebeka do Jakob acʼ babae kusiyakʼ leka jomakʼe isinkeda.

¹⁵ Ar ona tayom do acʼren maraṅicʼ hoponakʼ mońj utạrakʼ kicricʼ huḍińicʼ hopone horokʼadea; ente kicricʼko do oṛakʼrege tahẽkana.

¹⁶ Uni do Jakobakʼ ti ar hoṭokʼre okakore upʼ baṅ tahẽkan onḍe do merom hoponakʼ hartae paṭheadea.

¹⁷ Ona tayom acʼakʼ tearakʼ ona sebel jomakʼ ar piṭhạ Jakobe caladea.

¹⁸ Ar Jakob do acʼ baba ṭhen senkateye hohokeda, “E ba.” Isahake menkeda, “Am dom okoe kana beṭa?”

¹⁹ Jakob do acʼren apate metadea, “Iń do amren maraṅicʼ hopon Esau kạnạń. Am okam metadiń tahẽkan iń do onań onka akada. Ńitokʼ am do ma beretʼme ar ińakʼ sendra ạguakʼ jel jomme ar bhorạń.”

²⁰ Isahake roṛ ruạṛkeda, “E beṭa, cekate unạkʼ usạra sendra jel dom ńamkeda?” Jakob roṛ ruạṛkeda, “Amren Probhu Isorakʼ ạyurtege.”

²¹ Unre Isahak do Jakobe metadea, “Dela iń ṭhen hijukʼme, jemoniń tunum ạikạume ariń bujhạ daṛeakʼ am do sạrige ińren hopon Esau kanam mente.”

²² Jakob do acʼ baba Isahak ṭhene sen sorena. Ar Isahak do tite tunumkedeteye menkeda, “Aṛaṅ do Jakobakʼ kana menkhan, ti do Esauakʼge.”

²³ Jakobakʼ ti do acʼren boeha Esauakʼ lekage upʼte perecʼ tahẽkante Isahak do bae bujhạu daṛeadea. Ar Isahak do uni bhorae lạgitʼe sapṛaoena.

²⁴ Uni do arhõe kulikedea, “Am do cetʼ sạrige ińren Esau kanam?” Jakobe menkeda, “Hẽ baba.”

²⁵ Isahake menkeda, “Enḍekhan amakʼ sendra jel khon thoṛa ạguạńme, jemon ona jomkateń bhoram.” Unre Jakob do Isahak ṭhen jomakʼe ạgukeda, ar Isahak do ona khone jomkeda. Ona tayom Jakob do darkha rasa hõe emadea ar uni doe ńũkeda.

²⁶ Ar ona tayom Isahake menkeda, “E beṭa, dela hijukʼmeń cokʼamge.”

²⁷ Unre Jakob doe sen sorena are cokʼ ocoyena, ar Isahak do uniyakʼ kicricʼ reakʼ soe ńamketʼte noa menkateye bhoradea: “Nõkʼõe coṅ ińren hoponakʼ so, Probhu Isore bhor akawatʼ jumi reakʼ lekage noa so do.

²⁸ Isor do serma reakʼ sisire emam ma, ar amakʼ jumiye bhorakʼma; Am do ḍher phosol ar nãwã darkha rasam ńama.

²⁹ Eṭakʼ jạtrenko do amko sapʼ sorama, ar sanam hoṛge amko ḍobokʼama. Am gusṭiren hoṛkoren mạlikkem hoyokʼa, onko do amko ḍobokʼama. Okoe amko sarapam onko cetanre hõ sarap paṛaokʼma; ar okoe amko bhoram onko hõ bhor hecʼakoma.”

Bhor ńam lạgitʼ Esauakʼ nehõr

³⁰ Isahak do Jakobe bhoradea. Ar Jakob acʼ baba ṭhen khon ạuriy ocogokʼrege dadattetʼ Esao do jel sendra khon oṛakʼteye ruạṛ hecʼena.

³¹ Ar sebel jomakʼe isinketʼte acʼ baba ṭhen idikateye menkeda, “E ba, ma beredokʼte duṛubokʼme ar amren hopone ạguakatʼ sendra jel jomme ar bhorạńme.”

