Genesis 16 - সান্তালী বাইবেল

Hagar ar Ismael

¹ Abramren bạhu Sạri do unrehõ cele gidrạge bako hoyakantae tahẽkana. Hagar ńutuman uniren do mitʼṭen Misiriạ kạ̃ṛmĩye tahẽkantaea.

² Mitʼ din Sạri do Abrame metadea, “Ńelme, Probhu Isor doe bạńjhi ocoakadińạ. Onate am do ińren kạ̃ṛmĩ ṭhen bolokʼme. Hoedaṛeakʼa uni hotete iń do gidrạń ńam daṛeke.” Abram do Sạri reakʼ kathareye rạjiyena.

³ Onate Kanan disạmre Abram do gel bochore khemaoketʼ tayom Sạri do acʼren Misiriạ kạ̃ṛmĩ Hagar sãote Abrame baplakadea.

⁴ Abram do Hagar ṭhene boloyen khan uni doe bhạrti hoṛmoyena. Ar Hagar do tinreye bujhạukeda acʼ doe bhạrti hoṛmo akana unre uni do acʼren kisạ̃ṛren era do nihạ̃teye ehopʼena.

⁵ Onate Sạri do Abrame metadea, “Ińre noa behok lạgitʼ dạyi dom amkangea. Ińren kạ̃ṛmĩ do amakʼ aṭetʼreń kolledea, menkhan uni doe bhạrti hoṛmo akana menteye baḍaeketʼ khan ar bae bạsutạń kana. Enḍekhan alaṅ talare okoeṭakʼ laṅ dusikana ona do ńitokʼ Probhu Isorgeye bicạrma.”

⁶ Abram do Sạriye roṛ ruạṛadea, “Ńelme, amren kạ̃ṛmĩ do amakʼ tirege menaea. Am oka bhagem hudisetʼ onage onkaeme.” Unre Sạri do Hagar cetanre santaoe ehopʼkeda onate Hagar do uni ṭhen khon ńir pharakokʼ hoyentaea.

⁷ Probhu Isorren goḍet do horre hahaṅkar jaegare mitʼṭecʼ dakʼ bhumbukokʼ ṭhen Hagare ńamkedea. Ona dakʼ jharna do Sur ńutuman mitʼṭecʼ jaegate calakʼ horre tahẽkana.

⁸ Serma goḍete menkeda, “Sạriren kạ̃ṛmĩ Hagar, oka khonem hecʼakana ar okatem calakʼkana?” Hagare roṛ ruạṛkeda, “Iń do ińren kisạ̃ṛren bạhu ṭhen khoniń dạṛjoṅkana.”

⁹ Unre Probhu Isorren goḍete menkeda, “Amren kisạ̃ṛ era ṭhen ruạṛ calakʼme ar uni tabere tahenme.”

¹⁰ Uni do arhõe metadea, “Am bõsren hoṛko nonkań saṅgekoa, onko do bako lekha caba daṛeakoa.”

¹¹ Uni do arhõe metadea, “Ńelme, am dom bhạrti hoṛmo akana. Amren do mitʼṭen koṛa gidrại hoyokʼtama. Uni gidrạwakʼ ńutum do Ismaelem dohoytaea (metakʼme, Isore ańjoma), ente amakʼ duk reakʼ rakʼ do Probhu Isore ańjomakada.

¹² Menkhan manwa hoykate hõ uni do bir gadha lekan hoṛe hoyokʼa. Uniren do sanamkoge bạiriko hoyokʼtaea ar eṭakʼko hõ uni do bạiri lekako hudisea. Uni do acʼren boehakoakʼ disạmreye girobasokʼa.”

¹³ Noa katha ańjomkate Hagar do mon monteye menkeda, “Iń do cetʼ sạrige uniń ńelkedea one uniyakʼ mẽtʼãhã samaṅre minạń?” Hagar sãote okoeye roroṛkan tahẽkan, uni Probhu lạgitʼge Hagar do unreye menkeda, “Am dom Isor kana, iń do am samaṅre minạńa.”

¹⁴ Ona iạte Kades ar Bered talare okaṭakʼ kuń menakʼ ona reakʼ ńutum do Ber-lahai-roi kuń hoyena (metakʼme, “Okoeye jiwetʼge ar ińe ńelakadiń uniyakʼ kuń”).

¹⁵ Ar Hagarren do mitʼṭen koṛa gidrại hoyentaea, ar Abram do uniyakʼ ńutum Ismaelle dohoketʼtaea.

¹⁶ Abram irạl gel turui bochor umer tahẽkanre Ismael doe janamena.