Galathiko lạgitʼ Pạul Apostolakʼ ciṭhi 5 - সান্তালী বাইবেল

Mạsire sạdhintetʼ

¹ Mạsi do aboe sạdhinketʼ bona jemon sạdhin bon tahẽdaṛeakʼ. Onate teṅgo keṭecʼ akan tahenpe, jemon okoe hõ golam ar aloko benao daṛeape.

² Ńelpe, iń Pạul do apeń metapekana, apepe khatnakʼkan khan enḍekhan Mạsire jãhãn kuṛại do bạnukʼtapea.

³ Sanamko ṭhen arhõ noa gohań emeda, okoeye khatnakʼkan uni do sanam lekan ạn-ạriko purạu reakʼ dae paṛaoaea.

⁴ Ạn-ạriko pańjaete okoe do Isor ṭhen dhorom ocokʼpe menjoṅkan ape do Mạsi khonpe getʼ begar akana, ar Isorakʼ daya khonpe ocokʼ akana.

⁵ Menkhan dhorom mente bon lekha ocokʼ, ona reakʼ khạṭitetʼ do biswạste sonot Jiu hotete bon ńel horeda;

⁶ ente okoe doko Jisu Mạsiren kan, onko ṭhen khatna ar bin khatna reakʼ do cetʼ porhoge bạnukʼa, bickom oka biswạs do dulạṛ talateye kạmiyetʼkan ona biswạsge asolakʼ kana.

⁷ Ape ma besge coṅpe dạṛetʼ tahẽkan; enḍekhan sạriyakʼre gobolokʼ lạgitʼ do okoeye tạkicʼketʼpea?

⁸ Okaṭakʼpe manao akatʼ, ar okoeye hohoakatʼpe uni Isor ṭhen khon ona do baṅ hecʼakana.

⁹ Kạṭicʼ talaṅ khạmi do sipiyakʼ joto holoṅgeye phulạu ocoya.

¹⁰ Ape reaṅ Probhu Isorre noa pạtiạu menakʼtińạ, ape do okaṭakʼ reakʼ hõ bape eṭakʼ motokʼa. Menkhan okoeye ạulạuetʼpe, uni doe jãhãekange, uni do acʼakʼ kuṛạiye ńamgea.

¹¹ E boehako, ńitokʼ hõ khatnakʼ reakʼ iń porcaretʼ khan, enḍekhan cedakʼ ńitokʼ hõń santao ocokʼkana? Kurus cetanre Mạsiyakʼ gujukʼ reakʼ tạkicʼakʼ ma coṅ maraoen.

¹² Okoe apeko ạulạuetʼpe, onkore ińakʼ khojogokʼakʼ do noage, onko do apnarge jemonko getʼ begarokʼ.

Sonot Jiu ar jel reakʼ sana

¹³ E boehako, sạdhin ocokʼ lạgitʼge Isor doe hohoakatʼpea. Menkhan apeakʼ jel reakʼ kusi sana purạu lạgitʼ noa sạdhintetʼ do alope laṛcaṛa. Ona khon bickom dulạṛte mitʼ hoṛ eṭakʼ hoṛe sapʼ soraema,

¹⁴ ente sanam ạn-ạriko do niạ mitʼ katharege guṭmitʼ akana, “Am aḍepaseren hoṛ apnar leka dulạṛem.”

¹⁵ Menkhan ape apepe jhogṛakʼ arpe hipiskạ kan khan men sontorokʼpe! Arpe nonkae khan ape do apetegepe maraokʼa.

¹⁶ Ińakʼ mone joṅakʼ do noage, ape do sonot Jiu lekate colonpe. Arpe onkale khan jel reakʼ sana do bape purạutapea.

¹⁷ Jel reakʼ sana do sonot Jiu birud ar sonot Jiu reakʼ sana do jel birudgeye khoja. Jel reakʼ sana ar sonot Jiu do ạkin upạrtekin meneda ape okape monejoṅkan ona do alope kạmiya.

¹⁸ Sonot Jiu hotetepe ạyur ocokʼkan khan enḍekhan ạn-tạriren dope baṅkana.

¹⁹ Jel reakʼ kạmiko do pusṭạutege ńel ńamokʼ kana. Ar onako do hoyokʼ kana, laṭghaṭ, bin napae, lucạ lamoṭ,

²⁰ boṅga sewa, gukʼni, bene bạiri, kạphạriạu mẽtʼ jolokʼ, raṅgao, torpha turphi,

²¹ bhinạ bhini, dola duli, hiskạ, ńu bulokʼ, rij roṅ, arhõ onkanakʼko. Iń do cetʼ leka noa lahareń sontorletʼpe ńitokʼ hõ onkageń metapekana, ar nonka kạmikanko do Isorakʼ raj baṅgeko ạidạri joṅa.

²² Menkhan sonot Jiu reakʼ jo do, dulạṛ, rạskạ, suluk, sobori, susṭob, bhạlại, pạtiạr,

²³ mạ̃hir ar sambṛaokʼ. Ar nonkanakʼko upạrte ạn do bạnukʼ anaṅ.

²⁴ Okoe doko Jisu Mạsiren kan, onko do akoakʼ jel reakʼ sanako kurus akatʼtakoa.

²⁵ Abo do sonot Jiu hotete jiwetʼ menakʼ bon khan enḍekhan dela, sonot Jiu leka bon taṛamma.

²⁶ Michạ man ńam baṛako leka do alo bon hoyokʼma, ar alo bon ạṛis ocokoma ar alo bon hipiskạma.