Genesis 18 - সান্তালী বাইবেল

Abraham ar Sara cetanre Isorakʼ bhor

¹ Abraham do tinre Mamre reakʼ sonot dareko ṭhene girobasokʼkan tahẽkana unre mitʼ din Probhu Isor do uni ṭhene ńel ocoyena. Abraham do enhilokʼ tikin jokhecʼ setoṅre acʼakʼ tạmbu reakʼ duạr ṭhene duṛupʼ akan tahẽkana.

^2-3 Ar unreye beṅgetʼ rakapʼketʼ khan, acʼ khon thoṛa sạṅgiń ńokʼre pe hoṛ teṅgo akane ńel ńamketʼkoa. Uni do onko ṭhene ńir senente otre ombakʼkateye joharatʼkoa ar ona tayom doe metatʼkoa, “Ńelpe, jãhãn osubida bạnukʼtape khan dayakate aperen guti khon do alope sahaṛokʼa.

⁴ Iń do dakʼiń ạguyeda, ar ape do jaṅga ạbukokʼpe. Ar ona tayom do noa dare buṭạre mitʼ ghạṛi jirạu hataṛokʼpe.

⁵ Aperen guti ṭhenpe hecʼakana onate ape lạgitʼ thoṛa jomakʼ iń ạgulege, onatepe tirpitokʼa ar ona tayom do arhõpe sen idikʼa.”

⁶ Abraham do tạmbu bhitrite bolokate Sarae metadea, “Ma usạra gel irạl keji holoṅ sipime ar piṭhạ benaome.”

⁷ Ar ona tayom Abraham do ńir senkate pal khon mitʼṭen mońj phẽṭaṛe ạgukedete acʼren gutiye emadea. Ar guti do usạrate uniye isinkedea.

⁸ Abraham do ona isin akatʼ jel sãote toa ar dahe hõe ematʼkoa. Ar tinreko jojomkan tahẽkana unre Abraham do onko sorre dare buṭạreye teṅgo akan tahẽkana.

⁹ Onko do Abrahamko kulikedea, “Amren bạhu Sara do okare menaea?” Uniye menkeda, “Tạmbu bhitrire menaea.”

¹⁰ Unre onko modren mitʼ hoṛe menkeda, “Hijukʼkan bochor niạ okte iń do khạṭige am ṭhen arhoń hijukʼa. Unre amren bạhu Sarawakʼ hoborre mitʼṭen koṛa gidrại tahentaea.”

¹¹ Unre Abraham ar Sara do aema umer hoyakantạkin tahẽkana ar Sara hõ gidrạ hoyokʼ reakʼ umer do caba akantae tahẽkana.

¹² Onate Sara do mone monte landaketʼteye menkeda, “Ińren jãwãe doe haṛam akana ar iń hoń joko cabayena; giticʼmidokʼ reakʼ rạskạ do cetʼ arhõ ruạṛ hecʼạńạ?”

¹³ Unre Probhu Isor do Abrahame metadea, “Sara do buḍhi umerre gidrại hoyokʼtae reakʼ katha ańjomkate cedakʼe landakeda?

¹⁴ Probhu Isor ṭhen bin leṭejokʼakʼ do cetʼge bạnukʼanaṅ. Hijukʼkan bochor niạ okte iń do arhõ am ṭheniń hijukʼa ar unre Sarawakʼ hoborre mitʼṭen koṛa gidrại tahena.”

¹⁵ Unre Sara do botor rakapʼadete landa reakʼ kathae baṅketʼteye menkeda, “Baṅa, iń do bacoṅ landa akatʼ.” Menkhan Probhu Isor doe menkeda, “Ona do sạri katha do baṅkana; am dom landa akatʼgea!”

Sodom lạgitʼ Abrahamakʼ nehõr

¹⁶ Noa tayom onko pe hoṛ do onḍe khonko beretʼena ar Sodom secʼko beṅgetʼkeda. Ar Abraham do onko koyokʼgotʼkako lạgitʼ onko sãote thoṛa sạṅgiń ńokʼe calaoena.

¹⁷ Unre Probhu Isore menkeda, “Okaṭakʼ iń cekae lạgidokʼkan ona do cetʼ Abraham khoniń danaṅkakʼa?

