Galathiko lạgitʼ Pạul Apostolakʼ ciṭhi 2 - সান্তালী বাইবেল

Apostolko do Pạulko ataṅkede

¹ Gelpon bochor tayom iń do Barnabas sãote arhõ Jerusalemteń calaoena, ar Titus hõń soṅge torakedea.

² Isorakʼ monejoṅakʼ sodoren khan iń do onḍeń rakapʼ calaoena. Ar oka bhage sombat boṅgan hoṛ jạtrenko ṭheniń porcaretʼ tahẽkan onań lạiyatʼkoa. Manḍerren manotan hoṛko do oko okote ona jotoń lạiyatʼkoa, enteń botorokʼkan tahẽkana, hoedaṛeakʼa iń do ạuṛiyakʼ iń khaṭao akana.

³ Menkhan boṅgan jạtren hoṛkanre hõe iń soṅgetenicʼ Titus do khatnakʼ lạgitʼ bae jormoṭ ocolena.

⁴ Adom eṛe boehako oko okoteko bololente katha do rakapʼlena. Jisu Mạsire biswạsiko lekate aboakʼ oka sạdhintetʼ menakʼ ona sạdhintetʼ reakʼ dosko sab lạgitʼ onko do oko okoteko bololena jemon golamko benao daṛeabon.

⁵ Menkhan bhage sombat reakʼ sạriạkʼtetʼ jemon ape lạgitʼle rukhiyạ daṛeakʼ onate mitʼ ghạṛi lạgitʼ hõ onkoakʼ katha do bale manaoleda.

⁶ Manḍerren manotanko bikạukʼkan hoṛko do bhage sombat reaṅ nãwãnakʼ cetʼge bako baḍae ocoakadińạ. Menkhan onko do jãhãekangeko onate ińakʼ do cetʼge baṅ cekakʼtińạ. Isor do hoṛakʼ mẽtʼãhã ńelte bae bicạra.

⁷ Bickom onkoko ńelkeda, Jihudiko ṭhen bhage sombat porcar reakʼ bhar cetʼleka Patras cetanre emlen, onkage Isor do boṅgan hoṛ jạtrenko ṭhen bhage sombat porcar reakʼ bhar ińreye emakada.

⁸ Ente Jihudiko ṭhen apostolokʼ lạgitʼ Patrase daṛe ocokedeicʼ do boṅgan hoṛ jạtrenko lạgitʼ iń hõe daṛe ocokedińa.

⁹ Onko manotan hoṛ, metakʼme Jakob, Kephas ar Johan do noako ńelteko bujhạu daṛeatʼ tahẽkana, Isor ṭhen khon dayań ńamakada mente. Onko ar ạliń talare oka helmel menakʼ ona udug lạgitʼ onko do Barnabas ar iń tulucʼ jojomtiko milạukeda. Arko rạjiyena, ạliń do boṅgan hoṛ jạtrenko ṭhenliń calakʼa ar onko do Jihudiko ṭhenge.

¹⁰ Onkoakʼ mitʼṭecʼ nehõr tahẽkana, ạliń do jemon reṅgecʼ orecʼkoliń disạko; ar ińakʼ hõ ona lạgitʼ ạḍi khaṛa mon tahẽkantińạ.

Patras ar Pạulakʼ mot baṅ milạukʼkan

¹¹ Patras do Siriạ Prodes reakʼ Antiokiạteye hecʼen khan, samaṅregeń roṛ daramkedea, ente uni doe behok akatʼ tahẽkana.

¹² Jihudikoren biswạsi okoeko dol do be Jihudiko khatna ocoko cetanre jorko emetʼ tahekan, onkoren adom hoṛ Jakob ṭhen khon ạuriko hijukʼre Patras do be-Jihudiko tulucʼe jom-ńũiyetʼ tahẽkana. Menkhan tinre onko dolren hoṛko hecʼena unre uni do onko botorte be-Jihudiko sãote gatekʼe bạgiketʼte apnar do onko khone begarena.

¹³ Antiokiạren eṭakʼ biswạsi Jihudiko hõ Patras sãoteko phạsiara seletʼlena. Ar Barnabas sudhạ onkoakʼ phạsiaratetʼreye goḍoe torayena.

¹⁴ Menkhan iń do, bhage sombat reakʼ sạriyakʼtetʼ tulucʼ onkoakʼ kạmi reakʼ jãhãn jurige bạń ńelletʼte sanamko samaṅre Kephas iń metadea, “Am do Jihudi hoykate boṅgan hoṛ jạtrenko lekam colonetʼkan khan cekate boṅgan hoṛ jạtrenko do Jihudiko leka colon lạgitʼem ajhãṭetʼkoa?

¹⁵ “Abo do jonom khon Jihudi kana bon, ar boṅgan jạtren kạkạiko do bon baṅkana.

¹⁶ Menkhan enhõ noa bon baḍaegea, Isor do manwa ạn-ạrikoe manaoetʼ iạte dhorom mente bae aṅgocea, bickom Jisu Mạsire pạtiạukʼ hotetegeye aṅgocea. Onate abo hõ Mạsire bon pạtiạu akana, jemon ạn-ạriko manao iạte do baṅ bickom Jisu Mạsire pạtiạukʼ iạte dhorom mente bon aṅgocokʼ; ente ạn-ạri manao iạte okoe hõ dhorom mente ohoko aṅgoclena.

¹⁷ “Mạsi hotete dhorom mente Isor ṭhen aṅgocokʼ lek hoyokʼ lạgitʼ bon kurumuṭuyetʼ khan, boṅgan hoṛ jạtrenko leka kạiyanko kana bon, enḍekhan Mạsi do cetʼ kạiren sapʼ dapʼicʼ kanae? Tishõ baṅa.

¹⁸ Ente okakoń rạputʼ giḍiakatʼ onage arhõń benao ruạr khan enḍekhan iń do apnartetʼge dusi menteń sạbudokʼ kana.

¹⁹ Ar ạn-ạriko hotete iń do ạn secʼteń gocʼena jemon Isor lạgitʼ jiwetʼ iń tahẽ daṛeakʼ.

²⁰ Iń do Mạsi tulucʼ iń kurus ocoakana. Onate jiwetʼ do bạnuńa, menkhan Mạsige ińre jiwetʼ menaea. Ar okaṭakʼ hoṛmote jioniń khemaokan ona do Isorren Hoponre pạtiạu hotetegeń khemaoeda. Uni do ińe dulạṛkedeńte acʼ apnartetʼe emena.

²¹ Isorakʼ noa daya do bạń ạuṛiyakʼ ocoya, ente ạn-ạri manaote manwa do Isor ṭhen dhorome hoyokʼ khan enḍekhan Mạsi do ạuṛiyakʼgeye gocʼlena.”