Exodus 39 - সান্তালী বাইবেল

Maraṅ naekeyakʼ Ephod ar kicricʼko

¹ Sonot sekʼwa tạmbu oṛakʼ reakʼ sapʼdapʼ kạmire horog lạgitʼ onko do nil, beguni ar jeṅgetʼ arakʼ sutạmte kicricʼko benaokeda. Probhu Isor do Mose oka lekae hukumade tahẽkana onkage onko do Aronakʼ naeke kạmi lạgitʼ sonot kicricʼko benaokeda.

² Ar Besalel do sona, nil, beguni ar jeṅgetʼ arakʼ sutạm ar uńakʼ mĩhĩ musnạ sutạmkote ephode benaokeda.

³ Onko do sona koṭecʼ capṛakate tar leka onako getʼ cirạkeda jemon nil, beguni ar jeṅgetʼ arakʼ sutạm ar mĩhĩ musnạ sutạm sãote sona reakʼ sutạm hõ beoharokʼ. Noa do mitʼṭen gạkhuṛ kạrigolakʼ ti reakʼ kạmige tahẽkana.

⁴ Ephod do tarenre tol dohokakʼ lạgitʼ barea phitạko benaokeda ar ephod reakʼ banar munucạtʼreko joṛaokada.

⁵ Ephod sãote joṛao akatʼ ḍanḍa reakʼ cõhõk bedhaoakʼ hõ ńelokʼte ephod lekage hoyena. Ar ona hõ sonate, nil, beguni ar jeṅgetʼ arakʼ sutạm ar uńakʼ mĩhĩ musnạ sutạmte benao hoyena. Probhu Isor cetʼleka Moseye hukumade tahẽkan onkage sanamakʼ kạmiko kạmikeda.

^6-7 Ar boidurjo mạnik dhirikin do sona galaṅakʼte hạṛupʼ ạcurakʼko tearkeda, onko do chahapakʼ reakʼ rokʼ caṛhao kạmiyakʼ lekageko rokʼkeda, Israel hoponko reakʼ ńutum lekate. Ar onakin do ephod reakʼ taren kicricʼkinreye lagaokeda, Israelren hoponko reaṅ dikʼsạ mạnik menkate Probhu Isor Moseye hukum akawade tahẽkan leka.

Koṛam aḍokʼakʼ benaokʼkan

⁸ Ona tayom koṛam aḍokʼakʼ benao hoyena. Noa hõ gạkhuṛ kạrigolakʼ ti reakʼ kạmige tahẽkana. Ephod leka noa hõ sonate, nil, beguni, ar jeṅgetʼ arakʼ sutạm ar uńakʼ mĩhĩ musnạ sutạmte benao hoyena.

⁹ Noa do jeleńte mitʼ bitạ ar osarte mitʼ bitạ mitʼṭecʼ ponon konac lạṭum mitʼakatʼ kicricʼge.

¹⁰ Ar onko do noa cetanre pon sạrte damanakʼ dhiriko bạisạukeda. Pạhilakʼ sạrre do cuni, podmorag ar morokot;

¹¹ dosarakʼ sạrre do pitmoni, nilkanto ar hirạ;

¹² tesarakʼ sạrre do peroj, tamro ar koṭahela;

¹³ ar ponakʼ sạrre do gomedok, boidurjo ar surjokanto moni. Ar mạnik dhiriko galaṅ paṭetʼ akatʼ sona cetanrege bạisạu hoyena.

¹⁴ Israelren gelbar goṭen hoponko lạgitʼ jotote gelbar goṭecʼ mạnik dhirihõko bạisạuada. Ona reakʼ mimitʼ goṭecʼre gelbar khũṭren mitʼṭecʼkate ńutumko rokʼ caṛhaokeda, chachapakʼ rokʼ caṛhaoakʼ lekage.

¹⁵ Koṛam aḍokʼakʼ lạgitʼ khạṭi sona do baber leka uńkate barea sikṛiko benaokeda.

¹⁶ Onko do sona reakʼ barea galaṅakʼ ar sona reakʼ barea kạṛiko benaokeda ar kạṛikin do koṛam aḍokʼakʼ reakʼ banar konacreko lagaoada,

¹⁷ sona reakʼ ona banar sikṛige ona banar kạṛi sãoteko gakʼkada.

¹⁸ Ar onakin banar galaṅakatʼ sikṛi reakʼ banar munucạtʼ do onakin barea paṭetʼ galaṅakʼre lagaokate ephod reakʼ samaṅ secʼ ona reakʼ taren kicricʼreko lagaoada.

¹⁹ Ona chaḍa onko do arhõ barea sona reakʼ kạṛi benao ocokate koṛam aḍokʼakʼ reakʼ eṭakʼ konacreko joṛaoada. Onate onakin do ephod secʼ samaṅ akatʼ, koṛam aḍokʼakʼ reakʼ bhitri aṛere tahẽyena.

²⁰ Ona chaḍa onko do arhõ barea sona reakʼ kạṛiko benao ocoketʼte ephod reakʼ taren kicricʼ latar nakha ona reakʼ samaṅ senakʼ jopoṛao pheḍreko joṛaokeda, ephod reakʼ cõhõk bekʼdhaoakʼ cetanre.

