Exodus 36 - সান্তালী বাইবেল

¹ “Onate sonot sekʼwa ṭhạ̃i cetʼleka benao hoyokʼa ona bujhạu lạgitʼ Probhu Isor do Besalel, Oholiab ar eṭakʼ kạrigolko hõ bud ar ạkile ematʼkoa jemon onko do Probhu Isorakʼ hukum leka jotowakʼko kạmi daṛeakʼ.”

Hoṛko ạḍi utạr danko ạguketʼ

² Mose do noa sanamakʼ kạmi lạgitʼ Besalel ar Oholiab tạkine hohoatʼkinạ ar ona chaḍa nonkan gạkhuṛ kạrigolko hõe hohowatʼkoa okoe do Probhu Isor khon daṛeko ńamakatʼ ar monre uskur menakʼtako.

³ Sonot ṭhạ̃i reakʼ sekʼwa kạmi lạgitʼ Israelkoakʼ ạguakʼ jinisko onko do Mose ṭhen khonko bhujhạu hataoana. Menkhan Israelko do din hilokʼ setakʼ jokhecʼ akoakʼ monsubạ leka jinis ạguiytegeko tahẽyena.

^4-5 Okoe gạkhuṛ kạrigolko sonot ṭhạ̃i reakʼ sekʼwa kạmi lạgitʼko kạmikan tahẽkan onko do onako ńelketʼ khan kạmi thirkate Mose ṭhen senkateko menkeda, “Probhu Isorakʼ hukum leka kạmi lạgitʼ tinạkʼ jạruṛokʼ hoṛko do ona khon hõ ḍher jinisko ạguyeda.”

⁶ Unre Moseyakʼ hukum leka onko do Israelkoakʼ ḍerate senkate sanam hoṛko baḍae ocoketʼkoa, baṅ do herel hoponko ar baṅ do maejiuko jemon sonot ṭhạ̃i reakʼ sekʼwa kạmi lạgitʼ jãhãnakʼ jinis ar aloko ạgui. Ar onate hoṛko do jinis ạguko thirena.

⁷ Ente okako jinisko jarwaletʼ ona do jạruṛokʼakʼ khon hõ ḍherge tahẽkana.

Ńapamokʼ tạmbu

⁸ Okoe hoṛko kạmikan tahẽkan onko modren gạkhuṛ kạrigolko do ũńakʼ mĩhĩ musnạ sutạmte ar nil, beguni ar jeṅgetʼ arakʼ sutạmte benaoakʼ gel goṭecʼ orwal kicricʼte ńapamokʼ tạmbuko benaokeda. Ar gạkhuṛ kạrigol hotete onare Kerubkoakʼ muṭhạnko dohokeda.

⁹ Orwal do jotoge inạ mitʼ jokhatege benao hoylena. Ona reakʼ jeleń do bargel irạl moka ar osar do pon moka tahẽkana.

¹⁰ Orwal do mõṛẽ goṭecʼ, mõṛẽ goṭecʼkate mitʼ sãote joṛao mitʼkate ona do barea maraṅ okocʼ orwalko benaokeda.

¹¹ Pạhilakʼ maraṅ orwal reakʼ mitʼ aṛe osar secʼ do nil sutạmte gạliko benaoada. Ar dosarakʼ orwalre hõ ṭhik onageko benaoada.

¹² Nonkate pạhil maraṅakʼ orwalre mõṛẽgel goṭecʼ gạli ar dosarakʼ orwalre hõ mõṛẽgel goṭecʼ gạliko benaokeda. Noa banar maraṅ orwal reakʼ gạliko do mimitʼ goṭecʼ reakʼ mohnḍa muhnḍire tahẽkana.

¹³ Ona tayom mõṛẽgel goṭecʼ sona reakʼ bạkupʼakʼko benaokate onako do gạliko talate gutukate ona banar maraṅ orwalko gakʼkada. Ar ona banar orwal kicricʼte mitʼṭecʼ maraṅ okocʼ sekʼwa tạmbuge hoyena.

¹⁴ Ńapamokʼ tạmbu reakʼ cetan reakʼ hĩs dapal esetʼkakʼ lạgitʼ meromakʼ upʼte gelmitʼ goṭecʼ orwal kicricʼko benaokeda.

¹⁵ Mimitʼ orwal kicricʼko do jotoge mitʼ jokha tahẽkana. Ona do jeleńte pegel moka ar osar do pon mokakate tahẽkana.

¹⁶ Ar onako khon mõṛẽ goṭecʼ orwal kicricʼ do joṛao mitʼkate mitʼṭecʼ maraṅ orwal kicricʼ hoyena. Ar sarecʼ turui goṭecʼ orwal kicricʼ do mitʼ sãote joṛao mitʼkate ar mitʼṭecʼ maraṅ okocʼ orwal kicricʼ hoyena.

¹⁷ Pạhilakʼ maraṅ orwal kicricʼ reakʼ osar secʼ reakʼ dhạrire mõṛẽgel goṭecʼ gạliko benaoada, ar dosarakʼ maraṅ orwal kicricʼre hõ ṭhik onkage gạliko benaoada.

