Genesis 20 - সান্তালী বাইবেল

Abraham ar Abimelek

¹ Tayomte Abraham do Mamre khon Negeb ńutumanakʼ dạkhin hahaṅkar secʼe calao idiyena. Onḍe uni do Kades nagraha ar Sur tala reakʼ mitʼṭecʼ jaegare girobasokʼe ehopʼena. Onḍe khon uni do thoṛa din lạgitʼ Gera nagrahare senkateye tahẽyena.

² Onḍe acʼren bạhu Sara do arhõ acʼren misera menteye lạikedea. Ona iạte onḍenicʼ Abimelek raj do hoṛ kolkate Sara acʼ ṭhene ạgukedea.

³ Menkhan ńindạ jokhecʼ Isor do Abimelek kukmuteye metadea, “Okoe maejiuem ạgu akade, uniren do jãwãe menaetaea. Unim ạgu akadete am do gujukʼ secʼem mohnḍa akana.”

⁴ Abimelek do menkhan unhõ Sara ṭhen do bae boloakan tahẽkana; onate uniye roṛ ruạṛkeda, “E Probhu Isor, bin dusạnre hõ cetʼ mitʼ jạtrenkom maraokoa?

⁵ Uni maejiu ma acʼgeye menakawạdińa, acʼ do uni hoṛren miserat kanae, ar uni hoṛ do acʼren dadattetʼ kanae. Onate iń do sojhe hudiste noań kạmiakada; ona chaḍa ińakʼ colonre jãhãn dosge baṅ tahẽkana.”

⁶ Isor do kukmũ talate uniye metadea, “Hẽ, ińiń baḍaegea sojhe montege noam kạmiakada. Ar ona iạtege uni do bạń joṭetʼ ocoakatʼmea ar iń upạrte kại khoniń aṭkao akatʼmea.

⁷ Ńitokʼ do acʼren jãwãe ṭhen idi ruạṛkaeme. Uni do mitʼṭen nạbi hoṛ kanae. Uni do am lạgitʼe koeya, ar onate amakʼ jiwi do rukhiyạkʼtama. Menkhan jodi uni bam ruạṛkae, enḍekhan disạime, am ar amren hoṛ sanamgeko gujukʼa.”

⁸ Noa iạte Abimelek do ạḍi setakʼre beretʼkate tinạkʼ do acʼ tabere kạmiyạko tahẽkan onko sanamko hoho sorkateye baḍae ocoketʼkoa. Ar noa katha ańjomkate uniren hoṛko hõ ạḍiko botorena.

⁹ Unre Abimelek do Abraham hohoadeteye metadea, “Am do ale tulucʼ noa do cetʼlekam beoharkeda? Iń do am ṭhen cetʼ iń dos akatʼte iń ar ińakʼ rajosṭire nunạkʼ maraṅ kại reakʼ dayirem paṛao akadińạ? Nonka beohar do lek baṅ tahẽkantama.”

¹⁰ Abimelek do uniye kulikedea, “Cetʼ hudiste nonka dom kạmileda?”

¹¹ Abrahame roṛ ruạṛkeda, “Iń doń hudisleda, noa jaegaren hoṛko do Isorre botor bạnukʼtakoa. Onate hoedaṛeakʼa onko do ińren bạhu ńame lạgitʼte ińko gocʼ botejińạ.

¹² Ona chaḍa uni do ińren misera hõ kanae, ente gogoe eṭakʼgere hõ ạliń bana hoṛge ini mitʼ babaren gidrạ kana liń, ar ńitokʼ do ińren bạhu kanae.

¹³ Isor do tinre iń babawakʼ oṛakʼ khone oḍok ạgukedińa unre iń do ińren bạhuń metade tahẽkana, ‘Ińem dulạṛedeń kan ona do nonkatege udugme. Alaṅ do jãhãrege laṅ calakʼ, am do boeha mentem lạiyeńa.’”

¹⁴ Niạ tayom Abimelek do thoṛa bhiḍi, ḍaṅgra ar guti-kạ̃ṛmĩko Abrahame emadea, ar ona sãote uniren bạhu Sara hõe ruạṛkadea.

¹⁵ Ar Abrahame metadea, “Ńelme, ińakʼ goṭa disạmge am samaṅre menakʼa. Jãhãregem kusikʼ onḍege am dom girobas daṛeakʼa.”

¹⁶ Ona tayom uni do Sarae metadea, “Ńelme, iń do amre okań behok akatʼ ona jemon amren hoṛko samaṅre danaṅge tahen onate amren jãwãe do mitʼ hajar rupạń emaekana. Noate sanamko samaṅre sạbudokʼa, am do jãhãnakʼ bam dos akada.”

¹⁷ Noa tayom Abraham do Isor ṭhene koeyana. Onate Isor do Abimelek, ar uniren bạhu ar uniren eṭakʼ maejiukoe bogeketʼkoa. Noate onko do gidrạ janamko reakʼ daṛeko ńam ruạṛkeda.

¹⁸ Abrahamren bạhu Sara iạte Probhu Isor do Abimelekakʼ oṛakʼren sanam maejiukoakʼ kukhiye bondletʼtako tahẽkana.