²¹ Ona tayom koṛam aḍokʼakʼ do ona kạṛikin sãote ephod reakʼ mundạmreko tol mitʼkeda nil roṅakʼ baberte. Ar onate koṛam aḍokʼakʼ do ephod reakʼ cõhõk bekʼdhaoakʼ cetanre tahẽyena. Ar noa do Probhu Isor Moseye hukumade tahẽkan leka sanamakʼ kạmiko hoyena.

Naekeyakʼ eṭakʼakʼ kicricʼko

²² Ephod bhitrire horokʼakʼ jeleń aṅgrop do nil sutạmteko benaokeda.

²³ Bohokʼ bolokʼ lạgitʼ kiricʼ talare jhicʼgeko dohokada ar jemon alo oṛejokʼ ona lạgitʼ ona beṛhaete ḍombe lekako tolada.

²⁴ Nil, beguni ar jeṅgetʼ arakʼ uńakʼ sutạmte dạlim jo benaokate noa kicricʼ latar reakʼ ḍombe beṛhaeteko dạsiyada.

²⁵ Ona tayom khạṭi sonate ghạnṭiko benaokeda ar ona ḍạlim tala talateko lagaoada.

²⁶ Sekʼwa kạmi jokhecʼ horokʼakʼ noa kicricʼ latarre reakʼ ḍombeko do mitʼṭecʼkate ḍạlim ar ghonṭae sapʼ dohokeda. Probhu Isor Mose oka lekae hukumade tahẽkana onkage jotowakʼ do kạmi hoyena.

²⁷ Aron ar uniren hoponko lạgitʼ do mĩhĩ musnạ sutạmte kicricʼko benaokeda.

²⁸ Onkoakʼ dạhṛi ar bohokʼ reakʼ ṭupri hõ mĩhĩ musnạ sutạmteko benaoekeda ar bhitri reakʼ kicricʼ do uńakʼ mĩhĩ musnạ sutạmteko benaokeda.

²⁹ Onkoakʼ ḍanḍa totolakʼ do uńakʼ mĩhĩ musnạ sutạmte ar nil, beguni ar jeṅgetʼ arakʼ sutạmte benao hoyena . Noa do noksa akatʼ jinis lekage hoyena. Probhu Isor Mose oka lekae hukumade tahẽkan onkage jotowakʼ do benao hoyena.

³⁰ Ona tayom onko do khạṭi sonate mitʼṭecʼ batako benaoada. Noa do mitʼṭecʼ sonot mukuṭge. Chapakatʼ leka ona bata cetanre noa kathako chapada, “Probhu Isor ńutumte begar dohowakʼ.”

³¹ Probhu Isor Mose oka lekae hukumade tahẽkan onkage onko do nil roṅakʼ baberte dạhṛi sãoteko tol jalatʼkeda.

Mose do sekʼwa tạmbu reakʼ jiniskoe ńelkeda

³² Nonkatege sekʼwa tạmbu, metakʼme ńapamokʼ tạmbu reakʼ jotowakʼ kạmi do sạtena. Ar Probhu Isor Mose okalekae hukumade tahẽkan onkage Israelko do jotowakʼko kạmikeda.

³³ Ona tayom onko do ona sekʼwa tạmbu lạgitʼ benaoakʼ joto do Mose ṭhenko idikeda. Ona do hoyokʼkana sekʼwa tạmbu ar ona reakʼ sanam asbabko, mudạmko, phremko, hurkạṛko, khunṭiko ar ganḍoko;

³⁴ arakʼ roṅakatʼ bheḍa harta ar merom harta reakʼ banar umulakʼ ar sonot utạrakʼ ṭhạ̃i dapal reakʼ ḍhakna;

³⁵ ar ḍaṅkin sudhạ sekʼwa tạmbu ar ona reakʼ ḍhakna;

³⁶ mej ar ona reakʼ jinisko ar Probhu Isor ṭhen samaṅakʼ piṭhạ;

³⁷ sạr diuheko, khạṭi sona reakʼ diuhe dohowakʼ ar ona reakʼ jinisko, ona reakʼ mạliko ar seṅgel jol lạgitʼ sunum;

³⁸ sona reakʼ pinḍ, ojogokʼakʼ sunum, so sunum ar sekʼwa tạmbu duạr reakʼ orwalko;

³⁹ Pitạl reakʼ jhạńjri ar pitạl reakʼ pinḍ, ar ona reakʼ ḍaṅkin ar joto lekan asbabko, ganḍoko;

⁴⁰ bakher raca reakʼ khunṭiko, onako reakʼ ganḍoko ar ona reakʼ orwal ar bakher racate bolokʼ reakʼ orwal; bakher raca orwal reakʼ gońj ar baberko; sekʼwa tạmbu, metakʼme ńapamokʼ tạmbu reakʼ joto lekan sorońjamko;

⁴¹ sonot ṭhạ̃ire sekʼwa kạmi lạgitʼ kicricʼko, metakʼme naeke Aron lạgitʼ benaoakʼ sonot kicricʼko ar uniren hoponkin lạgitʼ naeke lekate sapʼdapʼ kạmi lạgitʼ kicricʼko.

⁴² Probhu Isor Mose oka lekae hukumade tahẽkan onkage Israelko do jotowakʼko kạmikeda.

⁴³ Mose do onkoakʼ joto kạmi ńelteye bujhạukeda, Probhu Isorakʼ hukum lekage jotowakʼ kạmi do hoyakana. Onate Mose do Israelkoe bhoratʼkoa.