Galathiko lạgitʼ Pạul Apostolakʼ ciṭhi 4 - সান্তালী বাইবেল

¹ Ińakʼ katha reakʼ mane do noage, apatakʼ jotowakʼre hoponakʼ ạidạri menakʼtaere hõ tinạkʼ din gidrại tahen unạkʼ din uni ar golam talare jãhãn begar do bạnukʼa.

² Apattetʼ oka okteye niṭae unhạbicʼ uni do cakʼlaoko ar lonbonko tabere tahen hoyokʼtaea.

³ Onka leka gidrạ bon tahẽkanre abo hõ dhạrti reakʼ ạḍi lekan ạri-cạliren golam bon tahẽkana.

⁴ Menkhan oktetetʼ purạuen khan Isor do acʼren Hopone kolkedea. Uni Hopon do maejiuakʼ kukhireye janamena ar ạn gobolreye harayena.

⁵ Jemon ạn gobolre tahenkan hoṛkoe kiriń chaḍao daṛeako, ar Isorren hoponko menteye ataṅ bon.

⁶ Ape dope hoponko kante Isor do acʼren Hoponren Jiu aboakʼ ontorreye kolkedea. Ar uni Jiu Isor do Abba, metakʼme Baba menteye hohoae kana.

⁷ Onate ar golam dope baṅkana, menkhan hoponko kanape. Ar hoponkope hoyakan khan enḍekhan Isor oka emokʼ lạgitʼe gokʼakawatʼpe onaren ạidạriko kanape.

Galatiko lạgitʼ Pạulakʼ bhabna

⁸ Pạhilre Isor bape baḍae akade tahẽkanre okoepe sewawako kan tahẽkan onko do cele debgeko baṅkana.

⁹ Menkhan ńitokʼ do Isorpe baḍae akadea; ar hẽ, Isorge apeye baḍaeketʼpea. Enḍekhan cekate arhõ dhạrti reakʼ ạḍi lekan nijor ar ạuṛiyakʼ ạri-cạli secʼpe ạcur ruạṛokʼ kana? Ape do cetʼ arhõ onkoren golam hoyokʼpe menjoṅ kana?

¹⁰ Ape do dinko, candoko, ar bochorkope manaoetʼkana.

¹¹ Ape lạgitʼ noageń botorokʼ kana je, iń do ạuṛiyakʼge ape lạgitʼ iń khaṭao akan coṅ cetʼ coṅ.

¹² E boehako, nehõrape kạnạń, iń leka baṛe hoyokʼpe, ente ińhõ ape lekań hoyakana. Ape do ińre jãhãnakʼ bape behok akada.

¹³ Baḍaegeape, hoṛmo reakʼ nijor salakʼ pạhil dhao bhage sombatiń jạhiratʼpe tahẽkana.

¹⁴ Ińakʼ ruạ iạtepe duklenre hõ bape hirkhạwạdiń tahẽkana, bickom Isorren goḍet se Jisu Mạsi cetʼlekape ataṅ akade onkage iń hõpe ataṅ sãohãledińa.

¹⁵ Menkhan ńitokʼ apnarte bhạgankope ńumugokʼ reakʼ do okortape? Ape reaṅ noa gohań em daṛeakʼa je, hoydaṛeakʼ khan ape do unre apeakʼ mẽtʼ sudhạ hoṭor totʼkatepe emkińạ honaṅ.

¹⁶ Ar ńitokʼ do cetʼ sạri katha roṛte aperen bạiriń hoyakana?

¹⁷ Onko eṭakʼ hoṛ do ape lạgitʼko ãṭokʼkana, menkhan bhage monsubạ iạte do baṅ. Onko do iń khon ạcur ruạṛpeko khojkana, jemon onko lạgitʼpe ãṭokʼ.

¹⁸ Tobe bhageakʼ lạgitʼ ãṭokʼ do bogegea. Eken ape talare hạjiriń tahenre do baṅ, menkhan jaoge ãṭokʼ do bogegea.

¹⁹ E ińren gidrạko, Mạsi apere ạuriye muṭhạnokʼ hạbicʼ ape iạte arhõ bedonteń sasetokʼ kana.

²⁰ Ińakʼ monejoṅakʼ do noage, niạ ciṭhi olape bodolte ńitge ape talareń hạjirokʼte ape tulucʼ iń galmaraoa, ente ape reaṅ do bạń bujhạu daṛeakʼ kana cetʼiń cekaea mente.

Hagar ar Sara

²¹ Ape okoe do ạn-tạrire tahen sanayetʼpe, mase lạiyạńpe, ạn-ạri okae menetʼ ona do cetʼ bape ańjom ńameda?

²² Sostorre olakana Abrahamren do barea hoponkin tahẽkantaea, unkin modre mitʼṭenren eṅgattetʼ do kạ̃ṛmĩ erae tahẽkana ar eṭagicʼren eṅgat do Abrahamren sạdhin erageye tahẽkana.

²³ Uni kạ̃ṛmĩ era khonicʼ do jel lekateye janamena, menkhan sạdhin era khonicʼ do Isorakʼ gokʼakʼ hotetegeye janamlena.

²⁴ Iń do phenkote noakoń roṛeda. Nukin maejiu do barea bondobos kanakin. Mitʼṭecʼ bondobos do sinại buru khone hecʼakana ar acʼ gobolren manwa do golam hoyokʼ lạgitʼe idiyetʼkoa. Ar uni kạ̃ṛmĩ era doe hoyokʼ kana Hagar.

²⁵ Hagar do Arob disạm reakʼ sinại buruye bujhạu ocoyeda. Hagar do nahakʼ reakʼ Jerusalem tulucʼ jurikʼkana, ente Jerusalem do acʼren gidrạko sãote kạ̃ṛmĩye khaṭaokʼ kana.

²⁶ Menkhan okaṭakʼ Jerusalem do serma reakʼkan, uni doe sạdhingea; ar unige aboren gogo do.

²⁷ Sonot sostorre olakana, “Hulạsokʼme E bạńjhi maejiu, one tisge gidrạ bam janam akatʼko, ar bedon hõ baṅ rakapʼ akatʼme, am do, sereń joṅme ar rạskạte andoṛme; ente jãwãe menaetayicʼ khon bạgi giḍiyicʼren gidrạgeko saṅgegea.”

²⁸ E boehako, ape do Isahak lekage Isorakʼ gokʼakʼren hoponko kanape.

²⁹ Menkhan ona jokhecʼ jel lekate janamicʼ do sonot Jiu reakʼ daṛete janamlenicʼ upạrteye santaokan tahẽkana. Ar nahakʼ hõ onkage hoyokʼ kana.

³⁰ Menkhan sonot sostorre cetʼe meneda? Sonot sostorreye meneda, kạ̃ṛmĩ era ar uniren hopon do jemonkin laga oḍok ocokʼ; ente kạ̃ṛmĩ eraren hopon do oka lekate hõ sạdhin eraren hopon tulucʼ baṅgeye ạidạri joṅa.

³¹ E boehako, enḍekhan ńelokʼ kana abo do kạ̃ṛmĩ eraren hoponko do bon baṅkana, menkhan sạdhin eraren gidrạko kana bon.