Exodus 8 - সান্তালী বাইবেল

Misor cetanre dosarakʼ duk-Roṭeko

¹ Ona tayom Probhu Isor do Moseye metadea, “Senkate Pharao noa katham metaea, Probhu Isore meneda, ‘iń sewawạń lạgitʼ ińren hoṛko sen ocoakome.

² Ar onko bam sen ocoako khan iń do goṭa disạm cetanre roṭekoń kolkoa.

³ Nil gaḍa do roṭekote perejokʼa, ar onko do gaḍa khonko rakapʼ hijukʼte amakʼ oṛakʼ duạrkore, giticʼ oṛakʼkore, amakʼ aṭetʼkore, amren kạmiyạkoakʼ oṛakʼkore, amren hoṛkoakʼ oṛakʼkore, amakʼ culhạre ar amakʼ holoṅ sipiyakʼ gamlareko don bolokʼa.

⁴ Onko roṭe do am cetanre ar amren hoṛko cetanre ar amren kạmiyạko cetanreko don baṛaya.’ ”

⁵ Ona tayom Probhu Isor do Moseye metadea, “Aron do noa katham metaea, ‘Misor disạm reakʼ joto gaḍa, nala ar pukhri cetanre amakʼ ṭheṅga tultam ar disạm cetanre roṭe ạgukom.’ ”

⁶ Unre Aron do Misor reakʼ sanam dakʼ cetanre acʼakʼ tiye tiạrkeda. Ar onate roṭeko rakapʼ hecʼente disạmko perecʼ cabakeda.

⁷ Ar gonokko hõ akoakʼ jạdu reakʼ jorte onkageko udukʼkeda. Onko hõ Misor disạmre roṭeko ạguketʼkoa.

⁸ Pharao do unre Mose ar Aron hohoatʼkinteye metatʼkinạ, “Probhu Isor nehõrae ben jemon uni do iń ar ińren hoṛko cetan khon roṭekoe ocokʼko. Iń do hoṛkoń sen ocoakoa jemon senkate Probhu Isor ńutumte dãṛẽko samaṅ daṛeakʼ.”

⁹ Mose do Pharaoe metadea, “Roṭeko jemon am ar amakʼ oṛakʼ-duạr bạgikate gaḍareko tahen, onate ma lạiyạńme tinre am ar amren hoṛko lạgitʼ iń nehõrokʼa. Okte do amge ṭhikạńme.”

¹⁰ Pharaoe roṛ ruạṛadea, “Enḍekhan ona do gapage hoyokʼma.” Moseye menkeda, “Onkage hoyokʼa. Ar onatem bujhạu daṛeakʼa, aleren Probhu leka do ar cele Isorge bạnukʼkoa.

¹¹ Roṭe do am ar amakʼ oṛakʼ-duạr, amren kạmiyạko ar amren hoṛko ṭhen khonko oḍok calakʼa. Ar eken gaḍa dakʼregeko tahena.”

¹² Noa katha menkate Mose ar Aron do Pharao ṭhen khonkin ruạṛena. Ar Pharao cetanre Probhu Isor oka duke kolakatʼ ona babotre Mose do Probhu ṭhene rakʼkeda.

¹³ Unre Probhu Isor do uniyakʼ katha lekae kạmikeda. Oṛakʼ-duạr, raca ar ṭạnḍikore tinạkʼ roṭeko tahẽkan sanamgeko gocʼena.

¹⁴ Ar hoṛko do onkoko jarwaketʼkoa ar onate disạmre ạḍi bạṛicʼ so rakapʼena.

¹⁵ Pharao do roṭe khon rukhiyại ńamketʼ khan uniyakʼ mon do arhõ keṭecʼ ruạṛentaea ar unkinakʼ katha do bae moneyada. Probhu Isor cetʼlekae menletʼ onkage hoyena.

Misor cetanre tesarakʼ duk - sĩkṛĩcʼko

¹⁶ Unre Probhu Isor do Moseye metadea, “Aron do acʼakʼ ṭheṅga tulkate ot reakʼ dhuṛire da dalem metaea. Onate ona dhuṛi khon sĩkṛĩcʼko hoyokʼa ar goṭa Misor disạmko pereja.”

¹⁷ Aron ar Mose do onkagekin kạmikeda. Aron do acʼakʼ ti tiạrkate ot reakʼ dhuṛiye dalkeda ar onate manwa ar janwarko cetanre sĩkṛĩcʼko apʼena. Unre Misor disạm reakʼ sanam dhuṛiko do sĩkṛĩcʼ hoyena.

