Genesis 21 - সান্তালী বাইবেল

Isahakakʼ janam

¹ Probhu Isor do acʼakʼ katha lekage Sarae hirikedea ar uni lạgitʼ okaṭakʼe gokʼakatʼ tahẽkan onae onkakeda.

² Onate Sara doe bhạrti hoṛmoyena. Ar Abrahamakʼ haṛam umerre Sarawakʼ kukhire uniren gidrại janamena. Isor oka okte reakʼ kathae menletʼ ṭhik ona okterege uni gidrạwakʼ janam do hoyena.

³ Abraham do Sarawakʼ kukhiren uni gidrạwakʼ ńutum Isahake dohoketʼtaea.

⁴ Isorakʼ hukum lekage Abraham do irạl dinre acʼren hopon Isahake khatna ocokedea.

⁵ Abrahamakʼ umer tinre mitʼsae bochor tahẽkana unre Isahakakʼ janam do hoyena.

⁶ Sarae menleda, “Isor doe landa ocokedińa, ar ona katha ańjomkate eṭakʼko hõko landaea.”

⁷ Uni do arhõe menkeda, “Sara okoeṭakʼ hopon toae ńũnũae noa katha Abraham do okoe lahareye lại daṛekea? Menkhan uniyakʼ noa haṛam umerrege uniren gidrạ do ińakʼ hoborreye hecʼena.”

Hagar ar Ismael dokin oḍok ocokʼkan

⁸ Isahak doe harayena ar gogowakʼ toa ńũ tise bạgiketʼ enhilokʼge Abraham do mitʼṭecʼe bhojkeda.

⁹ Sarae ńelkeda, Hagarakʼ kukhire Abrahamren okoeṭakʼ gidrại janamlen uni ṭhen Isahak doe nisṛạu ocokʼkana.

¹⁰ Ar onate uni do Abrahame metadea, “kạ̃ṛmĩ era do gidrạ sudhạ oḍok giḍikaeme, ente Isạhak sãote uni gidrạ do sompotti reakʼ ạidạriyicʼ bae hoedaṛeakʼa.”

¹¹ Gidrạ Ismael iạte Abrahamakʼ mon do bạṛicʼentaea.

¹² Menkhan Isor do uniye metadea, “Amren kạ̃ṛmĩ ar uniren gidrạ iạte mon do alom bạṛijtama. Sara okaṭakʼe menakatʼme am do onage onkaeme, ente Isahakren bõskoge amren bõs menteko lekhakʼa.

¹³ Tobe uni kạ̃ṛmĩren gidrạ hotete hõ mitʼṭen maraṅ jạtrenkoń benao rakapʼkoa, ente uni hõe amren hoponkana.”

¹⁴ Unre Abraham do ạḍi setakʼre beretʼkate thoṛa jomakʼ ar dakʼte perecʼ mitʼṭecʼ kum Hagare emadete tarenrey ladeadea. Ar ona tayom gidrạ hõ tireye caladete uniye bidạkadea. Hagar do onḍe khon oḍokʼkate Ber-Seba reakʼ hahaṅkarre ạcur baṛaye ehopʼena.

¹⁵ Kum reakʼ dakʼ cabayen khan uni do mitʼṭecʼ jhạuạ latarre acʼren gidrại giticʼkedea.

¹⁶ Ar ona tayom do mitʼṭecʼ sar tuń sạṅgińre senkateye duṛupʼena. ‘gidrạwakʼ gujukʼ jemon aloń ńel’ mone monte noa menkate onḍeye duṛupʼena ar ãṭ aṛaṅte rarakʼe ehopʼena.

¹⁷ Gidrạwakʼ rakʼ do menkhan Isorakʼ luturre seṭerena. Unre Isorren goḍet do serma khon Hagar hohowadeteye metadea, “E Hagar, amakʼ do cetʼ hoyakana? Alom botorokʼa, ente gidrạ okare menae onḍe khonge uniyakʼ rakʼ do Isorakʼ luturre seṭer akana.

¹⁸ Am do beretʼkate gidrạ heweme, ente uni hotete iń do mitʼṭecʼ maraṅ jạtiń benao rakapʼkoa.”

¹⁹ Ona tayom Isor do Hagarakʼ mẽtʼe saṛ ocoketʼtaea, onate uni do dakʼte perecʼ mitʼṭecʼ ḍạḍiye ńel ńamkeda. Ar ona ḍạḍi ṭhen senkate uni do acʼakʼ kume perecʼketʼte gidrại ńũ ocokedea.

²⁰ Isor do uni gidrạ ńel todarote ehopʼena, ar uni gidrạ doe sẽṛã idiyena. Uni do hahaṅkarreye tahẽyena ar akʼ sar enecʼreye paka idiyena.

²¹ Uni do Paran ńutumanakʼ mitʼṭecʼ hahaṅkar ṭoṭhare girobasokʼe ehopʼena. Ar uniren eṅgattetʼ do Misor disạmren mitʼṭen kuṛi sãoteye baplakadea.

Abraham ar Abimelekakʼ bondobos

²² Ona oktere Abimelek ar acʼren maraṅ senapoti Pikol do Abraham ṭhen hecʼkatekin menkeda, “Am jãhãnakʼgem kạmiyetʼ amakʼ joto kạmirege Isor do am sãote menaea.

²³ Onate am do Isor ńutumte ńit iń ṭhen noa kiriạkʼme, iń ar ińren hoponko sãote se ińren bõsko sãote am do eṛe bam beohara. Cetʼ leka am tulucʼ pạtiạr salakʼ iń beohar akatʼ, ṭhik onkage amhõ iń sãote ar oka disạmre upriạ menam ona disạmren hoṛko sãote pạtiạr salakʼem beohara.”

²⁴ Abrahame menkeda, “Hẽ, iń doń kiriạkʼ kana.”

²⁵ Menkhan uni do mitʼṭecʼ kuń babotre Abimelek ṭhene lạliskeda, uniren gutiko do jorkate acʼ ṭhen khon onako hatao akada.

²⁶ Abimeleke roṛ ruạṛkeda, “Noa okoeye kạmi akatʼ ona do bạń baḍaea. Am do noa lahare bam lại akawạdińa. Iń do teheńgeń ańjomkeda.”

²⁷ Ona tayom Abraham do bhiḍi ar daṅgrakoe ạguketʼkote Abimeleke emadea ar unkin do mitʼṭecʼ kin bandhaokeda.

²⁸ Abraham do acʼakʼ bhiḍi pal khon eae goṭen bhiḍi hopone begarketʼkoa.

²⁹ Noa ńelte Abimelek doe kuliyana, “Noako do cetʼkana? Ar noko eae goṭen bhiḍi hopon begarko reakʼ mane baṅ cetʼkan?”

³⁰ Abrahame menkeda, “Noko do amem hataokoa. Noa kuń ińiń la akatʼ ona reakʼ porman kanako noko do.”

³¹ Onate ona jaega reakʼ ńutum do Ber-seba (metakʼme “Kiriạ reakʼ kuń”), ente nonḍege unkin dokin kiriạlena.

³² Ber-sebare noa bondoboskin bandhaoketʼ tayom Abimelek ar acʼren maraṅ senapoti Pikol do ạkinakʼ disạm, metakʼme Philistikoakʼ disạmtekin ruạṛ calaoena.

³³ Abraham do Ber-Sebare Probhu Isor, metakʼme okoe do etohopʼ ar ses bạnukʼtae uni Isore sewawadea. Ar onḍe do mitʼṭecʼ jhão dareye rohoekeda.

³⁴ Abraham do Philistikoakʼ disạmre ḍher dine tahẽyena.