Genesis 2 - সান্তালী বাইবেল

¹ Isor do ot ar sermare menakʼ sanamakʼe benao sạtkeda.

² Nonkate Isor do eaeakʼ dinte acʼakʼ kạmiye sạtʼkeda; one okaṭakʼe kạmiketʼ; ar eaeakʼ din doe jirạuena acʼakʼ joto kạmiko khon; ar enhilokʼ uni do sirjạu reakʼ cetʼge bae kạmileda.

³ Uni do noa eaeakʼ dine bhorada ar acʼ lạgitʼe begar dohokada, ente enhilokʼ uni do sirjạu reakʼ kạmiye sạtkeda are jirạuena.

^4-5 Sirjạu tayom serma ar ot reakʼ katha: Probhu Isor do tinre maraṅ serma ar ote benaoetʼ tahẽkana unre dhạrtire aṛakʼ sakam, dare, nạ̃ṛĩ, anaj, ar phosolko do baṅ janam akan tahẽkana, ente Probhu Isor do dhạrtire dakʼ reakʼ bae bebosta akatʼ tahẽkana. Ona chaḍa jumire cas lạgitʼ manwa hõ bako tahẽkana.

⁶ Menkhan dakʼ do hasa latar khon bhumbuk rakabokʼ kan tahẽkante hasa do odage tahẽkana.

⁷ Unre Probhu Isor do hasaren mitʼṭen herel manwae benaokedea ar mũreye oṅadete jiwiye aderadea. Onate manwa do jiwiyanicʼe hoyena.

Eden bagwan

⁸ Probhu Isor do purub secʼ Edenre mitʼṭen bagwane benaoleda, ar onḍege acʼren bekʼnaoicʼ manwa doe dohokedea.

⁹ Ar onḍe uni do nonkanakʼ darekoe janam ocokeda one oka do ńelokʼte mońj ar onako reakʼ joko hõ sebelge tahẽkan. Ona chaḍa bagwan talare uni do “Jion dare” ar “Boge bạṛicʼ dare” ńutumanakʼ barea dare hõe janam ocokeda.

¹⁰ Ona bagwanre dakʼ reakʼ jogan emakʼ lạgitʼ mitʼṭen gaḍa tahẽkana one okaṭakʼ do Eden disạm khon oḍokʼ hecʼakan tahẽkan ar ona do ponea gaḍate hạṭiń akan tahẽkana.

¹¹ Pạhil gaḍa reakʼ ńutum do Pison. Noa do Hawila disạm beṛhaete ạtu oḍok hecʼ akan tahẽkana. Onḍe do sona ńamokʼkan tahẽkana,

¹² ona disạm reakʼ sona do ạḍi bhagea. Ona chaḍa onḍe do guggul ar gomedok mạnik hõ ńamokʼkan tahẽkana.

¹³ Dosar gaḍa reakʼ ńutum do Sihon. Noa gaḍa do kus disạm beṛhaete ạtu calao akana.

¹⁴ Tesar gaḍa reakʼ ńutum do Hidekel. Noa do Ạsur disạm purub secʼte ạtu oḍok akana. Ar ponakʼ gaḍa reakʼ ńutum do Phurạt tahẽkana.

¹⁵ Probhu Isor do uni manwae idikedete Eden bagwanreye dohokadea jemon uni do onḍe cas-baskate onae ńel todarot daṛeakʼ.

¹⁶ Ar Probhu Isor do manwa hukumadeteye metadea, “Am do noa bagwan reakʼ jãhãṭakʼ dare reakʼ jogem jom daṛeakʼa;

¹⁷ menkhan boge-baṛicʼ dare reakʼ jo do alom joma, ente oka hilokʼ ona dare reakʼ joyem joma enhilokʼ am do khạṭigem gujukʼa.”

Pạhil maejiu

¹⁸ Ar Probhu Isor doe menkeda, “Manwa eskar tahen do baṅ bhagea. Iń do uni lạgitʼ mitʼṭen lek lekan gateń benaoaea.”

¹⁹ Ar Probhu Isor do hasa khon otren okoe jiwiyanko ar coṭren cẽṛẽkoe benaoletʼko onko sanamko uni manwa ṭhene ạguketʼkoa. Probhu do ńeńele khojkeda, onko do cetʼ menteye hohoakoa mente. Ar uni okoeṭakʼ oka lekae ńutumkede onkage onko jiwiyankoakʼ ńutum do hoyena.

²⁰ Uni do sanam lekan ạsul janwarko ar bir janwarko ar sermaren cẽṛẽkoe ńutumketʼkoa, menkhan onko modre uni herel manwaren, metakʼme Adamren lek lekan gate do bako ńamlena.

²¹ Probhu Isor do Adame jạpitʼ ocokedea, ar onate Adam doe jạpitʼkeda. Ar unre uni khon mitʼṭen pańjrae oḍokketʼte ona jaega doe jel esetʼkada

²² Ar Probhu Isor do Adam khon oneye oḍokketʼ pańjrate mitʼṭen maejiue benaokedete Adam ṭhene idikedea.

²³ Uni ńelte Adame menkeda, “Ńitokʼ do hoyakana. Nuiyakʼ jaṅ ar jel do ińakʼ jaṅ ar jel khonge benao akana. Ar herel hoṛakʼ hoṛmo khone benao akante nui do maejiue ńutum ocoyena.

²⁴ Ona iạte manwa do eṅgat-apat bạgikate acʼren bạhu tulucʼ mitʼ akane tahena ar unkin do mitʼ hoṛmokin hoyokʼa.

²⁵ Unre Adam ar uniren bạhu do uluṅge kin tahenkan tahẽkana, menkhan onate unkin do bạkin lajaokʼkan tahẽkana.