Genesis 11 - সান্তালী বাইবেল

Babel reakʼ usul buruńj

¹ Onako dinre goṭa dhạrtiren manwa do eken mitʼ pạrsitegeko roṛetʼ tahẽkana ar onkoakʼ aṛaṅ hõ mitʼge tahẽkana.

² Onko do purub secʼko laha idiyente Sinor disạmre mitʼṭecʼ bilạn ṭạnḍiko ńamketʼ khan onḍege girobasokʼko ehopʼena.

³ Ar akoreko menjoṅana, “Dela, iṭạ bon benaoa ar seṅgelre bon rapaga.” Onko do dhiri bodolte iṭạ ar cun suṛki bodolte alkatra beoharko ehopʼena.

⁴ Onkoko menkeda, “Dela, abo lạgitʼ mitʼṭecʼ nagraha bon benaoa ar nonkan mitʼṭecʼ usul oṛakʼ bon benaoa one ona reakʼ cuṛạ do serma hạbicʼ rakabokʼ. Ar noa iạte abo do ńutum hoyokʼtabona ar goṭa dhạrtire babon pasnaokʼa.”

⁵ Probhu Isor do manwa oka nagraha ar usul oṛakʼko bekʼnaokan tahẽkan ona ńel lạgitʼe pheḍ hecʼena.

⁶ Uni doe menkeda, “Noko do mitʼ jạtren kanako ar pạrsi hõ mitʼgetakoa; ar onate noa kạmireko lagao akana. Akoakʼ monsubạ purạu lạgitʼ noa tayom noko do jãhãn tạkicʼakʼge bako manaoa.

⁷ Onate dela, latarte bon pheḍokʼa ar onkoakʼ pạrsibon gaḍ baḍaotakoa jemon mitʼ hoṛ armitʼ hoṛakʼ pạrsi aloe bujhạu daṛeakʼ.”

⁸ Ona tayom Probhu Isor do ona jaega khon goṭa dhạrtireye pasnaoketʼkoa. Onate onkoakʼ ona nagraha reakʼ kạmi do bondentakoa.

⁹ Ar onate ona jaega reakʼ ńutum do Babele dohokeda, ente onḍege Probhu Isor do dhạrti reakʼ pạrsiye gaḍbaḍao ocoketʼtakoa. Ar onḍe khonge uni do goṭa dhạrtiye pasnaoketʼkoa.

Shem bõsrenkoakʼ katha

¹⁰ Noa do hoyokʼ kana Shem bõsrenkoakʼ katha. Ḍubạ dakʼ bar bochor tayom Shemakʼ umer mitʼsae bochor tahẽkanre uniren do Arpaksad ńutuman mitʼṭen hopone janamena.

¹¹ Arpaksadakʼ janam tayom Shem do mõṛẽsae bochor jiwetʼe tahẽkana. Ar onako dinre uniren do aema hopon ar hoponerako hoylentaea.

¹² Arpaksadakʼ pegel mõṛẽ bochor umer tahẽkanre uniren hopon Selahae janamena.

¹³ Selahwakʼ janam tayom Arpaksad do ponsae pe bochor jiwetʼe tahẽkana. Onako dinre uniren hõ aema hopon ar hoponerako hoyena.

¹⁴ Selahwakʼ pegel bochor umer tahẽkanre uniren hopon Ebere janamena.

¹⁵ Eber janam tayom Selah do arhõ ponsae pe bochor jiwetʼe tahẽkana. Onako dinre uniren do arhõ hopon ar hoponerako hoyena.

¹⁶ Eberakʼ pegel pon bochor umer tahẽkanre uniren hopon Pelege janamena.

¹⁷ Pelegakʼ janam tayom Eber do ponsae pegel bochor jiwetʼe tahẽkana. Ar onako dinre uniren do arhõ hopon ar hoponerako hoyena.

¹⁸ Pelegakʼ pegel bochor umer tahẽkanre uniren hopon Reuakʼ janam hoyena.

¹⁹ Reuakʼ janam tayom Peleg do barsae are bochor jiwetʼe tahẽkana. Onako dinre uniren do arhõ hopon ar hoponerako hoyena.

²⁰ Reuakʼ pegel bar bochor umer tahẽkanre uniren hopon Seruge janamena.

²¹ Serugakʼ janam tayom Reu do arhõ barsae eae bochor jiwetʼe tahẽkana. Onako dinre uniren do arhõ aema hopon ar hoponerako hoyena.

²² Serugakʼ pegel bochor hoyentae khan uniren hopon Nahore janamena.

²³ Nahorakʼ janam tayom Serug do barsae bochor jiwetʼe tahẽkana. Ar onako dinre uniren do arhõ gidrạko hoyena.

²⁴ Nahorakʼ bargel are bochor umerre uniren hopon Terahe janamena.

²⁵ Terahwakʼ janam tayom Nahor do arhõ mitʼsae gelare bochor jiwetʼe tahẽkana. Onako dinre uniren do arhõ aema hopon ar hoponerako hoyentaea.

²⁶ Terahwakʼ eaegel bochor umer tayom uniren hopon Abram, Nahor, ar Haran tekoko janamena.

Terahren bõsko

²⁷ Noa do hoyokʼ kana Terahren bõskoakʼ katha. Terahren hoponkoakʼ ńutum do tahẽkana Abram, Nahor ar Haran, ar Haranren hoponakʼ ńutum do Lot.

²⁸ Haran do acʼren apat jiwetʼe tahẽkanre acʼakʼ janam ato Kạldikoakʼ disạmre Ur nagrahareye gocʼlena.

²⁹ Abram ar Nahor do bana hoṛgekin bapla akan tahẽkana. Abramren bạhuakʼ ńutum do Sạri ar Nahorren bạhuakʼ ńutum do Milkạ tahẽkana. Milkạ ar Iskạ do Haranren hoponerakin tahẽkana.

³⁰ Sạri do bạńjhigeye tahẽkana; uniren do gidrạge bako hoyakan tahẽkana.

³¹ Abram do, Lot ar Sạri soṅgekate Kanan disạm reakʼ Terahte calakʼ iạte Kạldikoakʼ disạm Ur nagraha khone mohnḍayena. Abram do Terahren hopone tahẽkana, ar Lot do Terahren goṛomtetʼ koṛa, metakʼme, Haranren hopon, ar Sạri do Terahren hopon Abramren bạhui tahẽkana. Pạhilre onko do Haran ńutumanakʼ mitʼṭecʼ nagraha hạbicʼko calaoena ar onḍe girobasokʼko ehopʼena.

³² Terah do barsae mõṛẽ bochor umer tahẽkanre Haran nagraharegeye gocʼena.