³² Isahak do uniye kulikedea, “Am dom okoekana?” Esaue menkeda, “Iń do amren maraṅicʼ hopon Esau kạnạń.”

³³ Noa katha ańjomkate Isahak doe thar tharaoena. Uni doe menkeda, “Enḍekhan sendra jel do okoeye ạguạdińa? Iń do am hijukʼ laharege onań jomkeda ar uni hõń bhoradea, ar ona bhor reakʼ jo do unigeye ńama.”

³⁴ Esau do acʼ babawakʼ katha ańjomkate ạḍi ãṭe rakʼkeda. Ar ona tayom do acʼ babae metadea, “E ba, ińhõ bhorạńme.”

³⁵ Isahake menkeda, “Amren bokom do eṛekate amakʼ bhore idiakada.”

³⁶ Esaue menkeda, “Jakob ńutum emae do ṭhikge hoyakana, ente uni do bar dhao ińakʼ jaega khone ocokʼkedińa. Uni do ińakʼ maraṅ hoponakʼ ạidạri hõe hatao akada ar niạ dhao do ińakʼ bhor hõe idikeda.” Esau do arhõe menkeda, “Iń lạgitʼ do cetʼ jãhãn bhor bam dohoakada?”

³⁷ Isahake roṛ ruạṛkeda, “Ńelme, uni do amren mạlik iń hoyoco akadea ar uniyakʼ gusṭiren sanamko do acʼren gutiń hoe ocoakatʼkoa. Iń do uni lạgitʼ phosol ar nãwã darkha rasań bondobos akada. Am lạgitʼ do ńit cetʼ iń cekaea?”

³⁸ Unre Esau do acʼ baba nehõrkateye metadea, “E ba, am ṭhen do cetʼ ona mitʼṭecʼ bhorge tahẽkana? Am do iń hõ bhorạńme.” Noa menkate Esau do ãṭ aṛaṅte rarakʼe dhurạuena.

³⁹ Unre acʼ babae menkeda, “Am okaṭakʼ jumirem girobasokʼ ona do bhage hasa baṅ hoyokʼa; onḍe do serma reakʼ sisir hõ baṅ ńurokʼa.

⁴⁰ Amakʼ tarwaṛegete jiwetʼem tahena, ar am do bokomren gutim hoyokʼa. Menkhan khạtirjoma tinre bam tahẽ daṛeakʼa unre am do amakʼ taren khon uniyakʼ araṛem giḍikakʼa.”

⁴¹ Jakob do acʼ baba ṭhen khon bhore ńamketʼ khan Esau ṭhen hiskạ ocokʼe ehopʼena. Uni do mone monteye menkeda, “Iń baba lạgitʼ rakʼjoṅ din do sor hijukʼ kana. Ar ona tayomge ińren boeha Jakob doń khũnea.”

⁴² Rebeka do acʼren maraṅicʼ hopon Esauakʼ joto kathae ańjomketʼ khan hoṛ kolkate huḍińicʼ hopone hoho ạgu ocokedete uniye metadea, “Ańjomme, amren boeha Esau do ame gocʼmea ar onate acʼakʼ jiwiye raṛejtaea.

^43-44 Onate beṭa, ińakʼ katha ańjomme. Am do Haran nagrahate ińren boeha Laban ṭhen dạṛme ar amren boehawakʼ raṅgao ạuri cabakʼ hạbicʼ onḍege tahenme.

⁴⁵ Thoṛa din tayom tinre raṅgao cabakʼtaea ar uni upạrte cetʼem cekaleda mente onae hiṛińa, unre hoṛ kolkate onḍe khoniń ruạṛ ạgumea. Ente cedakʼ mitʼ dinte bana hoṛiń atʼbena?”

⁴⁶ Tayomte Rebeka do Isahake metadea, “Noko Hitti kuṛiko iạte iń do jiwetʼ tahen baṅ sanań kana. Ar Jakob hõ noa disạmren jãhãe Hitti kuṛiye baplaye enḍekhan ińakʼ jiwetʼ tahen do cetʼ lab?”