Exodus 38 - সান্তালী বাইবেল

Jeredokʼ samaṅokʼ reakʼ pinḍ

¹ Besalel do jeredokʼ samaṅokʼ lạgitʼ gabla kaṭ reakʼ mõṛẽ moka jeleń, mõṛẽ moka osar ar pe moka usul mitʼṭecʼ pon konac pinḍe benaokeda.

² Pinḍ reakʼ ponon konacre ponea dereńe benaoada; ar dereńko do pinḍ sãote joṛao mitʼge tahẽkana. Uni do dereńko sudhạ pinḍ do pitạlteye tolkeda.

³ Ar pinḍ reakʼ jotowakʼ asbabko, metakʼme ṭukucʼko, kạ̃ṛchuko, chichiṭiạu lạgitʼ bạṭi, jel rakab lạgitʼ kãṭãko, bursiko noako jotoge pitạl reakʼe benaokeda.

⁴ Pinḍ lạgitʼ pitạl reakʼ mitʼṭecʼ jhạńjriye benaokeda. Ar kaṅkha latar secʼre ona doe dohokada. Onate jhạńri do pinḍ latar ar cetan ona adha ạdhire tahẽyena.

⁵ Ḍaṅkin gutukakʼ lạgitʼ ona jhạńjri ponon konacre pitạl reakʼ ponea kạṛiye benaoada.

⁶ Gabla kaṭte barea ḍaṅe benao ocokeda ar ona ḍaṅkin hõ pitạlteye tolkeda.

⁷ Ar ḍaṅ do kạṛi talateye gutukada jemon pinḍ gokʼ idi jokhecʼ ona ḍaṅkin do pinḍ reakʼ banarsa aṛere tahen. Pinḍ do toktakoteye benaokeda ar bhitri do phãkge tahẽyena.

Pitạl reakʼ bhajan benaokʼkan

⁸ Uni do pitạl reakʼ mitʼṭecʼ bhajane benaokeda. Ar okoeko maejiu sapʼdapʼ kạmi lạgitʼ ńapamokʼ tạmbu reakʼ duạr ṭhenko hijukʼkan tahẽkan onkoakʼ pitạl reakʼ ạrsite ona bhajan ar ona reakʼ ganḍokoe benaokeda.

Sekʼwa tạmbu reakʼ raca

⁹ Ona tayom Besalel do sekʼwa tạmbu reakʼ beṛhaete bakher racae benaokeda. Bakher raca reakʼ dạkhin secʼ mitʼsae moka jaega lạgitʼ do uńakʼ mĩhĩ musnạ sutạmte orwalkoe benaokeda.

¹⁰ Ona orwal ṭaṅgao lạgitʼ bargel goṭecʼ khunṭiye benaokeda. Ar ona khunṭiko lạgitʼ pitạl reakʼ bargel goṭecʼ ganḍoko ar khunṭiko sãote joṛao lạgitʼ rupạ reakʼ bạkupʼakʼ ar khunṭi jokʼṛao ṭheṅgakoe benaokeda.

¹¹ Bakher raca reakʼ utạr secʼhõ mitʼsae moka jaega lạgitʼ do bargel goṭecʼ khunṭiko, ar khunṭiko joṛao lạgitʼ pitạl reakʼ bargel goṭecʼ ganḍoko ar khunṭi sãote joṛao lạgitʼ rupạ reakʼ bạkupʼakʼ ar joṛaoakʼ ṭheṅgakoe benaokeda.

¹² Bakher raca reakʼ pạchim secʼhõ mõṛẽgel moka jaega lạgitʼ orwalko, gel goṭecʼ khunṭiko, gel goṭecʼ ganḍoko ar khunṭi sãote rupạ reakʼ ạṅkus ar joṛaoakʼ ṭheṅgakoe benaokeda.

¹³ Bakher raca reakʼ purub secʼ hõ mõṛẽgel moka jaega tahẽkana.

^14-15 Uni do onḍenakʼ duạr denebanar lạgitʼ gel mõṛẽ moka jeleń orwal, pepe goṭecʼ khunṭi ar pepe goṭecʼkate ganḍoe benaokeda.

¹⁶ Bakher raca beṛhaeteakʼ joto orwal hõ mĩhĩ musnạ sutạmteye benaokeda.

