Genesis 26 - সান্তালী বাইবেল

Isahak Gora nagrahare

¹ Abrahamakʼ oktere leka niạ dhao hõ disạmre mitʼṭecʼ akal hoyena. Ona iạte Isahak do Gora nagrahate Philisṭikoren raj Abemelek ṭhene calaoena.

² Unre Probhu Isor do Isahak ṭhen ńel ocoyenteye menkeda, “Misorte do alom calakʼa. Ar okaṭakʼ disạm reakʼ kathań lạiyam ona disạmrege tahenme.

³ Ńitokʼ noa disạmre thoṛa din lạgitʼ tahẽ hataṛokʼme. Ar iń do am sãote tahẽkate amiń bhorama. Noako disạm do am ar am bõsren hoṛkoń emakoa. Ona chaḍa iń do amren baba Abraham ṭhen okań kiriạlen ona hõń disạ dohoya.

⁴ Iń do am bõsren hoṛko sermaren ipilko lekań saṅge ocokoa ar noa disạm do onkoń emakoa. Ar amren bõs hotete dhạrtiren sanam jạtrenko do bhorko ńama,

⁵ ente Abraham do ińre tabe akane tahẽkana ar ińakʼ emakʼ sanam hukumko, niạmko ar solhako ańjom are manaoleda.”

⁶ Ona iạte Isahak do Gera nagraharegeye tahẽyena.

⁷ Menkhan onḍenko hoṛ do tinre acʼren bạhu reakʼko kulikedea unre uni do acʼren misera menteye lạiyatʼkoa. Ente acʼren bạhu mente lạiyako doe botorena; uniye hudiskeda cehra iạte onḍenko hoṛ do Rebeka ńame lạgitʼ acʼko gocʼ botejea.

⁸ Isahak do ḍher din onḍeye taheyena. Mitʼdin philisṭikoren raj Abemelek do jalna khon latar secʼe uyuńkeda. Ar ńelkateye hahaṛayena, ente Isahak do acʼren bạhu Rebekae dulạṛede kana.

⁹ Uni do Isahak hohoadeteye metadea, “Ńelme, Rebeka do khạṭige amren bạhu kanae; menkhan cedakʼ am do amren misera mentem lại akadea?” Isahake roṛ ruạṛkeda, “Iń doń hudisetʼ tahẽkana uni iạte hoedaṛeakʼa iń do gujukʼ hoyokʼtińạ.”

¹⁰ Abemeleke menkeda, “Menkhan ale sãote noa do cetʼem beoharkeda? Jãhãe hoṛge coṅ amren bạhu ma giticʼmidokʼ lạgitʼe soṅgeke. Ar nonkate ale dusirem paṛao ocokelea.”

¹¹ Noa tayom Abemelek do sanam hoṛko lạgitʼ mitʼṭecʼ kajak hukume emena, jãhãege Isahak se uniren bạhu cetanre tiye lagao uni do khạṭigeye gocʼ ocokʼa.

¹² Isahak do ona bochorge ona disạmreye cas-abadkeda ar mitʼsae doboṛ phosole ńamkeda. Probhu Isor do uniye bhoradea,

¹³ ar onate uni doe kisạ̃ṛ idiyena. Uni do dinke dine kĩsạ̃ṛ idiyente ḍher sompottiren mạlike hoyena.

¹⁴ Uniren bhiḍiko, ḍaṅgrako ar guti kạ̃ṛmĩko nunạkʼko saṅge idiyena, ona ńelte Philisṭiko hõ hiskạwaeko ehopʼena.

¹⁵ Abraham oktere uniren gutiko okako kuńko laletʼ tahẽkan Plisiṭiko do onare hasa giḍikateko dhapao esetʼletʼ tahẽkana.

¹⁶ Tayomte Abemelek do Isahake metadea, “Am do ale ṭhen khon sen joṅme, ente am do ale khon hõ ḍher daṛeanicʼem hoyakana.”

¹⁷ Onate Isahak do onḍe khone uṭhạuente Gera reakʼ khaṅgoṭ gaḍare ḍerakate girobasokʼe ehopʼena.

¹⁸ Onḍe uniren baba Abraham oktere okako kuńko la letʼ tahẽkan Isahak do arhõ ona kuńkoe la dohṛa ocokeda, ente Abraham gocʼ tayom Philisṭiko do onako dhapaoleda. Ar uniren apat kuńko reakʼ oka ńutume doholetʼ onage uni hõe ńutumkeda.

