Exodus 37 - সান্তালী বাইবেল

Goha sinduk

¹ Besalel do gabla kaṭte goha sinduke benao ocokeda. Ona reakʼ jeleń do bar moka tala, osar do mitʼ moka tala ar usul do mitʼ moka tala tahẽkana.

² Ona reakʼ bhitri ar bahre do khạṭi sonateye tolkeda ar ona reakʼ beṛhaete do sona reakʼ gunsiye benaoada.

³ Ar chańchre dulkate ponea sona reakʼ kạṛiye benao ocokeda ar ona ponea kuṭhạ reakʼ banarsa aṛere bareakate kạṛiye lagaoada.

⁴ Ona tayom gabla kaṭ reakʼ barea ḍaṅe benao ocokeda ar ona hõ sonateye tolkeda.

⁵ Sinduk gokʼ idi lạgitʼ ona reakʼ banarsa kạṛi talate ona banar ḍaṅe hurạṛada.

⁶ Ona tayom Besalel do khạṭi sonate sinduk reakʼ daya duṛupʼakʼe benaokeda. Ona reakʼ jeleń do bar moka tala ar osar do mitʼ moka tala tahẽkana.

⁷ Daya duṛupʼakʼre sonaren barea Kerube benaoketʼkina, unkin Kerub doe koṭecʼ benaoketʼkinạ.

⁸ Ar unkin Kerub do sinduk reakʼ banar sa aṛerekin tahẽyena. Unkin Kerub do daya duṛupʼakʼ reakʼ denebanar mucạtʼreye benaoketʼkinạ.

⁹ Unkinakʼ phạ̃kṛạ̃kʼ do cetan secʼ lap lapae doho ocoketʼte daya duṛupʼakʼ do unkinakʼ phạ̃kṛạ̃kʼte umulena. Ar Kerub dokin samaṅ mitʼkeda ar unkinakʼ mẽtʼãhã do daya duṛupʼakʼ samaṅre taheyena.

Samaṅakʼ piṭhạ lạgitʼ ṭebil

¹⁰ Besalel do gabla kaṭte bar moka jeleń, mitʼ moka osar ar mitʼ moka tala usul mitʼṭen ṭebile benaokeda.

¹¹ Uni do khạṭi sonate onae tol ocokeda ar beṛhaete do sona reakʼ gunsiye benaoada.

¹² Ṭebil reakʼ beṛhaete pon kạṭupʼ usul batae lagaoada. Ar ona bata cetante sona reakʼ gunsiye benaoada.

¹³ Chãńchre dulkate sona reakʼ ponea kạṛiye benao ocokeda ar ṭebil reakʼ ponon konare ponea kuṭhạ cetanreye lagao ocokeda.

¹⁴ Ona kạṛi do ṭebil beṛhaete ona usul bata ṭhene bạisạukada jemon ṭebil gokʼ idiyre ona talate ḍaṅkin bolo daṛeakʼ.

¹⁵ Ar ṭebil gokʼ idi lạgitʼ ḍaṅkin hõ gabla kaṭ reakʼe benao ocokeda ar sonateye tolkeda.

¹⁶ Uni do ṭebil reakʼ jinisko khạṭi sonateye benaokeda. Ona do hoyokʼkana, ona reakʼ thạriko, kạ̃ṛchuko, ar coḍorokʼ lạgitʼ bạṭiko ar loṭakoge.

Diuhe dohowakʼ

¹⁷ Besalel do khạṭi sonate mitʼṭecʼ diuhe dohowakʼe benaokeda; ar ona reakʼ latar hĩs ar ona khon rakapʼ akan ḍạnḍi doe koṭecʼ benaokeda. baha leka bạṭiko, ḍombeko ar baha do diuhe dohowakʼ khon oḍok hijukʼa ar ona joto do benao mitʼge tahena.

¹⁸ Ona diuhe dohowakʼ reakʼ banar aṛete pepe goṭecʼkate jotote turui goṭecʼ ḍạre benaoada.

¹⁹ Pạhil ḍạr reakʼ tala talate baha ar ḍombe sudhạ badam bahaleka ńelokʼ pea bạṭi do pạhil ḍạr reakʼ talareye benaoada. Ar ona tayom reakʼ ḍạrre hõ onkageye dohokeda. Ar diuhe dohowakʼ khon oḍok hecʼakan turui goṭecʼ ḍạrko hõ inạ mitʼ lekageye benaoada.

²⁰ Diuhe dohowakʼ reakʼ ḍạnḍi tala talate hõ baha ar ḍombe sudhạ badam baha leka ńelokʼ ponea bạṭiye benaokeda.

²¹ Diuhe dohowakʼ khon oḍok hecʼakan turui goṭecʼ ḍạr talare pạhilte barea okare milạu akan ona reakʼ latarre mitʼṭecʼ ḍombe, ar dosarakʼ barea latarre ar mitʼṭecʼ ḍombe ar tesarakʼ barea latarre armitʼṭecʼ ḍombeye benaoada.

²² Onako reakʼ ḍombe ar ḍạr do jotoge diuhe dohowakʼ khon oḍok hijukʼa ar joto do mitʼṭecʼ jinisge tahẽkana. Ar ona do jotoge khạṭi sonate koṭecʼ benaoakʼ tahẽkana.

²³ Khạṭi sonate eae goṭecʼ mạli, ar ona reakʼ cimṭạko ar ḍhạknicʼkoe benaokeda.

²⁴ Pegel keji khạṭi sonate noa diuhe dohowakʼ ar ona reakʼ jotowakʼ jiniskoe benaokeda.

Dhudhup pinḍ benao reakʼ

²⁵ Besalel do gabla kaṭte mitʼṭecʼ dhudhup pinḍe benaokeda. Ona reakʼ jeleń do mitʼ moka, osar do mitʼ moka, ar usul do bar moka tahẽkana. Ar ona reakʼ dereń do onare joṛao mitʼge tahẽkana.

²⁶ Ona pinḍ reakʼ chat, ar bhit reakʼ beṛhaete ar dereńko uni do khạṭi sonateye tolkeda. Ar pinḍ reakʼ beṛhaete do sona reakʼ noksakoe benaoada.

²⁷ Pinḍ banarsa aṛe noksa latarre bareakate sona reakʼ kạṛiye lagaoada jemon ona bhitrite ḍaṅkin gutukate onako gokʼ idi daṛeakʼ.

²⁸ Ona ḍaṅkin do gabla kaṭte benaokate sonateye tolkeda.

Jut so mosola ar ojogokʼ sunum reakʼ

²⁹ Ona chaḍa riritʼko reakʼ dharate jut so mosola reakʼ nirạ dhup ar ojogokʼ sunum hõe tearkeda.