Exodus 40 - সান্তালী বাইবেল

Sekʼwa tạmbu beredokʼkan

¹ Inạ tayom Probhu Isor do Moseye metadea,

² “Bochor reakʼ pạhil cando reakʼ pạhil dinre am do sekʼwa tạmbu, metakʼme ńapamokʼ tạmbuyem bereda.

³ Ar ona talare goha sinduk dohokate ona reakʼ orwalte ona dom dapal esetʼkakʼa.

⁴ Ṭebil hõ bhitrite ạgukate ona cetanre oka dohoy reakʼ onam sajao dohoya. Ar tayom do diuhe dohowakʼem ạguiya ar diuhekom jola.

⁵ Sekʼwa tạmbu samaṅre sona reakʼ dhup-pinḍem dohoya ar sekʼwa tạmbu reakʼ duạrre do orwalem ṭaṅgaoa.

⁶ Sekʼwa tạmbu, metakʼme ńapamokʼ tạmbu reakʼ duạr samaṅre jeredokʼ samaṅokʼ reakʼ pinḍem benaoa.

⁷ Noa pinḍ ar sekʼwa tạmbu reakʼ tala ṭhạ̃ire bhajanem dohoya ar onare dakʼtem pereja.

⁸ Ona tayom bakher raca reakʼ beṛhaete orwaltem eseda ar ona reakʼ duạrre hõ orwalem lagaoa.

⁹ “Tayomte ojokʼakʼ sunumem hataoa ar sekʼwa tạmbu ar ona tala reakʼ jotowakʼ cetanre ona sunumte iń ńutumtem begar dohoya. Onate ona joto do sonotakʼ hoyokʼa.

¹⁰ Thạri bạṭiko sudhạ jeredokʼ samaṅokʼakʼ pinḍ cetanre hõ ojogokʼakʼ sunumte pinḍ do iń ńutumtem begar dohokakʼa. Onate ona do sonot utạrakʼ jinisko hoyokʼa.

¹¹ Ganḍo sudhạ luihạ cetanre ojogokʼ sunumte iń ńutumtem begar dohoya.

¹² “Ona tayom Aron ar uniren hoponkin do ńapamokʼ tạmbu reakʼ duạr samaṅre ạgukate dakʼtekin ạbuk saphakʼa.

¹³ Ar Aron do sonot kicricʼem horokʼaea arem ojokʼ bahalea ar iń ńutumtem begar dohoyea jemon naeke lekate ińakʼ sapʼ dapʼ kạmiye kạmi daṛeakʼa.

¹⁴ Aronren hoponkin ạgukate unkin hõ naeke reakʼ kicricʼem horokʼạkina.

¹⁵ Ar ona tayom do ạkinren apat leka unkin hõm ojokʼ bahal kinạ jemon unkin hõ naeke lekate ińakʼ sapʼdapʼ kạmikin kạmi daṛeakʼ. Noa ojokʼ bahalokʼ hotete okoe naeke hudạ lekateye bahalokʼ ona do piṛhike piṛhi hạbicʼ calakʼa.”

¹⁶ Probhu Isor Mose oka lekae hukumade tahẽkan onkage jotowakʼe kạmikeda.

¹⁷ Dosar bochor reakʼ pạhil cando reakʼ pạhil dinre sekʼwa tạmbu do beretʼ hoyena.

¹⁸ Ona bered lạgitʼte Mose do ganḍoko bạisạukate phremkoe teṅgokeda. Uni do hurkạṛkoe dohokeda ar khunṭikoe bạisạukeda.

¹⁹ Ona tayom Probhu Isorakʼ hukumleka uni do sekʼwa tạmbu cetanre merom upʼte benaoakʼ kicricʼe aṭetʼkeda ar ona cetanre barea umulakʼe dohokada.

²⁰ Ona tayom Mose do goha paṭa banar hataokate sinduk bhitrireye dohokeda ar sindukre ḍaṅkine hurạṛkada ar ona cetanre do ḍhalwakʼe dohokeda.

²¹ Ona tayom Probhu Isorakʼ hukum leka sinduk do sekʼwa tạmbu bhitriteye aderkeda ar ona reakʼ orwalteye dapalkada.

^22-23 Ona orwal bahre utạr secʼ sekʼwa tạmbu talare, metakʼme ńapamokʼ tạmbu talare uni do ṭebile dohokeda ar Probhu Isorakʼ hukum leka uni samaṅre ṭebil cetanre samaṅakʼ piṭhạye sajao dohokada.

^24-25 Dạkhin secʼ, mej reakʼ tayom secʼre Probhu Isorakʼ hukum leka diuhe dohowakʼe dohokeda ar ona cetanre Probhu Isor samaṅre diuhe koe jolkeda.

^26-27 Orwal samaṅre ona ńapamokʼ tạmbu bhitrire uni do sona reakʼ pinḍe dohokeda ar Probhu Isorakʼ hukum leka ona cetanre mońj so dhupe jeretʼkeda.

²⁸ Ona tayom uni do sekʼwa tạmbu duạr reakʼ orwale ṭaṅgaokeda.

²⁹ Sekʼwa tạmbu, metakʼme ńapamokʼ tạmbu duạr ṭhen uni do jeredokʼ samaṅokʼ reakʼ pinḍe dohokeda ar Probhu Isorakʼ hukum leka ona cetanre jeredokʼ samaṅokʼakʼ ar anaj samaṅokʼakʼ porobe porobena.

³⁰ Ona pinḍ ar ńapamokʼ tạmbu reakʼ tala mala ṭhạ̃ire uni do ona bhajane bạisạukeda ar ti-jaṅga ạbukokʼ lạgitʼ onare dakʼe dohokeda.

³¹ Ona bhajan reakʼ dakʼte Mose, Aron ar uniren hoponkin tako do ti ar jaṅgako ạbukokʼkan tahẽkana.

³² Probhu Isor do Mose oka lekae hukumade tahẽkan onkage onko do ńapamokʼ tạmbure bolokʼ lahare se pinḍ ṭhen calakʼ lahare ti jaṅgako ạbukokʼkan tahẽkana.

³³ Pinḍ ar sekʼwa tạmbu beṛhaete uni do orwale ṭaṅgaokeda ar racae benaokeda ar duạr reakʼ orwale emada. Nonkate Mose do acʼakʼ kạmiye sạtkeda.

Isorakʼ ṭhonok sodorokʼkan

³⁴ Ona tayom rimil hecʼente ńapamokʼ tạmbui dapal esetʼkeda ar sekʼwa tạmbu do Probhu Isorakʼ ṭhonokte perecʼena.

³⁵ Sekʼwa tạmbu, metakʼme ńapamokʼ tạmbu do rimilte dapal esetʼena ar Probhu Isorakʼ ṭhonok perecʼ tahẽkante Mose do onḍe bae bolo daṛeada.

³⁶ Israelkoakʼ goṭa daṛanre sekʼwa tạmbu cetanre rimil tinre rakabokʼkan tahẽkana unre onko doko mohnḍakʼkan tahẽkana;

³⁷ menkhan rimil ạuri rakabokʼ hạbicʼ onko doko koyokʼ horetʼ tahẽkana.

³⁸ Probhu Isorakʼ noa rimil do Israelkoakʼ goṭa daṛan horre sińre do onkoakʼ mẽtʼ samaṅre sekʼwa tạmbu cetanre ar ńindạ do onare seṅgel tahenkan tahẽkana.