¹⁸ Abraham ar uni bõsren hoṛko khonge coṅ mitʼṭecʼ maraṅ daṛean jạtrenkoń sirjạuko ar onko iạtege coṅ dhạrtiren sanam jạtrenko ma bhorko ńam.

¹⁹ Iń Probhu Isor do noa lạgitʼge uniń bachao akadea jemon acʼren hoponko ar oṛakʼren eṭakʼ sanamko dhorom ar ińakʼ sanaleka calakʼ reakʼ solhae emako. Ar onko do uniyakʼko ańjomtaete onka lekako calakʼ, enḍekhan iń Probhu Isor do Abraham reaṅ okań menakatʼ onageń onkaea.”

²⁰ Ona tayom Probhu Isore menkeda, “Sodom ar Gomora upạrte ạḍi gulmal calakʼkana, ar onkoakʼ kại do ạḍi bạṛicʼgetakoa.

²¹ Ona iạte iń do latarte pheḍkateń ńela, onko okako cekayetʼkan ona do sạriyakʼkana se baṅa. Ar onka baṅkanre hõ iń do onań baḍae daṛeakʼa.”

²² Unre eṭakʼ bar hoṛ do ạcurente Sodom secʼ calakʼkin ehopʼena ar Abraham do Probhu Isor samaṅreye teṅgo tahẽyena.

²³ Ar Abraham do Probhu Isor ṭhen sorenteye menkeda, “Menkhan am do cetʼ bạṛicʼ hoṛko sãote dhorom hoṛko hõm maraokoa?

²⁴ Nagrahare jodi mõṛẽgel dhorom hoṛko tahen enḍekhan onko mõṛẽgel iạte cetʼ goṭa nagraha bam moneyakʼte onam marao giḍikakʼa?

²⁵ Noa do am lạgitʼ baṅ hoedaṛeakʼa. Bạṛicʼ hoṛko sãote dhorom hoṛkom maraoko ona do baṅ hoedaṛeakʼa. Dhạrtiren bikʼcạricʼ do cetʼ hok reakʼ bae bicạra?”

²⁶ Unre Probhu Isor doe menkeda, “Sodom nagrahare mõṛẽgel dhorom hoṛko ńamokʼ enḍekhan, onko iạte nagraha do bạń maraoa.”

²⁷ Abrahame menkeda, “Ńelme, dhuṛi ar torocʼ chaḍa am samaṅre iń do celegeń baṅkana, enhõ iń do dilkate ińren Probhu Isor sãote kathań roṛeda.

²⁸ Mõṛẽgel dhorom hoṛ baṅkate onḍe mõṛẽ hoṛ komko ńamokʼ enḍekhan onko mõṛẽ hoṛ kom iạte goṭa nagraham marao giḍikakʼa?” Uniye menkeda, “Onḍe pongel mõṛẽ hoṛiń ńamko enḍekhan ona do bạń maraoa.”

²⁹ Abraham do arhõe menkeda, “Enḍekhan onḍe eken pongel dhorom hoṛko ńamokʼ?” Uniye menkeda, “Onko pongel hoṛ iạte bạń onkaea.”

³⁰ Abrahame menkeda, “Ińren Probhu Isor do ińakʼ kathate aloe ạṛisokʼma. Onḍe jodi pegel dhorom hoṛko ńamokʼ?” Uniye menkeda, “Pegel dhorom hoṛko ńamlen khan ona do bạń maraoa.”

³¹ Abrahame menkeda, “Dilkate Probhu Isor sãote tinre kathań roṛeda unre arhõń meneda, jodi onḍe bargel hoṛko ńamokʼ?” Uniye menkeda, “Onko bargelko iạte ona do bạń maraoa.”

³² Unre Abrahame menkeda, “Ińren Probhu Isor do alo baṛeye ạṛisokʼma, iń do ar mitʼ dhaoiń meneda, onḍe eken gel hoṛko ńamokʼ?” Uniye menkeda, “Onko gel hoṛko iạte iń do ona nagraha bạń maraoa.”

³³ Abraham sãote katha roṛ mucạtʼkate Probhu Isor do onḍe khone calaoena ar Abraham hõ acʼakʼ oṛakʼteye ruạṛ calaoena.