Genesis 22 - সান্তালী বাইবেল

Isahak do dãṛẽ menteye samaṅede

¹ Noako ghoṭna tayom Isor do Abraham biḍạureye paṛao ocokedea. Isor do uniye hohowadea, “E Abraham.” Abrahame roṛ ruạṛkeda, “Minạńgea.”

² Isore menkeda, “Amren gidrạ, amren uni sadher hopon, okoe do ạḍim dulạṛede uni ar am do Moriạ ṭoṭhate calakʼ ben. Ar onḍe okaṭakʼ buru reakʼ kathań lạiyam onḍe mitʼṭecʼ jeredokʼ samaṅokʼakʼ lekate uni samaṅem.”

³ Onate Abraham do ạḍi setakʼre beretʼkate gadhae palanadea. Ar ona tayom acʼren hopon Isahak ar jeredokʼ samaṅokʼakʼ lạgitʼ sahane hataokeda ar acʼren barea gutiye soṅgeketʼkinte Probhu Isor okaṭakʼ ṭhạ̃i reakʼ kathae metade tahẽkan ona secʼe mohnḍayena.

⁴ Ar tesar hilokʼ Abraham doe beṅgetʼ rakapʼketʼ khan sạṅgińre ona ṭhạ̃iye ńel ńamkeda.

⁵ Unre acʼren gutiye metatʼkinạ, “Gadha ar aben do nonḍege tahẽ hataṛokʼben; ar ińren hopon ar iń do onḍeliń calaolenge. Ar onḍe dewa sewa sạtkate arhõ aben ṭhen liń ruạṛ hijukʼa.”

⁶ Noa menkate Abraham do jeredokʼ samaṅokʼakʼ lạgitʼ sahan bojha do acʼren hopone gokʼadea ar acʼ do seṅgel ar chorae hataokeda. Ar ona tayom do mitʼte taṛamkin ehopʼena.

⁷ Unre Isahak do acʼren apate metadea, “E ba.” Abrahame menkeda, “Hẽ beṭa cetʼem meneda?” Isahake menkeda, “Jeredokʼ samaṅokʼakʼ lạgitʼ sahan ar seṅgel ma menakʼ talaṅge, menkhan alaṅren samaṅokʼ lạgitʼ bheḍa hopon do ukuricʼ ?”

⁸ Abrahame menkeda, “E beṭa, Isorge jeredokʼ samaṅokʼren dãṛẽ lạgitʼ bheḍa hopone jogaṛ alaṅa.” Ar noako katha roṛ roṛte unikin dokin laha idiyena.

⁹ Ar oka jaega reakʼ katha Isor do Abrahame metade tahẽkan onḍekin seṭerena. Onḍe seṭerkate unkin do mitʼṭecʼ pinḍkin benaokeda ar onare sahankin ladekeda. Ar Abraham do Isahakakʼ ti-jaṅgae tolketʼtaete ona pinḍ reakʼ sahan cetanreye dohokedea.

¹⁰ Ona tayom acʼren hopon teṅgene lạgitʼ uni do chora hataokate tiye tulketʼtaea.

¹¹ Unre Probhu Isorren goḍet do serma khon uniye hohoadea, “E Abraham, E Abraham!” Abrahame roṛ ruạṛkeda, “Nõkʼõe minạńgea.”

¹² Goḍete menkeda, “Hoponme teṅgene lạgitʼ ti do alom tul tama se unire cetʼge alom cekaea. Isor botorae hoṛkanem ona do ńitokʼ bujhạuena, ente iń ńutumte amren sadher hopon teṅgene lạgitʼ do bam pạclena.”

¹³ Unre Abraham do beṛhaeteye beṅgetʼ ạcurketʼ khan acʼ tayomre mitʼṭen bheḍa do jhạuạre dereń aṭkao akane ńelkedea. Unre Abraham do uni bheḍae ạgukedea ar acʼren hopon bodolte uniye teṅgenkedea.

¹⁴ Ar ona jaega reakʼ ńutum Yehowa-Yire (metakʼme “Probhu Isorakʼ jogaṛ”) dohokeda. Onate teheń hõ hoṛko mena, “Probhu Isorakʼ burure Probhu Isorgeye jogaṛa.”

^15-16 Probhu Isorren goḍet do serma khon Abraham arhõ hohoadeteye metadea, “Am do amren gidrạ, uni sadher hopon dãṛẽye lạgitʼ bam pạclena. Ona iạte iń Probhu Isor do ińakʼ ńutumte kiriạkateń meneda,

¹⁷ khạṭigeń bhorama, ar sermaren ipilko ar jalapuri reakʼ gitil leka amakʼ bõsrenkoń saṅge ocokoa. Am bõsren hoṛ do akoren bạirikoakʼ nagrahako jitạu joṅa,

¹⁸ Ar amren bõsko hotete dhạrtiren sanam jạtrenko do bhorko ńama. Am do ińakʼ hukumem manao akatʼte onań onkaea.”

¹⁹ Noa tayom Abraham do acʼren gutikin ṭhene ruạṛ hecʼena. Unre jotoko mitʼ dhaote onḍe khon Ber-sebateko ruạṛ hecʼena; ar nonḍege Abraham doe tahenkan tahẽkana.

Nahorren bõsko

²⁰ Noako ghoṭna tayom Abraham doe ańjomkeda, uniren boeha Nahorren bạhu Milkạ do gidrạkoe janam akatʼkoa.

²¹ Nahorren maraṅicʼ hoponakʼ ńutum do Us. Ar ona tayom do Bus ar Kemuelakʼ janam hoyena. Kemuelren hoponakʼ ńutum do Aram tahẽkana.

²² Nahorren eṭakʼ hoponkoakʼ ńutum do Kesed, Hajo, Pildas, Jidlaph ar Bethuel.

²³ Bethuelren hoponera do Rebekae tahẽkana. Abrahamren boeha Nahorren bạhu Milkạwakʼ kukhire noko irạl goṭecʼ hoponko janamlena.

²⁴ Nahorren do mitʼṭen chuṭki erae tahẽkantaea uniyakʼ ńutum do Ruma. Ar uniyakʼ kukhire do Tebah, Gaham, Tahas ar Makat, nokoko janamlena.