¹⁹ Isahakren gutiko do ona rohoṛ gaḍare kuń la jokhecʼ nonkan mitʼṭecʼ kuńko ńamkeda one ona reakʼ latar khon dakʼ oḍokokʼkan tahẽkan.

²⁰ Menkhan Geraren gutiko do Isahakren gutiko sãote jhogṛakʼko ehopʼketʼteko menkeda, “Noa dakʼ do aleakʼ kana.” Noa jhogṛa iạte Isahak do ona kuń reakʼ ńutum Esoke dohokeda (metakʼme “jhogṛa”).

²¹ Tayomte Isahakren gutiko do ar mitʼṭecʼ kuńko lakeda, menkhan ona iạtehõ onko do jhogṛakʼko ehopʼena. Noa ńelte Isahak do ona reakʼ ńutum Siṭnae dohokeda (metakʼme “Bạiri”).

²² Ona tayom Isahak do onḍe khone ocokʼente ar mitʼṭecʼ kuńe lakeda. Menkhan niạ dhao Philisṭiko do ona iạte ar bako jhogṛalena. Ar Isahak do ona kuń reakʼ ńutum do Rebobothe (metakʼme “Ḍher jaega”) dohokeda. Uni doe menkeda, “Sesre Probhu Isorge ale doe jaegawatʼlea jemon nonḍegele saṅge idikʼ.”

²³ Tayomte Isahak do onḍe khone oḍokente Ber-sebateye calaoena.

²⁴ Ar Probhu Isor do enhilokʼge uni ṭhen ńel ocoyenteye menkeda, “Iń do amren baba Abrahamren Isor kạnạń. Alom botorokʼa, ente iń do am sãote minạńa. Ińren guti Abraham lạgitʼge amiń bhorama ar amakʼ bõskoń saṅge ocoytama.”

²⁵ Unre Isahak do onḍe mitʼṭecʼ pinḍe benaokeda ar Probhu Isore sewawadea. Onḍege uni doe ḍerayena ar acʼren gutiko mitʼṭecʼ kuńko lakeda.

Abemelek sãote Isạhakakʼ bondobos

²⁶ Noa tayom Abemelek do acʼren muntri Ahusat ar maraṅ subedar Pikol soṅgekate Gera khon Isahak ṭhene hecʼena.

²⁷ Khan Isahak do onkoe metatʼkoa, “Iń ṭhen do cedakʼpe hecʼakana? Ape ma hiskạtege coṅ ape khonpe sạṅgiń akadiń.”

²⁸ Onkoko menkeda, “Ale do ńitokʼ saphatele ńeleda Probhu Isor do am tulucʼ menaea. Ar onatele ṭhik dohoakada am ar ale talare mitʼṭecʼ cukti tahen do jạruṛgea. Onate dela, noa bon kiriạlenge,

²⁹ jemon amakʼ jãhãnakʼ ale hõ bale loksantam bickom sulukte cetʼlekale bidạ akatʼme onkage amhõ aleakʼ jãhãnakʼ alom loksantalea. Ńitokʼ am do Probhu Isorren bhoranicʼem hoyakana.”

³⁰ Noa tayom Isahak do onko lạgitʼ bhoje sapṛaokeda, arko jom ńũwana.

³¹ Ar dosar hilokʼ setakʼre beretʼkate onko do ako talareko kiriạyena. Ona tayom Isahak do onkoe bidạkatʼkoa ar onko do suluk monteko mohnḍayena.

³² Ar enhilokʼge Isahakren gutiko do hecʼkate akoko la akatʼ mitʼṭecʼ kuń reakʼko baḍae ocokedea, “Ale do dakʼle ńam akada.”

³³ Isahak do ona kuń reakʼ ńutum Sibae dohokeda (metakʼme “Kiriạ”). Ona iạte teheń hõ ona nagraha reakʼ ńutum do Ber-seba tahẽyena.

Esauren Hitti bạhu

³⁴ Esau do pongel bochor umerre Hittiạ Beriren hoponera Judit ar Hittiạ Elonren hoponera Basmạt tekine baplaketʼkinạ.

³⁵ Nukin barea maejiu do Isahak ar Rebekawakʼ jionre baṅ sahaokʼleka kin hoyena.