Exodus 9 - সান্তালী বাইবেল

Misor cetanre mõṛẽakʼ duk-Janwarkore mahamạri

¹ Niạ tayom Probhu Isor do Moseye metadea, “Pharao ṭhen senkate menme, Ibrikoren Probhu Isore meneda, ‘iń sewawạń lạgitʼ ińren hoṛko sen ocoakome.

² Menkhan am do bam sen ocoakokana onkom sapʼ dohoyetʼkoa,

³ onate ṭạnḍire menakʼko amren sadomko, gadhako, ũṭko, ḍaṅgrako, bhiḍiko, meromko, cetanre usạrage ińakʼ tite mitʼṭecʼ mahamariń hoeocoya.

⁴ Menkhan Israelkoren gại ḍaṅgrako do Misorrenko khoniń begarkoa. Ar onkoren tinạkʼ gại-ḍaṅgra menakʼko onko do mitʼṭen hõ bako gujukʼa.’ ”

⁵ Ar Probhu Isor do ona mahamạri reakʼe ṭhik dohokada. Uniye menakada, “Gapage noa disạm cetanre onań paṛao ocoya.”

⁶ Dosar hilokʼ Probhu Isor doe onkakeda. Onate Misorren sanam gại-ḍaṅgra ar bhiḍi meromko gocʼ cabayena, menkhan Israelkoren gại-ḍaṅgrako do mitʼṭen hõ bako gocʼlena.

⁷ Pharao do hoṛ kolkateye baḍaekeda, Israelkoren mitʼṭen gại-ḍaṅgra hõ bako gocʼakana. Enhõ Pharao do mone keṭecʼketʼtaea; ar hoṛko bae sen ocowatʼkoa.

Misor cetanre turuiyakʼ duk-Ojoko

⁸ Ona tayom Probhu Isor do Mose ar Arone metatʼkinạ, “Bhaṭa khon thoṛagan torocʼ hatao ben. Ar Pharaoakʼ mẽtʼãhã samaṅre Mose do coṭ secʼe uḍiạuma.

⁹ Khan ona do lemeń dhuṛi leka goṭa Misor disạm cetanre pheḍokʼa. Onate goṭa Misorren hoṛko ar janwarkoakʼ hoṛmore ojoko rakabokʼa.”

¹⁰ Unre Mose ar Aron do bhaṭa khon torocʼ hataokate Pharao samaṅre kin teṅgoyena. Ar Mose do coṭ secʼ onae uḍiạuketʼ khan manwa ar janwarkore ojoko rakapʼena.

¹¹ Gonokko do Mose samaṅre ar bako teṅgo daṛeada, ente onko hõ eṭakʼ Misri hoṛko leka ojo rakapʼatʼkoa.

¹² Menkhan Probhu Isor do Pharaoakʼ mon artetʼgeye keṭecʼ ocoketʼtaea. Onate Probhu Isor okae menletʼ onkage hoyena. Mose ar Aronakʼ katha Pharao do bae luturada.

Misor cetanre eaeakʼ duk-Arel

¹³ Unre Probhu Isor do Moseye metadea, “Am do ạḍire beretʼkate Pharao samaṅrem teṅgokʼa, arem metaea, Ibrikoren Probhu Isore meneda, ‘iń sewawạń lạgitʼ ińren hoṛko sen ocoakome,

¹⁴ ente noa tayom am ar amren kạmiyạko ar hoṛko cetanre iń do sanam lekan duk iń kola. Ar unrem bujhạu daṛeakʼa, goṭa dhạrtire iń leka ar celege bạnukʼkoa.

¹⁵ Iń do ińakʼ daṛeń uduga ar amren hoṛko cetanre nonkan mahamạriń kola onate dhạrti khonpe marao utạrokʼa.

¹⁶ Menkhan am do jiwetʼ iń dohomea jemon ińakʼ daṛeń udukʼ daṛeam ar goṭa dhạrtire ińakʼ ńutum lại pasnaokʼtiń.

¹⁷ Am do ńitʼ hõ ińren hoṛko upạrtem teṅgo akana ar bam sen ocoako kana.

¹⁸ Ona iạte gapa ṭhik niạ oktege botoranakʼ arel iń kola one onka Misor disạmre tisge baṅ hoyakan.

