Exodus 7 - সান্তালী বাইবেল

¹ Unre Probhu Isor do Moseye metadea, “Ńelme, Pharao ṭhen am do Isor lekań hoyocomea, ar amren dadam Aron do amren Nạbigeye hoyokʼa.

² Ar okaṭakʼ hukumiń emamkan ona do sanamakʼem sodora. Amren dadam Aron do Pharaoe metaea, jemon acʼakʼ disạm khon Israelkoe sen ocoako.

^3-4 Menkhan iń do Pharaoakʼ moniń keṭecʼ ocoytaea jemon Misor disạmre aema cinhạ ar hahaṛa kạmikoń kạmi daṛeakʼ. Uni do abenakʼ katha bae ańjoma. Onate iń do Misor disạm cetanre ińakʼ tiyiń tultińạ ar ạḍi bạṛicʼ sạjạyiń emokʼte ińren phạdko, metakʼme ińren hoṛ Israelko ona disạm khoniń oḍok ạgukoa.

⁵ Ińakʼ daṛeń udugte tinre Misor khon Israelkoń oḍok ạgukoa unre Misorrenko bujhạu daṛeakʼa, Iń kangeạń Probhu Isor do.”

⁶ Probhu Isor do Mose ar Aron cetʼlekae hukumatʼkin tahẽkan onkage unkin dokin kạmikeda.

⁷ Pharao sãote katha roṛ jokhecʼ Moseyakʼ umer do irạlgel ar Aronakʼ umer do irạlgel pe bochor tahẽkana.

Aronakʼ ṭheṅga

⁸ Probhu Isor do Mose ar Aron tạkin arhõe metatʼkinạ,

⁹ “Pharao tinre hahaṛa kạmi udukʼ lạgitʼe metabena, unre Aronem metaea, ‘Pharao samaṅre amakʼ ṭheṅgam giḍiytama,’ ar unre ona ṭheṅga do bińe hoy godokʼa.”

¹⁰ Ar Probhu Isor okalekae metatʼkin onkage Mose ar Aron do senkatekin kạmikeda. Aron do acʼakʼ ṭheṅga Pharao ar uniren kạmiyạko samaṅreye giḍigotʼkeda, ar ona ṭheṅga do bińe hoyena.

¹¹ Pharao do ạkilan gunidarkoe hoho ạgu ocoketʼkoa. Ar onko hõ akoakʼ jạdu reakʼ jorte onkageko kạmikeda.

¹² Onko do sanamkoge akoakʼ ṭheṅga otreko giḍikeda ar onako ṭheṅga do bińko hoyena, menkhan Aronakʼ ṭheṅga do onkoakʼ joto ṭheṅgakoe utʼketʼtakoa.

¹³ Menkhan Probhu Isor do unkin okae metatʼkin tahẽkan onkage hoyena. Pharaoakʼ mon do keṭecʼentaea; onate Mose ar Aronakʼ katha bae ańjomleda.

Misor cetanre pạhilakʼ duk-Mãyãm

¹⁴ Unre Probhu Isor do Moseye metadea, “Pharaoakʼ mon do keṭecʼ akantaea, onate hoṛko bae sen ocoakokana.

¹⁵ Gapa setakʼ tinre Pharao do gaḍa ghaṭteye calakʼa, unre am do uni tulucʼ ńapamokʼ lạgitʼ nil gaḍa aṛerem teṅgo hataṛkokʼa. Ar okaṭakʼ ṭheṅga biń hoylen ona hõm sapʼ toraea.

¹⁶ Ar unim metaea, ‘Ibrikoren Probhu Isor do noa katha men lạgitʼ am ṭhene kol akadińạ, uniren hoṛko hahaṅkarre senkate jemon uniko sewa daṛeae onate onko baṛe sen ocoakome. Menkhan ńit hạbicʼ am do uniyakʼ katha bam lutur akawada.

¹⁷ Ona iạte Probhu Isore meneda, acʼkangeae Probhu do, ar am do noa cinhạ ńeltem bujhạu daṛeakʼa.’ Unrem mena, ‘iń do ńitokʼ ińakʼ ti reakʼ ṭheṅgate nil gaḍa dakʼ iń dala ar onate gaḍa dakʼ do mãyãmokʼa.

¹⁸ Onate joto hakoko gujukʼa ar nonka bạṛicʼ so oḍokokʼa, Misorrenko do dakʼge bako ńũ daṛeakʼa.’ ”

¹⁹ Tayomte Probhu Isor do Moseye metadea, “Aron acʼakʼ ṭheṅga hataokate Misor reakʼ sanam gaḍa, nala, pukhri ar jarwa akan dakʼko cetan secʼ ti tiạrkate ạcurem metaea. Onate sanam dakʼ do mãyãmokʼa. Misor disạm reakʼ sanam jaegare mãyãm ńelokʼa; ar dhiri ar kaṭre dohoakatʼ dakʼ hõ mãyãmokʼa.”

²⁰ Mose ar Aron do Probhu Isorakʼ hukum leka jotowakʼ kin kạmikeda. Pharao ar uniren kạmiyạko samaṅre Aron do acʼakʼ ṭheṅgae tulketʼte nil gaḍa reakʼ dakʼe dalkeda. Ar gaḍa dakʼ do mãyãm hoyena.

²¹ Unre gaḍaren sanam hakoko gocʼena ar nunạkʼ bạṛicʼ so oḍokokʼ ehopʼena, Misorrenko do dakʼge bako ńũ daṛeada. Ar Misor reakʼ sanam jaegarege mãyãm do ńelena.

²² Unre Misorren gonokko hõ akoakʼ jạdukote ona lekageko udukʼkeda. Onate Pharaoakʼ mon do arhõ keṭecʼentaea. Ar Probhu Isor okae menletʼ onkage hoyena; Mose ar Aronakʼ katha Pharao do bae ańjomleda,

²³ bickom uni doe ạcurente acʼakʼ oṛakʼteye boloyena. Ar cetʼge bae moneyada.

²⁴ Misorrenko do dakʼ bako ńũ daṛeakʼte ńũi dakʼ ńam lạgitʼ gaḍa aṛe koreko la baṛakeda.

²⁵ Nil gaḍa cetanre Probhu Isor noa duke kolketʼ tayom eae din paromena.