¹⁸ Ar gonokko hõ akoakʼ jạdu reakʼ jorte sĩkṛĩcʼ ạguko reakʼko kurumuṭukeda menkhan bako daṛeada. Ar sĩkṛĩcʼ do manwa ar janwar cetankore abokʼko ehopʼena.

¹⁹ Noa ńelte gonokko do Pharaoko metadea, “Noare do Isorakʼ ti menakʼa.” Menkhan enhõ Pharaoakʼ mon do keṭecʼge tahẽyena; uni do Mose ar Aronakʼ katha bae luturada. Probhu Isor okae menletʼ onkage hoyena.

Misorre ponakʼ duk - kãṛã loṭocʼko

²⁰ Inạ tayom Probhu Isor do Moseye metadea, “Ạḍi setakʼre beredokʼme ar Pharao tinre gaḍa ghaṭteye calakʼa unre uni samaṅre teṅgokʼme. Ar unim metaea, Probhu Isore meneda, ‘iń sewawạń lạgitʼ ińren hoṛko sen ocoakome.

²¹ Ar bam sen ocoako khan am ar amren sanam kạmiyạko ar amren hoṛko cetanre ar amakʼ oṛakʼ-duạrkore durum durum kãṛã loṭocʼ iń kolkoa. Misorrenkoakʼ oṛakʼ-duạr ar sanam jaega do kãṛã loṭocʼkote perejokʼa.

²² Menkhan enhilokʼ do Gosen disạmiń begara, ente onḍe do ińren hoṛko girobasokʼ kana. Onḍe do jãhãn kãṛa loṭocʼge bako tahena. Ar onatepe baḍae daṛeakʼa, iń Probhu Isorge noa disạmre minạńa.

²³ Ar mitʼṭecʼ bekʼgarakʼ iń dohoya ińren hoṛko ar amren hoṛko talare. Ar gapage noa hahaṛawakʼ do ńelokʼa.’ ”

²⁴ Probhu Isor doe onkakeda. Pharaoakʼ raj oṛakʼre ar uniren kạmiyạkoakʼ oṛakʼkore durum durum kãṛã loṭocʼko boloyena. Ar onkote goṭa Misor disạm do perecʼena.

²⁵ Unre Pharao do Mose ar Aron hoho ạgu ocoketʼkinteye metatʼkinạ, “Ape do noa disạmrege jãhãre senkate aperen Isor ńutumte dãṛẽ samaṅpe.”

²⁶ Moseye menkeda, “Menkhan noa do cetʼ ṭhikakʼ hoyokʼa? Aleren Probhu Isor ńutumte ale okaṭakʼle samaṅ ona do Misorrenko ṭhen hirkhạwakʼkana. Misorren okaṭakʼko hirkhạwakʼ ona dãṛẽ onkoakʼ mẽtʼãhã samaṅrele samaṅ khan onko do cetʼ dhirite bako tińlea?

²⁷ Aleren Probhu Isorakʼ hukum leka ale do hahaṅkar talate pe din reakʼ horte senkate uni ńutumte dãṛẽle samaṅa.”

²⁸ Pharaoe menkeda, “Aperen Probhu Isor sewae lạgitʼ iń do hahaṅkarteń sen ocoapea. Menkhan ḍher sạṅgiń do alope calakʼa. Ar ńit aben do iń lạgitʼ nehõrokʼ ben.”

²⁹ Moseye menkeda, “Am ṭhen khon ruạṛkatege Isor ṭhen liń nehõrokʼa jemon gapage maharaj ar uniren kạmiyạko ar uniren hoṛko cetan khon noko kãṛã loṭocʼko calao cabakʼa. Menkhan Probhu Isor ńutumte janwar dãṛẽ samaṅokʼakʼ lạgitʼ senokʼ do maharaj jemon aloe eṛele.”

³⁰ Noa tayom Mose do Pharao ṭhen khon ruạṛkate Probhu Isor ṭhene nehõrena,

³¹ Probhu Isor hõ Moseyakʼ kathae ańjomkeda. Uni do Pharao ar uniren kạmiyạko ar uniren hoṛko cetan khon loṭocʼkoe ocokʼketʼkoa. Mitʼṭen kãṛã loṭocʼhõ ar bako tahẽlena.

³² Menkhan niạ dhao hõ Pharao do acʼakʼ mone keṭecʼketʼtaea ar hoṛko bae sen ocoatʼkoa.