¹⁷ Khunṭi lạgitʼ ganḍoko do pitạlteye benaokeda. Khunṭi sãote joṛao lạgitʼ bạkupʼakʼ ar joṛaoakʼ ṭheṅga do rupạteye benaokeda. Ar khunṭiko reakʼ muthni hõ rupạteye tolkeda. Bakher raca reakʼ joto khunṭirege rupạ reakʼ joṛaoakʼ ṭheṅga do tahẽkana.

¹⁸ Bakher raca lạgitʼ hõ mitʼṭecʼ orwale benaokeda. Noa do nil, beguni ar jeṅgetʼ arakʼ sutạm ar uńakʼ mĩhĩ musnạ sutạmte nana parkan noksage tahẽkana. Noa orwal do bargel moka jeleń ar bakher raca reakʼ eṭakʼakʼ orwalko leka mõṛẽ moka kate usul tahẽkana.

¹⁹ Noa orwal lạgitʼ ponea khunṭi ar pitạl reakʼ ponea ganḍo benao hoyena. Khunṭi reakʼ ạṅkus ar joṛaoakʼ ṭheṅga hõ rupạte benaoena. Ar khunṭi reakʼ bohokʼ hõ rupạteye tol ocokeda.

²⁰ Sekʼwa tạmbu ar bakher raca orwal reakʼ gońjko hõ pitạlteye benaokeda.

Sekʼwa tạmbu reakʼ jinisko

²¹ Sekʼwa tạmbu, metakʼme goha tạmbu benaokʼre cetʼ cetʼko jinis lagaolen Moseyakʼ hukumte pạhil khonge naeke Aronren hopon Ithamarakʼ ạyurte Liwiko do ona reakʼ hisạbko dohokeda.

²² Probhu Isor do Mose oka cekae lạgitʼe hukumade tahẽkan ona hukum lekage Jihudạ khũṭren Uriạren hopon Besalel do jotowakʼe benaokeda. Uni do Hurren goṛomtetʼ koṛae tahẽkana.

²³ Dan khũṭren Ahisamakren hopon Oholiab do Besalele goṛowade tahẽkana. Uni do ti reakʼ kạmi metakʼme lalakʼ rorokʼren kạrigole tahẽkana. Ona chaḍa nil, beguni ar jeṅgetʼ arakʼ sutạm ar mĩhĩ musnạ sutạmte nana parkan galaṅ kạmiren mitʼṭen gạkhuṛ kạrigolgeye tahẽkana.

²⁴ Dolao samaṅokʼakʼ reakʼ jotote irạl sae eaegel eae keji pe sae gram sona do noa sonot tạmbure kạmi lạgitʼ beoharena. Ar noa ojon do dhorom reakʼ ojon lekate tahẽkana.

^25-26 Hoṛ lekhako jokhecʼ okoe Israelkoko lekha ocolen eken onko ṭhen khonge dhorom reakʼ ojon lekate pe hajar gel eae keji eae gram rupạ do ńamlena. Ar jotote turui lakh pe hajar mõṛẽsae mõṛẽgel hoṛ doko lekha ocolena. Onko sanamkoakʼ umer do bargel bochor se ona khon ḍher tahẽkana. Onko do bohokʼ pichạ soṅkate mõṛẽ gram kate rupạko emlena.

²⁷ Ona modre pe hajar keji rupạte sekʼwa tạmbu ar orwal reakʼ ganḍoko benaokeda. Mimitʼ goṭecʼ ganḍo lạgitʼ pegel keji kate rupạte mitʼsae ganḍoko benaokeda.

²⁸ Ar sarecʼ mitʼgel eae keji eaegel tala gram rupạte do ạṅkusko, khunṭi reakʼ bohokʼko ar joṛaoakʼ khunṭiko lạgitʼ beoharena.

²⁹ Ar oneko danketʼ reakʼ pitạl do eaegel mon bar hajar pon sae sekel tahẽkana.

³⁰ Onakote uni do ńapamokʼ tạmbu duạṛko reakʼ ganḍoko, pitạl reakʼ pinḍ ar ona lạgitʼ pitạl reakʼ jhạńjri ar pinḍ reakʼ sanam asbabko,

³¹ ar bakher raca reakʼ beṛhaeteakʼ ganḍoko ar bakher raca duạr reakʼ ganḍoko, sekʼwa tạmbu ar beṛhaeteakʼ bakher raca reakʼ gońjkoe benaokeda.