¹⁸ Ona tayom pitạl reakʼ mõṛẽgel goṭecʼ bạkupʼakʼ benaokate ona banar maraṅ orwal kicricʼ do mitʼ sãoteko bạkupʼkada. Onate ona banar orwal kicricʼte mitʼṭecʼ tạmbu hoyena.

¹⁹ Ar arakʼ roṅ akatʼ bheḍawakʼ hartate ona cetan reakʼ dapalakʼko benaoada ar ona cetan reakʼ dapalakʼ hõ merom hartateko benaokeda.

²⁰ Ńapamokʼ tạmbu lạgitʼ do gabla kaṭte paṭako benaokeda.

²¹ Mimitʼ paṭako do gel moka jeleń ar osarte do mitʼ moka tala tahẽkana.

²² Onko do mitʼ goṭecʼ paṭakore babar goṭecʼ kuṭhạko benaoada. Sekʼwa tạmbu reakʼ joto paṭakoge inạ mitʼ lekako benaokeda.

²³ Dạkhin secʼ lạgitʼ do bargel paṭako benaokeda.

²⁴ Onako paṭa reakʼ mimitʼ kuṭhạ latarre doṛomkakʼ lạgitʼ pongel goṭecʼ rupạ reakʼ ganḍoko hõko benaoada. Ar mimitʼ paṭa lạgitʼ do bareakate, metakʼme mimitʼ kuṭhạ lạgitʼ mitʼṭecʼkate ganḍoko benaoada.

^25-26 Sekʼwa tạmbu reakʼ eṭakʼ secʼ, metakʼme utạr secʼ lạgitʼ hõ bargel goṭecʼ paṭa tahẽkana ar mimitʼ paṭa lạgitʼ bareakate jotote pongel goṭecʼ rupạ reakʼ ganḍoko benaokeda.

^27-28 Tạmbu reakʼ pạchim secʼ, metakʼme tayom secʼ lạgitʼ do turui goṭecʼ paṭa ar tayom secʼ reakʼ banar konac lạgitʼ arhõ barea paṭako benaoada.

²⁹ Noakin paṭa reakʼ banar konac reakʼ barea paṭa sãote latar khon cetan hạbicʼko joṛaokada. Mimitʼ konac reakʼ banar paṭa ar aṛe reakʼ paṭa hõ mitʼ sãoteko joṛaokada. Ar banar konacge mitʼlekako dohokada.

³⁰ Onate kuḍạm secʼ irạl goṭecʼ paṭa ar mimitʼ paṭako reakʼ latarre emakʼ lạgitʼ barea kate jotote gel turui goṭecʼ rupạ reakʼ ganḍoko benaokeda.

^31-32 Sekʼwa tạmbu reakʼ paṭako lạgitʼ do gabla kaṭ reakʼ hurkạṛakʼ ḍaṅko benaokeda. Onako modre mõṛẽ goṭecʼ do mitʼ secʼakʼ paṭako lạgitʼ ar mõṛẽ goṭecʼ do eṭakʼ secʼakʼ paṭako lạgitʼ ar mõṛẽ goṭecʼ do tayom secʼ, metakʼme pạchim secʼ reakʼ paṭako lạgitʼ.

³³ Cetan ar latar reakʼ hurkạṛko modre jeleńakʼ hurkạṛ do paṭa talate niạ sa khon hanasa hạbicʼ parom tahena.

³⁴ Ar onako paṭa do sonateko tolkada ar hurkạṛ bolokʼ lạgitʼ sona reakʼ kạṛiko benao ocokate paṭareko lagaokeda. Ar ona hurkạṛko do sonateko tolkeda.

³⁵ Kạrigolko do nil, beguni ar jeṅgetʼ arakʼ sutạm ar ũńakʼ mĩhĩ musnạ sutạmte mitʼṭecʼ orwalko benaokeda. Ar gạkhuṛ kạrigolte onare Kerubkoakʼ muṭhạnko benao ocokeda.

³⁶ Ona orwal do gabla kaṭ reakʼ ponea khunṭiko benaoada ar khunṭiko do sonateko tolkeda. Ar onako khunṭi lạgitʼ do sona reakʼ ạṅkusko benaoada ar khunṭiko bạisạu lạgitʼ rupạ reakʼ ponea ganḍoko benaokeda.

³⁷ Tạmbu reakʼ duạr lạgitʼ hõ nil, beguni ar jeṅgetʼ arakʼ sutạm ar ũńakʼ mĩhĩ musnạ sutạmte mitʼṭecʼ noksa akatʼ orwalko benaokeda.

³⁸ Noa orwal lạgitʼ ạṅkus sudhạ mõṛẽ goṭecʼ khunṭiko benaokeda. Khunṭi reakʼ muthni ar ona reakʼ sakomko do sonateko tolkeda. Ar khunṭiko bạisạu lạgitʼ do pitạl reakʼ mõṛẽ goṭecʼ ganḍoko benaoada.