¹⁹ Ona iạte ṭạnḍire amren tinạkʼ gại ḍaṅgrako ar manwako menakʼko onko ṭhen katha kolme jemonko aḍ daṛeakʼ. Ar jãhãe hoṛ se gại ḍaṅgra oṛakʼte bako hijukʼ ar ṭạnḍiregeko tahen enḍekhan onko do arel ńurakoteko gujukʼa.’ ”

²⁰ Unre Pharaoren kạmiyạko tinạkʼ do Probhu Isorakʼ kathate botor hecʼatʼko onko do usạra akoren golamko ar gại-ḍaṅgrako oṛakʼteko ạguketʼkoa.

²¹ Menkhan okoe ona bako luturatʼ onko do akoren golamko ar gại-ḍaṅgrako ṭạnḍiregeko dohokatʼkoa.

²² Probhu Isor do Moseye metadea, “Serma secʼ amakʼ ti tiyạrme. Onate goṭa misor disạmren hoṛko, janwarko ar ṭạnḍi reakʼ dare nạ̃ṛĩko cetanre arel ńurokʼa.”

²³ Unre Mose do serma secʼ acʼakʼ ṭheṅgae tulkeda. Ar Probhu Isor do huḍur ar arele kolketʼte ńurokʼ ehopʼena ar ona sãote seṅgel ńurokʼ hõ ehopʼena. Nonkage Probhu Isor do Misor disạmre arele kolkeda.

²⁴ Eken arel ńurokʼ do baṅ, ona são sãote bijli hõ malkaokʼkan tahẽkana. Misor raj reakʼ etohopʼ khon ńit hạbicʼ goṭa disạmre nonka do ar tishõ baṅ hoyakan tahẽkana.

²⁵ Misor disạm reakʼ ṭạnḍikore okoe manwa ar gại ḍaṅgrako tahẽkan onko do celege arel khon rukhiyạ do bako ńamleda. Arelte ṭạnḍi reakʼ sanam phosol do nosṭo cabayena ar dare reakʼ ḍạrko rạputʼ ńurhạyena.

²⁶ Menkhan Israelko okareko tahẽkan ona Gosenre do arel baṅ ńurlena.

²⁷ Pharao do unre Mose ar Aron hohowatʼkinteye metatʼkinạ, “Niạ bar doń kại akada. Probhu Isor do ṭhikgeye kạmiakatʼa. Iń ar ińren hoṛgele dusigea.

²⁸ Am do Probhu Isor ṭhen nehõrokʼme. Huḍur ar arel do ḍherge hoyakana. Niạ dhao doń sen ocoapea. Nonḍe do ar tahen baṅ hoyokʼtapea.”

²⁹ Mose do uniye metadea, “Nagraha khon oḍok katege iń do Probhu Isor ṭhen ti tulkateń koejoṅa. Onate huḍur ar arel ńurokʼ hõ thirokʼa. Ar noatem bujhạu daṛeakʼa, dhạrti do Probhu Isorakʼ kangea.

³⁰ Menkhan ińiń baḍaea, am ar amren kạmiyạko do Probhu Isor ńitʼ hõ bape botorae kana.”

³¹ Arel iạte Misor reakʼ sanam musnạ ar jao do nosṭo cabayena. Ona oktere jao do gele akan tahẽkana ar musnạ hõ bhoṭokʼ akan tahẽkana,

³² Menkhan guhum ar guḍmạ guhum do baṅ ṭuṭi chacka chakʼ lena ente unhõ belekʼ okte do baṅ hoyakan tahẽkana.

³³ Ona tayom Mose do Pharao ṭhen khone oḍok senena. Ar nagraha khon oḍok kate uni do Probhu Isor ṭhen ti tulkateye koekeda. Unre rimil saḍe ar arel ńurokʼ thirena. Ar dakʼ ńurokʼ hõ thirena.

³⁴ Menkhan Pharao ar uniren kạmiyạko do tinre, huḍur, dakʼ ar arel ńurokʼ thirena unre onko do arhõko kạikeda. Onko do arhõ monko keṭecʼketʼtakoa.

³⁵ Probhu Isor do Mose hotete cetʼlekae menletʼ onkage Pharaoakʼ mon do keṭecʼentaea; uni do Israelko bae sen ocowatʼkoa.