Genesis 14 - সান্তালী বাইবেল

Lotakʼ bańcao

¹ Sinạr disạmren Amraphe raj, Elasarren Ariok raj, Elamren Kedarlaomer raj ar Goyimren Tidạl raj-

² Noko ponea rapajko do mitʼkate Sodomren raj Bera, Gomoraren raj Birsạ, Admaren raj Sinạb, Seboyimren raj Semeber ar Belaren, metakʼme, Soarren raj upạrte lạṛhại lạgitʼko oḍok calaoena.

³ Noko mõṛẽ goṭen raj do akoren palṭonko mitʼ ṭhenko jarwaketʼkote Sidim buru lodamteko calaoena. Noa jaega do buluṅ doreão hõko metakʼkan tahẽkana.

⁴ Noa lahare noko rajko do gelbar bochor hạbicʼ Kedarlaomer gobolreko tahẽkana, menkhan gelpe bochorre hecʼkate onko doko hulkeda.

^5-6 Ar ona dosar bochor do Kedarlaomer raj ar uni sãotenko do senkate Rephayimko, Susiko, Emiko, Hamrenko bhagaoketʼkoa. Ar Rephayimko do Asterot Karnạimren, Susiko do Hamren, Emiko do Sawe kiriạthạimren ar Horiko do El- Paran reakʼ Seyir buru ṭoṭhareko bhagaoketʼkoa. El-Paran do hahaṅkar ṭoṭhare tahẽkana.

⁷ Ona tayom noko rajko doko ạcurente En-Mispạt, metakʼme, Kadesteko boloyena. Onko do Amalekikoakʼ goṭa disạmko hatkeda ar Hasason- Tamar nagrahare okoe Amoriko tahẽkan onkoko bhagaoketʼkoa.

^8-9 Noako ghoṭna tayom Sodom, Gomora, Adma, Seboyim ar Bela, metakʼme Soarren rajko do Elamren raj Kedarlaomer, Goyimren raj Tidạl, Sinạrren raj Amraphel ar Elasaren raj Ariok sãote lạṛhại lạgitʼ Sidim tapolre onkoren palṭonko jarwaketʼkoa. Ponea raj upạrte mõṛẽ goṭen raj do lạṛhại lạgitʼko sapṛaoena.

¹⁰ Sidim bilạn ṭạnḍire Alkatrate perecʼ aema ghaḍlakʼko tahẽkana. Tinre Sodom ar Gomorren rajko dạṛetʼ tahẽkana unre onko modren adomko do ona alkatra ghaḍlakʼreko ńurena, ar eṭakʼko do buru secʼko dạṛkeda.

¹¹ Okoe rajko jitạuen onko do Sodom ar Gomora reakʼ sanam dhon durib ar jomakʼko luṭ idikeda.

¹² Abramren bhạcạt koṛa Lot do unre Sodomreye girobasokʼ kan tahẽkana. Onko raj do uniyakʼ dhon durib sudhạ uni hõko sapʼ idikedea.

¹³ Mitʼṭen hoṛ doe dạṛ paskao hecʼente Ibri hoṛ Abram ona khobore lạiyadea. Abram do ona jokhecʼ Amori hoṛ Mamreyakʼ Elon bir ṭhere girobasokʼ kan tahẽkana. Mamre do Eskol ar Anerren boehae tahẽkana. Unkin do Abram sãote gatekʼ reakʼkin bondobos akatʼ tahẽkana.

¹⁴ Abram do tinreye ańjomkeda, acʼren sor peṛa do onko rajko sapʼ idiakadea unre uni do acʼren pesae irạl gel gạkhuṛ lạṛhại gutikoanteye oḍok calaoena ar Dan nagraha hạbicʼ bạirikoe khudạu idiketʼkoa. Noko gutiko do acʼakʼ oṛakʼregeko janamlena.

¹⁵ Uni do acʼren hoṛkoe hạṭińketʼkoa ar ńindạ jokhecʼ bạirikoe ńẽtʼketʼkote onkoe bhagaoketʼkoa. Ona tayom uni do Damesek utạr reakʼ Hoba hạbicʼe laga idiketʼkoa.

¹⁶ Uni do luṭakʼ sanam jiniskoe ruạṛ ạgukeda ar acʼren bhạcạt koṛa ar uniyakʼ dhon duribko hõe ruạṛ ạguketʼtaea. Ona sãote maejiuko ar eṭakʼ sanam hoṛko hõe chaḍao ạguketʼkoa.

Malkisedek do Abrame bhoraekan

¹⁷ Kedarlaomer ar uni sãoten rajko bhagaokate Abram do tinreye ruạṛ hijukʼkan tahẽkana unre Sodomren raj do uni sãote ńapamokʼ lạgitʼ Sawe buru nalare, metakʼme rajakʼ buru nalareye oḍok hecʼena.

¹⁸ Salemren raj Melkisedek do Abram lạgitʼ piṭhạ ar darkha rasae ạgukeda. Uni do maraṅ Isorren naekeye tahẽkana.

¹⁹ Uni do Abram bhoradeteye metadea, “Serma ar ot okoeye sirjạu akatʼ uni maraṅ Isor do Abrame bhoraema.

²⁰ Okoe do amren bạiriko amakʼ tireye jimạketʼko uni maraṅ Isorakʼ sarhao baṛe hoyokʼtae ma.” Unre Abram do acʼakʼ ruạṛ ạguakatʼ jinisko reakʼ gel hĩs khon mitʼ hĩs do Melkisedeke emadea.

²¹ Sodomren raj do Abrame metadea, “Am do dhon durib sanamakʼ dohoyme menkhan eken ińren hoṛko imạńme.”

²² Abram do Sodomren raje metadea, “Serma ar ot okoeye sirjạu akatʼ uni maraṅ Probhu Isorakʼ ńutumte ti tulkań kiriạkʼ kana,

²³ amakʼ jãhãn jinis, metakʼme mitʼṭecʼ sui se panahe reakʼ totolakʼ hõ bạń hataoa. Iń do noań kiriạkʼkana jemon bam mendaṛeakʼ, amakʼ dhonte Abram doe kisạ̃ṛ akana mente.

²⁴ Ińren hoṛko okako jomakatʼ ona chaḍa ar cetʼge bạń hataoa; menkhan Aner, Esko ar Mamre, okoe do iń soṅgeteko calaolen onkoakʼ bhag do hatao ocoakome.